PATE HAANTHAWNNA (E01) Thupi: Pasian-Mi Hihna Nei Inn Suangpa By: Pastor Thangdoulal

PATE HAANTHAWNNA (E01)

Thupi: Pasian-Mi Hihna Nei Inn Suangpa

By: Pastor Thangdoulal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

Tulai a i khotaang hinkhua ua i poimawh mahmah uh ahihleh, Pasian in mawhpuakna a piakbang a a innsung keemzou pa (father) ahi chih theikawm in hih Bible Taang a na simkhawm ni. 

Mikah 6:8, "Mihing aw, Ama'n A hoihna a hung musakta hi; Nang a kipan a Toupa kinepna bang a hia? Diktattak a gamtat diing, hehpihna it diing, ki-ngiamkhiattak a na Pasian tawh zawkkhawm diing a chi."

1. Pasian-Mi Hihna Nei Inn Suangpa'n Pasian It Hi.

Bible: Matt. 6:33, "Hilezong Pasian gam leh a diktatna zong masa un, tua hileh hite tengteng zong a hung piakbehlap lai ding hi." 

Nunnopna zungpi Pasian ahihlam theilou a leitung a eima nunnopna diing zong a buaina in, i hinkhua uh zangbei-mai diing a hita diam? Ahihke'h thei napi-a Pasian tawh kilep sawmloute i hikhazaw hiam? Pasian tawh kilemna diktak na neih masak kei leh, na deihnate leh tupnate ah na lawhching taktak theikei diing hi. Pasian tawh kilemna diktak na neih masak kei leh na it mahgmah na zi na tate zong na muhdah hun hung omtheilai diing hi. Tuaziak in Pasian tawh kilemna diktak nei masa inla, tuachiang in na neih na Pasian na itna tawh na innsung keem in, tua hileh lamzangh diing hi. Leitung ah Pasian tawh kilem louhte leh Pasian itna a neiloute pen, bangmah tawh kilemthei taktak lou a, a itna uh zong zuauthei/ diklouthei mawk hi.

2. Pasian-Mi Hihna Nei Inn Suangpa'n A Zi It Hi.

Eimite lak ah a zi itte pen, mizote chihdan hileh 'thaiboi' kichi ut mahmah hi. Tualeh 'thaiboi' chi a ngawh a omte'n lah, 'thaiboi kan tawh lova, chhungkaw tangrual kan ni,' achi uh, chiin kholai leh hotel tamtak ah houlimna in kizangh hi. Papi khat a ta paw-kawm a, kholai a vaakte bang zi thumang chih leh ngawhna tuamtuam in ki-ngawh thei mawk hi. hihte tawh kibang ngaihdan tamtak zong a om diing in ka gingta hi. Hilezong hihte pen, ngaihtuahna diklou pumluum ahi. 

Bible simna nei ni; "Pasalte aw, Khrist in saptuamte a it a, a ta`ng ua a kipiak bang in nou zong na zite uh it un. Ama'uh tui a sil a, thu a asuksiang a asawpsiang theihna ding in, saptuam a ding in Amah akipia hi. Tualeh ama'uh pen nin banglou, vuai lou leh huachibang sil mawng mawng omlou, hinanleh siangthou leh dembei saptuam thupitak Amah akipiak theihna ding ahi. Tuaziak in pasalte`n ama'uh pumpi mah bang in a ziite uh a it ding uh ahi. A zi itpa pen amah ki it ahi. Aziak pen, kuamah in ama taksa ahaw ngai kei. Hinanleh Toupa`n saptuamte abawl mahbang in avak in a deihthoh zaw ding hi; aziak pen, eite Ama pumpi bazamte i hi ua, a taksa leh aguhte i hi uhi. Hih ziak in pasal in anu leh apa a nuse ding a, azi atu ding, tuachi`n anih un taksa pumkhat a hung hita ding uhi. Hihpen thugu`k kiphual thupitak ahi, hinanleh ken Khrist leh saptuam thu ahi ka gen. Hitalehzong nalak ua kuapeuh in amah a ki it bangin a zi it hen, tualeh zi pen apasal zahtak ding in pilvang hen. (Matt. 5:25-33).

Itna Hilhchianna: "Mihing hamte leh vantungmite ham in thu gen thei nanleng, itna ka neih kei leh dak ging hiam, jam ging hiam ka bang leltak ding hi. Tualeh thugen theihna silpiak nei in, thugu`k zousiah leh theihna zousiah thei siang in, mual kisuansak theihna khop ginna nei nanleng, itna ka neih keileh bangmah lou ka hi. Ka neih zousiah migen theite vak na'ng a pesiang in, ka pumpi haltum dingin pe-ngam nanleng, itna ka neih kei leh bangmah a phatum kei hi. Itna a thuak-hât a, a hehpih a, itna in a thangsiat kei a, itna aki liansak kei a; itna akilawmlou in agamta kei a, amah ding bek akhual kei a, ahehbaih kei a, sil gilou a ngaihtuah kei a; diktat louhna ah akipak kei a, hinanleh thutak ah akipak hi. Sil zousiah puakdan asiam a, sil zousiah agingta a, sil zousiah alam en a, sil zousiah athuak paisuak hi. Itna a lawhsam ngai kei hi. Jawlnei' thugente om nanleh, a hungbei ding a, ham theihlouhte om nanleh ahung tawp ding a, theihnate om nanleh a hungbei ding hi, bangmahlou ahung suak ding hi. Eite'n a bukim a i theih louh ziak un, a bukim lou in thu i gen uhi. Hinanleh a bukim a hungtun chiangin a bukimlou pen sukbei ahita ding hi. Ka naupang lai in, naupang ham in ka ham a, naupang theih in ka thei a, naupang ngaihtuah in ka ngaihtuah hi; hinanleh k'ung pichin tak in, naupang silte ka koihkheta hi. Tu'n limlang sunga et bang in, kichian lou in mu mialmual nanlei-zong, mailam ah kimaitang tuah in i mu ding uhi. Tualaitak a i theihnate a kiching kei a, hilezong mailam ah Pasian in eite ahung theih bang in, kichiantak in Amah i thei ding uhi. Tualeh tu-in ginna tawh, kinepna tawh, itna, hihteng thum a omkhawm uhi, hinanleh hihteng lak a lianpen itna ahi. (1Kor. 13:1-13).

3. Pasian-Mi Hihna Nei Inn Suangpa'n A Tate It Hi.

Hih pate leh tate kikaal a itna tawh kisai thute, "Khamlouh Itna," chi a i na gelhsa uh article (thute) ah muhtheih in a om diing hi. Tutung a i genbeh ut uh ahihleh, tate'n thuhilhna leh thununna a poimawh uh leh, thangpai a vuak diing ahikei a, itna tawh thuhilh diing ahi. Kol. 3:21in hibang in na gen hi; "Pate aw, na tate uh hih thangpai kei un, atuachih keileh a lungkekha diing uh hi." na chi ahihman in pilvang ni. Tate'n am'uh i it hi chih a simna uh pen i hunzakdan ahi. Tate tawh hun zakkhawm tam pen, tate a diing in itna ahi a, a tawm leh a it zoulou bang in ngaihtuah uh ahihman in, i hunte uh zong a zeekdan leh a zakdan siam sawm chiat ni. Pate aw, na tate uh na itna ua kipan in, na tate un Pasian a muthei uh hiam? Muthei diing in na lam-en hiam? Tate'n pate itna leh thununna innsung a a muhmasak thei diing uh ahi a, a muhtheih kei ua ahihleh, eite pen, Pa lawhsamte i hikha diing uh hi. 

Pate aw, ei tungtawn a i innsung mite'n Pasian a muhtheih diing uh ahi, chih theihzing kawm in, eilam pan a i chitlouhnate Pasian kiang a thupha tawi in, Pa Thak hi a, Jesu min a kikheelta diing in i ki-ngen un i ki-chialzaw uh hi. Toupa Pasian in thupha hung peta hen.

Share: