Pasian nasem minthang Ravi Zacharias mualliam

ATLANTA,  MAY 19: Khawvel a Pasian thugen minthang mama, Canada a um India-tuolkuon Rev Ravi Kumar Zacharias (74) tu zingkal in atenna Atlanta, Georgia ah cancer ziehin dam zoulou in mualliam hi.

Zacharias ahileh a Spine (chinggu)
a Cancer um zieha lupna ngah ahidan, atanu Sarah Davis in apa Zacharias Facebook Page ah May 8, 2020 nia a update apat dam zoulou ding ahithu hing kithangkhia hi.

Azi Margaret Reynolds leh atate --Sarah Zacharias Davis, Nathan Zacharias, leh Naomi Zacharias toh Pasian hunchiem ngah a um ahidan uh, atanu Davis, CEO of Ravi International Ministries (RZIM) in tunai in ana gen hi.

Kumbul lam in, Ravi in anua anat (back pain) ziehin "emergency back surgery" nei ding ahidan ana genkhia ngai hi. Tualeh azi inzong amapa FB Page ah followers/friends te'n Zacharias a ki-at (surgery) zaw apatin gim semsem hi, hing na thumpi un chi'n ngen hi.

Coronavirus (Covid-19) buoina kawmkal ah, Pasian venna toh Ravi pe'n MD Anderson Cancer Center, Houston ah April kha'n kiensah thei leh treatment kibawl sah thei uhi. Tualeh photo khat azi toh akilahna uh Houston a umlai un a FB Page a update hi. A kiten uh kum 48 chinna lopna hun zong nuamtah in zang uhi. Tami treatment bawl sungin, aloipa Nabeel Qureshi, gilpi cancer zieha 2017 kuma shi, theigigena 'laigelh' khat ana buoipi khin hi.

Ravi Zacharias in kum 46 sung Pasian gam adin nna sem a, gam 70 val Pasian thugen in ana tuon pha hi. Leitung a "Apologetics" (Defender of Christian Faith) minthang mama khat, banah khawvel in abuoipi -- Origin, Meaning, Morality, Destiny, Eloquence, leh Grace -- tungtang thute ah mite hilchienna pesiem mama khat a mi'n a tepteh uh ahi. A thugente in mibil taisah zou a,  Pasian thu a buai theina tuomtuom tampite chiang tahin mite hilsiem zou hi, kichi.

Ama khu aneulai apat mi chituom vilvel khat, kum 17 ahitan in 'athiest' dan in kigen a, Pasian kichi apum gintatlou mihing khat ana hi. Ni khat chimaw beidawng lametna bei akisah lai in ama-le-ama kithah sawm a, 'poison' a dawnleh shi ding phiel in hospital lupna tunloh hi. Tua hunlai in local-mi Christian worker khat in anu Bible pia'n, na tapa John 14 ana simsah in chin ana gen hi. John 14:19 "Because I live, you also will live," in a lungtang khoi kha hi. Tami khu kinep thei umsun chi'n a ngaisun ta hi. "Mangpa Jesu aw, na gen bang a hinna petu na hileh, tami ka umna hospital lupna apat damtahin hing pawtsah in. Ka damleh ka hinkhuo pumpi nang adin ka pe ding chi'n Pasien kichiempih hi. Hing ding kinepna a beilai in, ahing dam a, Pasian ah kibulphu in, Bible ang zil a, tuachin Gospel a tangkou ta hi.

Pasian mizat Zacharias pen "preaching" lamah min nei mama. Kum 19 ahi'n International Youth Congress, Hyderabad (India) ah Asian Youth Preacher Award piehin um hi. Billy Graham Evangelistic Association inzong Zacharias khu khawvel Christian khawmpi thupipen lawi akigen, "International Conference for Itinerant Evangelists" ("Amsterdam '93") tunkimni/kipatni'a thugen di'n seh in um hi. Mi tuomtuom Speaker ding a kihat 4000 valte mai ah thu genna nei. Tuanah Christiante "apologetics" lamah chau mama in khawvel pilna/siemna (intellectual)  neite sawisel/gensiatnate (attacks)  uh "defend" zoulou uh, chi ang mukhia a, tuachi'n apologetics lam kihilna ang ngaipoimaw ta hi. India khawpi tuomtuom ah Pasian thu tangkou inzong kidieng koikoi hi.

Zacharias khu 26 March 1946 in Madras (Chennai) ah piang a, kum 5-mi ahin Delhi ah kituon uhi, azieh apa Defense Ministry a sem ahi. 1966 in Canada ah pemlut uhi. Azi Magaret Reynolds toh amau hattuuom sunga khanglaite kipawlna, Youth For Christ (YFC), lahah pat kimu kithei ahi ua, 1972 in kiteng uhi.

~  Bruce K. Thangkhal
Joint Editor,  Zogam Today [20-05-2020]

Share: