Marina Mate Delhi ah Covid19 natna in mualliam

NU NENGNEILHING MATE DELHI MUN A VUILEM ANA HITA

~ L. Seikholen Khongsai

NEW DELHI, JUNE 11, 2020 --- TUNI jingkah chun vangset um tah in, AIIMS Trauma Centre/COVID Ward a anakijen, Nu Nengneilhing @ Marina Haokip Mate (age 25) chu alei hinkho ana bei tan ahi. Amahi, tunaicha a chu naosen ana nei ahin, Delhia natong ahijeh uva aloipa toh Munirka a anacheng lhon ahi. 

Amahi ajipa hi Mangjangam @ Ngangam Mate, Laijang khopi, Churachandpur District akon ahiuve. Aman eidalhah uhi vangset umtah ahitan chule naosen sendihdeh khat adalhah jong pohnat le boujang nat umtah anahi kit in ahi. Achunnu mel jeng jong muman lou, henu tia jong kou man louva akikhen lhon hi mihem khat thoh din ahahsa behseh jengin ahi. Pa Ngangam hi alunglet lou akhoh lheh jengin ahi. Pathen in Ngangam hi thoh hat naleh gelthem theina lungthim anei theina din taona anagel doh cheh u hite.

Vannoi boina Covid-19 ward a kijen ahijeh in mijouse naithei ahipon hijongle tuni mama a koidoh lou akhoh jeh in Kuki Inpi Delhi & NCR, KSO-D, Kuki Welfare ho panlah khomna jal in boipi thei chan anaboipiuvin ahi. Hijeh chun  thini manni hijongle adam nalaichengin Pathen mingailut jal in pan anala khom  tunin chun sopinu Nu Nengneilhing @ Merina Mate long damsa chu phate kei chan Alpha & Omega Christian Cemetery, Pocket C, Sector 1 Rohini munna mi phabep in kitup keicha  le boina umlou vin along damsa vuilemna ananeijun kilom tah in ana vuidoh tauve. Mihem tampi lhan mun changjou lou lah a isopi u u Nengneilhing @Marina Mate  kitup keicha a koidoh theina dinga Lamkai pha tampi eipeh ban uva leiset mun teho jong chang theija i umu hi thina chung hijomgle thil mantan ichan nau leh ivangphat nau khat ahi. Pathen nin Pa Mangjangam (Ngangam) Mate te pacha lungmmon na in umpi jing hen, adalhah insung  mite jouse a dingin jong taonan ana gel doh jingu hite.

Hitia insunga mitsin khojin alhun tah jeh in Kuki Welfare jon kithopinan sum le pai anadong khom uvin thina le mitsin khojin tohte kithopina jong ananeijun ahi. Thi nilho le lunghem nikho a kithokhom hi mantam tah ahi. Chukeu hilou in Delhi a um Nute honjong ajokham kham in sum le pai ajokham kham in anadong khom un anakithopiuvin ahi.  Hitobanga insunga mitsin lhosun lhunnate dinga ngailutna chungnung homjal a pangho jouse jong Pathen in ajatjan lethuhna thilpha boh hen lang, insung mite singin jong Pathena Lhamon nan pangjo tahen.

via Khankhologymedia

Share: