PA, OMLOUHNA (Ismael) KHANG By:Psator Thangdoulal

PA, OMLOUHNA (Ismael) KHANG

By: Psator Thangdoulal

 

Leitung mihingte lak ah, a nu-le-pa tawh omkhawmte leh a nu-le-pa tawh omkhawmlou mite kibaklouhna lian mahmah ahihman in i pu-le-pate'n a nu-le-pa tawh omkhawmloute genhak a sakziak un, 'Tagah Bilbing,' a na chi uh hi. Hibang a i pu-le-pate thugen tawh kibang sim in, Pa tawh omkhawm mihing khat hinkhua pen, a hoihlam hi taangpi a, hilezong a Pa tawh omkhawmlou mite khankhua pen bukim zoulou deuh hileh kilawm hi. Pa, poimawhna tawh kisai in President Oboma in zong, Pate poimawhdan theisiamtak kawm in, 'Fatherhood.gov' kichi website ah, 'Pa hihna pen, pasal khat hinkhua a diing a nna poimawh pen ahi,' a chi hi. Hibang ahihziak in Pa in a ompihlouh tate khang pen, khang lau-huai mahmah, leh thakhat a banghiam tuntheihna khang a suak hi.

Hih, Pa, Omlouhna Khang pen Ismael Khang zong a chihtheih diing a, tualeh hih khang in hihna zia-le-tong tuamdeuh a nei a, tuate hih a nuai a bang in i ngaihsut khawm diing uh hi.

 

I. Hih Khang pen Vaangsiat Thu a Om Ahi Kei a, Thu manlouh Ziak Ahizaw hi. Siamc. 16:2.

1.  Abram kiang a Pasian Thuchiam

Siamc. 15:2-4 a i muhbang un, Abram pen tapa nei diing a hilh in a om hi. Tapa kichi pen, Pasian thuphate lak a a manpha penpen a ngaih ahi a, tuni dong a gou lak a goumanpha pen dan a ngaih in a om hi. Hih pen Pasian in Abram piak sawm hi. Pasian in A thupha Abram a diing a a phal bang in nang a diing in zong phal a, hilezong ngahlouhtheih ahihman in Pasian mah beel ni. Leitung ah, Zi beel, Tanu mouthaksate beel, tapa inntuansate beel, pasal beel, nu beel, pa beel, U beel, Nau beel, Ni beel, Gang beel numei beel, chihbang tampi om hi. eite'n Pasian mah beelzaw ni.

 

2. Abram in Pasian Thuchiam Taangtunsak Sawm

Abramte nupa in Pasian lampi leh deihnate, a hunte ngak zoulou uh hiam, ahihke'h ama'uh deihna a letluat ziak hiam in TA neihna diing lampi a zong uh hi. Pasian in mihingte hoihna diing lungsim a nei napi, eite'n Pasian hun tungsak manlou hilehang kilawm hi. Pasian thuchiam pen Pasian mah in a taangtunsak diing ahi a, mihingte taangtunsak diing hilou hi. Nang leh na innsung a diing a Pasian lungsim leh deihnate a taangtunna diing in Pasian a na ki-ngak a ngai a, nang deihna leh theihna bang a na taangtunsak sawm leh, buaina in zui diing a, nang diing in zong hoihna hilou diing hi. Pate aw, Pasian tung bek a ki-nga in innsung makaih ni.

 

3. Abram in A Zi Thu Mang.

Tuachiin Sarai in Abram kiang ah, "En in, 'Toupa'n ka ta neih diing a hung khaktansak chih na mu hi; hehpihtak in ka silanu valuppih in; amah vaang a ta ka neih khaak leh,' a chi hi. Abram in Sarai aw a ngaihsak hi," chih Siamc. 16:2 ah i mu uh hi. Tuachiin Abram in, a zi thubang in, Ta neihna diing lampi zong hi. Abram in Pasian Muanna saang in tawndan ngainate zuizaw hi. Pau. 3:5, 'Na lungtang zousiah tawh Toupa muang inla, nangma theihna bek ah ki-nga ken.' Chih pen Pasian deihna ahihziak in Abram paidan leh Pasian a kituaklou a, a pianlou diing nna khat pianlawh hi. Tuapen PA, OMLOUHNA KHANG (Ismael Khang) pianna ahi.

PA, OMLOUHNA KHANG (Ismael Khang) a hung piankhitna ziak ahihleh;

1. Mimaltak a ki-ngaihtuahna a omlouh ziak ahi. Abram hoihtak in ki-ngaihtuah leh a zi silanu tawh ta neih sawm in, aangkawmna ah luutlou diing hi.

2. Pasian a ki-ngak zawhna omlou a, Pasian thute zuihlouhna ziak ahi. Abram pen, Pasian tung ah ki-nga zou henla, Pasian in a kiang a a chiamte muangtak in zui leh, Pa, Omlouhna Khang (Ismael khang) omlou diing a, Israel innkuan sung zong tuni dong in buailou diing hi.

3. Mawhna ngaihsut lou zeen a, ta neih diing utna ziak a Lupkhawmna thaang-huai a kipan in hih khang hung piangkhia hi. Tu'n zong, i gam leh khuate uh i et leh, Abram in ta a deihbang a hauhna leh gou manphate deihna ziak a mawhna bawl-ngam, mi tamtak om hileh kilawm hi.

4. Innsung ki-siatna ziak in hih khang hung piang hi. Abram in a bawl diing a kilawmte a bawllouh a tam man in a innsung hung buai a, a zi lui leh a zi thak kikaal ah lungsung a kidouna huaise mahmah hung om hi. Hihbang a omtak in Abram in zong naa sa mahmah ahi diing a, a tawp ah Pasian in Ismael (Abram tapa taak pen) tawh kisai in thuchiam a neihlawhta hi. Tuaziak in Hih Khang pen Vaangsiat Thu a Om Ahi Kei a, Pasian Thu Man diing pen manglou a, a thu a manlouh diing a zi thu a man ziak ahizaw hi. (Siamc. 16:2).

 

II. Hih Khang Pen, Kituaklouhna Khang Ahi (Siamc. 16:4-5, 12; 21:9)

1. Sarai leh Hagar Kituaklou Uh

Sarai leh Hagar a kimatmawh dan uh pen sil hithei diing hilou a, zong kilawmlou hi. Aziak pen, Sarai a diing a Hagar pen a silanu ahi a, Hagar a diing a Sarai pen a saapnu ahi. Hih numei tegeel kikaal ah, a mawh diing leh a dik diing kizong leh anih un a mawh maithei diing ua, tualeh a nih un a dik tuak maithei diing uh hi. Ahinlah, ama'uh tegeel mawhsak sawm i hikei ua, hih kigtuaklouhna zungpi khoi a hung kipan e? chih ngaihtuah sawm i hizaw uh hi. Pasian in a kiang a thu a chiam bang in, Abram a na om hiithiat henla hileh, hih numei tegeel kaal ah kisiatna omlou diing a, Abram zong a lungkham lou diing hi. Tuaziak in Sarai leh Hagar kisiatna pen Abram mawhna, a sil bawlkhial ziak ahi. Pate aw, Abram bang a i vaihawm khelhna ziak hiam, i kal suanna diingte Pasian kiang a i tut masak louh ziak hiam, ei hoihna bang a i gamtatna ziak hiam in i innsung kisia in, buaina omthei hi. Tuaziak in, i gamtatna diing zousiah uh Pasian lemsakna bang ahi hiam? Chih ngaihsut masa diing in i kichial thakthak uh hi.

 

2. Ama'uh innsung kituaklouna in leitung pumpi zeelsuak

Siamc. 16:12 Amah (Ismael) pen, gamlak sabiltung bang in a genhak diing hi, a khut tawh mi zousiah a dou diing a, mi zousiah khut in zong amah a dou diing hi; a sanggamte tawh kihou theilou in a khawsa diing hi," a chi hi. Bible a i muhbang un, Abram innsung kisiatna in gam-le-lei zeel a, hoihlam saang in siatlam ah khanghaat mahmah hi. Hih Ismael khaakte pen, tuni dong a leitung in a buaipih uh namte a hidenta uh hi. Tuaziak in Abram innsung kisiatna in leitung a lawhsawn haat dan lamdang mahmah hi. Tuni a, ei Pate'n i innsung chiat i puahphat kei leh, i tate pen, Ismael mahbang i inn a khoizual theihlouh in a om diing ua, Siamc. 21:9, a i muh bang un mi dangte simmawh, zah-lou in a omkha diing ua, ama'uh a diing in lah siatna a hikha diing hi. I tate'n sil hoih a thuhilhnate leh Pasian lam tawh kisai nna leh sil zousiah a huat ua, paupeengtak a hinkhua a zak masang un Pate aw, kisiamthak chiat ni i lahlai peet ahikha diing hi, chi in Jesu min in i ki-ngen in i ki-chial uh hi.

 

III. Pa, Omlouhna Khang (Siamc. 21:11, 14)

 Siamc. 21:10-11, 14, Sarai in Abraham kiang ah, "Hih silanu leh a tapa notkhia in; silanu tapa in ka tapa Isak gou a luah khawmpih thei kei diing hi," a chi hi. Hih thu, ama tapa mahmah tawh kisai a hih ziak in Abraham a dahsak mahmah hi. Tuachiin Abraham zingsang in a thoubaih a, an leh savun tuithawl a la a, Hagar kiang a pia in, a liangkou ah a nga in, naupang tawh a sawlkheta hi. Tualeh amah a pawtkhia a, Beer-sheba gamdaai ah a vakthapta hi." Abram in Pasian a kipan a thu muan-huai a muhziak a a tapa leh a nu gammaang a vaakthap diing a a sawlkhiat zong ahikha maithei diing a, hitalezong a tapa pen pa neilou bang a hinkhua zang ahita mai hi. Tuni a a damlai Pate aw, Ismael bang a vaakthap diing in na tate uh na phal uh hiam? Pasian in keem nave chiin na tate lehngatsan diing na hi uh hiam? Nang a Pa (Abram) damlai napi chin a, Pa neilou (Ismael) bang a na ta in a hinkhua a zak diing en-ngam taktak na diing na hi hiam? Pa, Om napi a, Pa omlouhna khang ah om bang a na tate na omsak diing hita maw? Pate aw, na tate un Pasian a muhtheihna diing uh noute mawhpuakna ahi. Pasian meel leh miziate pua a, na innsung chiat ua Pasian vaak taangsak diingte na hi uh hi. PA, OMLOUHNA (Ismael) KHANG om bang a na tate uh a ki-ngaihsut diing uh deihlou diing na hihziak un Jesu min in hung kisiamthak unla, Pa thak hung hita un. Toupa Pasian in A thupha hung peta hen.

 

 

 

 

 

Share: