INDIA vs CHINA

- LB Muan
22nd June 2020

INDIA leh China tawh kikal ah Border issue kum tampitak paisa (ipianma) apat ana ompen ahun teng in hong sousang sek a, tutung in hong puangzak dek hi. Hichibang a China tawh kidou guih thei didan a i om chiang un India in China zoulou di sa akoih a ana lau-gu leh thawmhau hunkhop ki om hi. Abik in pasal/ta sepaih neihkhate adin thawmhauna lianpi hon tun thei mah ahi a, tuate ading khualna a hiai kon gelh ahi.

I theih masak di ua hoih tuh China tawh India kidou bang hitaleh leng China in a sepaih neihteng India dou ding in hon tolhlut theilou ding hi. Aziak ahihleh China in Russia tawh gamgi thubuai nei ua, huai mun ah gamgi vengtu ding in sepaih hunkhop a koih ngai ding, Xinjiang Province a Uyghurs mi namte detention camp a force a akhumte enkaitu ding sepaih hunkhop a koih ngai ding, Tibet mipiten zaleenna sual a hong kiphin ding uh vengtu dia sepaih hunkhop a koih ngai ding, Mongolia tawh leng gamgi thubuai nei ua, tua ah leng sepaih a koih ngai ding, agamsung mipi kiphin dia mansate beng daitu ding a koih ngai ding,...

Tuate ban ah China mite west lam ah tamlou chik teng ua, agam uh suahlam (east) ngen ah teng zaw uhi. Huaiziak in China sepaihte supply line leh reinforcement lam buai di sa ahi uhi. China bang hetlou in India in a sepaih neih teng border ah tuahlut thei ding hi. Pakistan border lak ven zek ngai lel ding a huchilou teng galdou din zangvek thei hi. Navy in Indian Ocean ana veng ding ua, Army leh Airforce om teng in China maituah thei ding uhi.

Hiai atung a teng lungsim a koih in i suutkhawm ding...

1. LAWM-LE-VUAL NEIH HOIHNA AH
China ichih gam buaihuai ahi. Mipi vaihawmna gam hilou a, Communist Party in adeih dandan a mipite taal kaih a vai ahawm nagam ahi. China in a kituahpih luat khat le omlou a, khovel a akituahpih gam omsun chu Pakistan ahi nilh-nelh maimah hi.

China in a kiim-le-kiang a gam omte a sukbuailouh khat mahleng omlou hi. South China Sea ah thumoh bawl a pang gige China ahi. China in agam akek ut ziak in Mongolia, Russia, India, Malaysia, Philippines, Brunei, Vietnam, Japan, S Korea, Taiwan ichih gamte tawh kituaklou hi. Hongkong bang leng ahun a tun ma in force in control maimahta hi.

Hichibang a China a tatsiat ziak in India tawh kidou bang hileh a panpihtu ding Pakistan chihlouh kuamah ngah zoulou ding uhi. Alehlam ah India in khovel gam tuamtuam tawh ki tanauna hoihtak nei a, gamdangten India zahtakna liantak nei uhi.

UNSC ah Non-Permanent Member din zanzek in India telching in om a, vote 193 lak ah 184 muzou maimah hi. Hiai apat gamdang in India muang leh zahtak ahihdan kilang hoih mahmah hi.

Coronavirus ziak a China minsiat chihtak a aminsiat ban ah gam tuamtuam ten a iplah tenten lai un India tawh hong kidou leh India panpihtu ding tampitak om ding hi.

2. KISUM DAWN TUAHNA AH
India in China huchitel in poimohlou hi. Aziak ahihleh Trade Deficit liantak om a, India in a export sang in aleh tampi China apat import zel hi. Huaiziak in China in India market khaksuah ding lauh chihtak a alauh ahi a, India leh China hong kidou leh India sang in China adin dahhuai zaw ding chihna ahi. India apat kumteng a sum tampitak a luahlut zel pen mansuah ding China in laulua ahihman in China in India hon dou ngam taktak lou ding ahihdan amawl pen inle atheih ahi.

China in US tawh Trade-War nasatak nei a sumlam buaina liantak atuah lai un India market khaksuah ding lau law tet-tet a, huaiziak in hon phil ngam lehle hon dou ngamlou ding ahihman in patauh huai hetlou hi.

3. GALVAN LEH SEPAIH THAHATNA AH
Sepaih thahatna lam aki gen chiang in China hatlaw didan ngen in kikoih a, India pen hat hetlou didan a ngaihsutna ineih pen uh dik hetlou hi. India leng khovel a gam hat penpente lak a khat hisamta ahi.

Airforce lamte
Eiten Fighter aircraft ichih chiang in chikhat dan in ki ngaihsut mai a, chitampi pha hi. Lightweight, Medium, Heavy chi in kikhen a aki zatna leng tuamchiat hi...Ground Attack, Multirole leh adangdang...Tulel in India leh China in 4th, 4.5th, 4.5++ generation fighters zangtuak ua, China in 5th Gen. Fighter Aircraft neizek dan in kigen mahle uh gamdangten 5th Gan. Aircraft dan in simsak khollou uhi. Hun paisa ah Indian Airforce ten Su-30MKI radar zat apat in China te 5th Gen. Aircraft ana detect thei sek ua, huaiziak in Indian Airforce ten China Airforce te lau hetlou uhi. Tuaban ah Indian Airforce Pilot te training hoih petmah a, huaiziak in Indian Airforce muanhuai petmah uhi.

US Airforce Pilot te natawm inle Indian Airforce Pilot te siamna phalou uhi, aziak ahihleh Indian Airforce Pilot te Fighter Aircraft tuamtuam hekdan kizil ua, Pilot khat in Fighter Aircraft khat sang a tamzaw hek thei uhi. Fighter Aircraft tuamtuam hekdan a kizil chiang un theihbeh leh a siamna uh kibehlap a, tua ziak in siamna tungtuan nei uhi.

India in AMCA (5.5 gen. Fighter Aircraft) bawl lel a, tuapen bawlzou man hizawmah leh nuam diak ding hi. China ten gamdangte lenna khawng apat aguk a reverse engineering bawl a amau lenna ding hon bawl ahihlel man un a leenna te uh a muanhuai louhdan gamdangten naktheih law mahmah ua, huaiziak in China galvante gamdangten lei le lei utlou uhi.

Tuate ban ah, tu a Ladakh lak a buaina ah Indian Airforce te panmuh fuhzaw a, huaiziak in tunglam ah China ki thaneh zaw ding hi. Aziak ahihleh India a Airforce Base munte niamchik ah om uh a, huchi in galvan tampitak leh gikpi leenkhiakpih thei uhi, China te Airforce Base ahihleh munsang zaw aom ahihman un galvan gik tawh lengkhe theilou uhi.

Navy lamte
India in Aircraft Carrier a zatna kumkhua sawtlaw mahmahta a, experience le nei hoih petmah ahihban ah gal leng hunkhop ana doukhinta uhi. China in bel zanzek a zangpan ahihman un lauhhuai hetlou uhi. India sang in China in Aircraft Carrier, Submarine, Frigate, Destroyer leh adangdang neitam zawmahleh aneih teng tawh India hongdou thei ding hi zenzenlou uhi.

China in South East Asia lak ah gamdangte asuk buaibuai ziak in tulel in US in Pacific Ocean ah Aircraft Carrier 3 tak sawllut a, huaiziak in China kigal gingsa a aom ngai gige hi. US, Japan leh gamdangte dal tu ding Navy long hunkhop South China Sea lak a akoih ngai ahihman in tuipi ah kidou ding inle China lauhhuai hetlou uhi. Indian Ocean ah honglut zenzen le uhle Indian Navy in ana dalzou mahmah ding ua, tuaban ah, India in Brahmos Missile (khovel a Cruise Missile lak a hat/hoih/lauhhuai pen) nei hoih lawtel a, hiai Brahmos Missile apat gamdangte long suakta zoulou ding ahihdan atheilou omlou hi.

Army lamte
Indo-China War 1962 a China in hon bawldan pen tunitan India mipite sousang saktu ahi. India gam it tu peuhmah adin hiai kidouna akigen khak hun in a sousang lou omlou hi. Tua hunlai in bel galvan leh sepaih thahatna ah India sang in China ana hatzaw ua, India adin a didan omlou hi.

India in zalenna a ngah apat Pakistan leh China in hon subuai den ahihman un gam nih thakhat thu a dou zoulou ding kichi in India in China pen ana lauh bawl den ban ah ana mitmei ven den kha hi. Himahleh tu in China in hon simmoh luat chiang in India te lungsim a honglang pah chu "1962 hi nawnlou ahi" chih ahi. India te hatang thak tettet mai ahihman in kidou taktak le China in hon gintak bang khollou ding hi.

Sepaihte lungtang ah leng tua 1962 kidouna manglou ahihman in zanzek a thagum-thatang a border a aki beihna uah leng India sepaih ten China sepaihte nak bawl lawtel uh chu hikha ding hi. India in sepaih si leh liamzah genkhe mahleh China in asi leh liamzah natawm gen ngamlou in om uh a, US intelligence report dan in China te 35 sang a tamzaw si ding un gingta ua, Indian Army ten China sepaihte kihouna a intercept uapan 43 si ding un gingta uhi. Intelligence report khenkhat ah China sepaih 70 tunglam si ding inle gingta uhi.

Hiai China sepaih site ahih uleh border a om gige sepaih narante hilou in thagum a kisualna lam tawh kisai bang ale China in special training apiak hon tolhlutte ahi chi zawmah uhi. India sepaih naran ten China sepaih special training zoute hichia a bawl chai uleh India in a commando suan mahmahte tawh kibei khale uh China in thuak hetlou ding uhi.

Hun dang dan a India in China te lauh bawl di hon saklai ua tutung a India sepaihten China sepaihte a bawl ek uleh China khanglou guih chu abang hi. A kigendan in China sepaihte kisual dia kigingsa aom ahihman un sikchiang aling nei khawng tawh leh kithuamna hoihtak tawh pang uhi. India sepaihten China sepaihte taksa su nazou taktak lou ahihman un a ngawng uh hek a hektan sak uh hi didan ahi. Thusuak khenkhat in agen dan in India Sepaih ten China sepaihte ngawng 18 bek hektan uh ahihdan gen uhi.

THUKHITNA
Tulai khovel ah Nuclear galvan neituak kimawk dou chih om taktak nawnlou ding a, huaiziak in mawk patauh louh ding ahi. Tutung a China in border issue hon bawl leng a gamsung a mipite ngaihtuahna divert na dia hon bawl maimai uh hi ahi.

Coronavirus ziak in China Solkar tung ah mipite thangpai petmah ua, tua mipite thangpaihna betdaihna dia China solkar in agamsung ah propaganda thehzak a, "India in gam hon kek ahi" chi in zuau in a mipite khem uhi. A huchih chiang in mipiten a solkar uh iplahna hong kiam in patriotism hon nei in a solkar hon support zel uhi. China Communist Solkar in a mipite kitom zak ding lauhziak a gamgi lam a hong chezual ahi lel uhi.

UN Security Council a permanent hihna ding hon dal gigetu, Nuclear Suppliers Group a ilut ding hon dal gigetu leh hon subuai gigetu China ahi. Hiai bang dinmun ah India in pan la dia ka deih chu China in Panchsheel Agreement lah phawkkha nawnlou ahihleh India inle Taiwan leh Tibet te Independence sualna ah panpih hen la, Tibet pen China apat suakta leh Border issue veng mai di sa ahi. India in foreign policy akhen hunhun China leh Pakistan a buaise di sa ahi uhi.

Lungmuangtak in om ni, China in hon dou taktak ngamlou ding ahi. Hon dou zenzen uleh leng amau athuak khazaw a pang ding ahi uh.

Hichibang dinmun ah piangthak nailou a ana omlai ihih khak ding lauhhuai zaw hi.
____________________________
Article dang sim utzel ten hiai anuai a link ah lut in follow theih ding
https://rebuildnrestore.blogspot.com/
https://www.facebook.com/RebuildRestore/

via Social Media

Share: