NGAIDAM IN, A THEIHLOUH MAN UH AHI (E01)

By: Pastor Thangdoulal

BIBLE: Tuachi`n Jesu`n, "… Ama'uhte ngaidam in! A silbawl uh a theikei ua ahi," a chi hi. (Lk 23:34).

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

I. NGAIHDAMNA LEH A MANPHATNA

Ngaihdamna tawh kisai in, sanggampa Upa Evan Lianding in tunai in TV leh Youtube ah, mi zousiah ngaihkhiat theih diing in a hung gen a, tualeh Rev. Dr. JM Paupu in zong a youtube ah, Maisakna Thupha leh Khristian Nuntakna chih thu a gente tungtawn in tamtak i theita tham diing un ka gingta a, tuaziak in hih ngaihdamna leh a manphatna tawh kisai in thu tamlou hibang in i na en diing uh hi.

1. Mi dangte i ngaihdamna pen ei mahmah damna ahi. Aziak pen, mi dangte i ngaihdam louh chiang in, ei tawh kisai a a mawhnate uh hiam, diklou i saknate uh hiam in eima lungsim mahmah nasak a, lungnopna saang in lunggimna hung guanzaw hi. Tuaziak in ngaihdamna leh a manphatna masa pen ahihleh, eimah damna ahi chih i gen masa ut uh hi.

2. Ngaihdamna pen eimah a diing in zaangkhaina ahi. Mi dangte ngaihdamna pen, ama'uh (i ngaihdamte) a diing saang in, ei a ngaidamte a diing in zaangkhaina ahi zaw hi. Zaangkhai chih kammal pen, lunggim lungkhamna omlou a, navaaktak leh thovengtak a omtheihna dinmun genna ahi. 

3. Ngaihdamna pen eimah a diing in maitaanna hi. Maitaanna chih kammal in, mualphouna, zahlaakna, leh zumna chih kammalte tawh kigalsai a omna hiam, zumna, mualphouna, zahlaakna omlouhna gen-nuam hi. Tualeh maitaanna tawh kilehdou kammal ahihleh Maimual/ Maimualhna ahi. Hih Maimual i chihte ahihleh mi lak a hak-ngamlou, zum-huaisa, leh mualphou kisaktak a omna genna ahi. Mi khat na ngaihdam kei leh a Maimual pai diing chihna himawklou in, na ngaihdam leh mite lak ah Maitaang diing na hi, chihna a hizaw hi.

4. Ngaihdamna pen Maipha ngahna hi. Mi khai i ngaihdam ziak a mi zousiah maipha ngah diing chih thu a hikei a, Ngaihdamna pen Pasian deihna ahihziak in Pasian maipha ngahzaw hi hang. Tualeh Pasian maipha i ngah chiang in mite maipha zong ki-ngah hamtang hi.

5. Ngaihdamna pen Jesu Khrist theihpih a panna ahi. Jesu nungzui eite'n A nung i zuih uh Jesu Khrist meel i puakna diing un mi dangte ngaihdam theihna lungsim i puak diing uh ahi a, hih pen alou-theilou ahi. 

II. NGAIDAM IN, A THEIHLOUH MAN UH AHI 

Na ngaihdam utlouh hiam, na ngaihdam theihlouh diing khop a na khasiatnate, tuni in Ngaidam in, a theihsiamlouh ziak uh ahi. Theisiam hile-uh, nang a diing in hibang in a gamtaang kei diing ua, a theihsiam louh ziak ua a bawllouh diing uh bawlte ahihziak un ngaidam in, a theihlouh man uh ahi.

1. Na innsungmi, na u-le-naute lak a khasia a, na tung a a bawlte ua lungdam theilou a om na hi hiam? Na nu-la-pa tung a khasia na hikha hiam? Na tate uh tung a khasia na hikha uh hiam? Ngaihdamna na piak theihlouh diing khop a nang a diing a natna hung tutte kuate ahi ua? Na heh mahmahna leh na khasiatna mahmahte kuate ahi ua? Ama'uhte'n na tung a a sil bawlte uh, a theihsiamlouh ziak uh zong hithei ahihman in na ngaidam thei diam? I Toupa Jesu'n a mawhna hiloupi ah nasatak in a thuak a, a dikna genlou in, a dikna tung a siamlouhtante leh a thuaknatna diing a a tung a gamtate a diing in thu ngetsak hi chih theizing kawm in kipanthak ni hang in, eite zong Jesu mahbang a thuakzou diing leh i dikna a zong diklou bang a ding ngam diing in panla thak chiat ni, chiin Jesu min in i ki-ngen uh ahi.

2. Na lawm-le-gualte'n a hung bawldan ua khasia hiam, thangpai hiam a om na hi hiam? Ama'un theisiam le-uh nang hehna diing, nang khasiatna diing, leh nang thangpaihna diing bawllou diing uh ahihman in, Ngaihdam in, a theihlouh man uh ahi.

3. Theinazenpi a na thangpaihna diing bawl, na hehna diing bawl. Leh na khasiatna bawl teitei pen, na hoihna diing a Pasian mi zakte hithei ahi uh chih theisiam in. Joseph pen Egypt gam a milian khat ahihna diing in a U-te'n a zuak uh poimawh hi. Hilezong Joseph in a U-te kiang ah, 'Pasian in ei a diing a khualziak a kei a hung sawl masak ahi,' a chithei hi. Siatna zousiah zong siatna pumlum ahikei a, hoihna diing a siatna zong om hi. Tuaziak in, Ngaidam in, a theihlouh man uh ahi.

Toupa Pasian in hih thute tungtawn in Thupha hung peta hen…

Share: