MEELMATE MANPHATNA By: Pastor Thangdoulal

BIBLE: "Hinanleh Ke'n k'ung hilh ahi: na meelmate it inla, nang hung bawl gentheite thumsak in." (Matt. 5:44)

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

MEELMA KICHI BANG AHIA?

Meelma kichi pen, i kidoupih, i sual teitei uh, leh zawhsawm a i panna uh ahi a, hih pen mihing a hi sese kholkei maithei diing hi. Mihing dan a gen diing hitale hang, ei deihdan hung deihpih lou a, ei hung dou, hung langpante ahi a, i hoihna diing saang a i siatna diing deih a kipumpeite ahi.

Meelma tawh kisai a Nelson's Bible Dictionary gendan in, 'Mi khat in mi dang khat a gawt hiam, a tung a haksatna a tut leh, amah pen haksatna thuakpa meelma ahi,' a chi hi. Tua ahih chiang in, meelma kichi pen, tha-le-zung a i kidoupihte, leh lungsim lungsim a i kidoupihte zong ahi hi.

Meelma kichi hih a tung a i muhbang ahihman in, meelma pen kuamah in deihlou diing a, a nei diing a ki-ngap zong mi omlou diing in ka lam-en hi. Hitalezong, leitung mihingte meelma neilou kuamah a ki-omkei a, meelma zawngkhal deuh leh haat deuh nei, ahihkeileh meelma panlakdan siamlou nei pawl zong a ki-om maithei diing hi.

JESU'N A HUAT-HUAI MAHMAH MEELMATE IT DIING CHI HI.

Ei hung dou i meelma i it diing uh ahi chi a Jesu thupiak pen, sil hamsa mahmah khat ahihziak in Jesu'n a genkhial a hithei diam? Gen khiallou. Meelma kichi pen gou manpha tawh kibang a manpha ahihlam Jesu'n thei a, eite'n theilou hi hang. Meelma manphatna thei lehang, meelma ki-nei lou diing hi. I theihlouh ziak ua tuni dong a meelma neite i hi uh hi. Tualeh meelma i chih pen, i doute genna ahi a, hibang a i doute uh i zawh uh leh nuamna, lungdamna, hauhsakna leh nopsakna ki-ngah diing ahihziak in Jesu'n i meelmate uh it diing in nang leh kei hung deih hi. Aziak pen, Jesu'n nang a hung deihsak a, kei a hung deihsak hi. Pau. 10:22 in, "Toupa thupha in hauhsakna a tut a, tualeh ama'n tua hauhsaknate lak ah dahna a zausak kei hi," a chi hi. Na dou na meelma na zawhna diing in hahpan in. Eph. 6:12, "Aziak i doute pen taksa leh sisan ahikei a, mial tung a vaihawmtute, thuneihna neite leh, van munte a kha gilou omte ahi zaw uhi." Gaalzou a dah kuamah a omkei chih i theih chiatsa uh ahi.

MEELMATE MANPHATNA TOMKIM 

1. Joseph pen, a sanggamte'n kawkhuuk ah khia/ pai kei le-uh Egipt gam a mi thupi touna ah va-tou lou diing hi. Tuaziak in Joseph a diing in a sanggamte a meelma suak in, bangteng hitalezong, kawkhuuk a khiat hikei leh Egipt kiang tunglou in, mi thupi zong hilou diing hi.

2. Goliath omlou hileh David pen Kumpi hilou maithei diing ahi. 

3. Judas Iskariot in Jesu zuak in khongkei leh, sihna a kipan in Jesu thoulou in, eite a diing in hutdamna hung puaklou maithei diing ahi.

Sanggam aw, kuate'n nang hung panpih a, ahihkeileh nang lam a pang kua teng e? chih leh nang hung dou a, hung langpante kuate e? chih tawh kisai in lungkham kenla, Pasian tawh na kaal uh a bitlouh diing thute ngaihsun zaw in. Meelmate pen, i lawhchinna diing ua a lampi sialte ahi uh hi. Na meelmate zawh in om kenla, ama'uhte zouzaw in, tuachiin ama'un nang dinmun saangzaw ah a hung tut diing hi.

Na meelmate muhdah bawl nawn kenla, itzaw in, ama'uhte omlou in bangmahtan tunglou diing na hi. Na tukna diing mun pen na meelma doudan a ki-nga ahihman in, 'Na meelmate it inla, nang hung bawl gentheite thumsak in." (Matt. 5:44). 

Toupa Pasian In Thupha Hung Peta Hen

Share: