GAWTMUN

GAWTMUN

By: Pastor Thangdoulal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in chibai ka hung buk hi.

Tutung a i gen diing uh ahihleh, GAWTMUN chih thu ahi a, hih pen mi zousiah phial in i theihsa uh leh i zaak-ngai uh thu zong ahi chih lungsim a nei kawm in i kikum diing ua, a tawpna ah dokna tamlou zong i kidong diing ua, tua doknate dawnna pen thangdoulal@gmail.com leh whatsapp no. 8731968532 ah a dawnna khaaktheih ahi diing hi. 

1. Gawtmun Hilhchianna

Gawtmun kichi bang e? Gawtmun pen Toupa omna leh a thupina a kipan a hawlkhiatna ahi chih 2Thes. 1:9 ah muhtheih in a om hi.

Gawtmun kichi lungsim leh taksa a thuakgimna ahi chih Luke 16:23 ah muhtheih in a om hi. Kisaktheihna thugen khenkhat ah, 'Khawi e gawtmun na chih uh?' chih dawnna pen Bible ah a om hi. Isai 14:9 leh Ezk. 32:27 ah, 'Gawtmun tungsuk khin' chih kammal muhtheih ahihman in, gawtmun pen nuailam a om ahi a chihtheih hi. Kis. 16:30-32 ah, 'Lei in a kam a kaak a, ama'uh leh a neihsa zousiah uh a valh a, sheol (haankhuk) a a hingtang a a lutsuk uh leh,' chih kammal zong i muthei uh hi.

Gawtmun tawh kisai a zonchetna a haksatna ahihleh, a gendan tuamtuam zak ahihziak ahi a, a haam diktak (original language) ah kammal thum a kizangh hi. tuate ahihleh (1) Sheol (2) Hades (3) Gehenna, hih thumte khiatna ahihleh (1) Gawtmun (2) Kawkhuuk mongbei (3) Misi khua, chihte ahi.

2. Gawtmun Hung Kipatna 

Gawtmun pen Dawimangpa leh a sawltaakte a diing a bawl ahi. Matt. 25:4, 'Nou hamsiat thuakte, ka kiang a pat paimang unla, taangtawn meikhuukpi, dawi leh a sawltaakte diing a bawl ah lut un!'

Gawtmun pen mawhna leh khelhnate gawtna mun diing a bawl ahi a, hih pen mihingte a diing a bawl hikei lezong, mi khat in mawhna leh khelhna a neih a, vaangam a tuna diing a Jesu a hinkhua toupa leh hundampa diing a saangloute zong Setan tawh gawtmun ah a paikhawm diing uh hi. Tuaziak in Gawtmun pen Mawhna ziak a hung piangkhia ahi, i chi ut uh hi.

3. Gawtmun Letdan Diing

Pasian in gawtmun pen liantak in a bawl a, tua ah mihing zong a luut diing hi chih Isai 5:14, 'Sheol in a gilkialna a liansak a, a kam tehguallouh in a kaak a,' chih kammalte tungtawn in i muthei uh hi. 

Pau. 27:20, 'Haankhuuk leh gawtmun in hunta chih a nei ngaikei ua, tualeh mihing mitte'n zong lungkim hun a nei ngaikei hi.' chih ahihziak in gawtmun pen a lian mahmah hi.

4. Gawtmun Limlahna

(i). Gimthuakna mun ahi. Matt. 25:46, 'Tualeh ama'uhte taangtawn gawtmun ah a luutta diing ua, midiktatte taangtawn hinna ah a luutta diing uh hi.' 

(ii) Lungsim leh taksa a thuakgimna mun ahi. Luke 16:23, 'Gawtmun ah mi hausapa gimthuak a a omlai in, a daaktou a, (lungsim leh taksa a thuakgimna mun a kipan in a daaktou a)' chih ahi. 

(iii) Meiphualpi mun ahi chih, Matt. 13:42-50; Kil. 20:15; 14:10; Matt. 3:12; Is. 33:14 nate tungtawn a muhtheih in a om hi.

(iv) Tanghteel, than (mihing taksa nethei), chihte omna mun ahi a, tua mun a thante pen a than lamdang, meikuang leh meisa tawh hingkhawmte ahi (Mk. 9:44, 46, 48).

(v) Lk 16:23 ah, mipa in a damlai nite a phawk hi, hilezong bawltheih a neihna hun a om nawnkei hi.

(vi) Lk. 16:27 ah, mipa in a ngeen a, hilezong a ngetna pomsak ahikei, a pomtheihna diing hun a na kikheel manta hi.

(vii) Lk. 16:24-27 ah, mipa in lunggulhna a nei a, tua pen tui dawn diing leh missionary a kuan a, a sanggamte kiang a Pasian thu gen a, hih gimthuakna mun a a pailouhna diing ua thuhilh diing ahi. Hilezong bangkim a kikheelta hi.

5. Gawtmun Hunsung Diing

Gawtmun hunsung diing pen a sawt mahmah diing hi chih muhtheih in a om hi. Matt. 25:46 ah, 'Tualeh ama'uhte taangtawn gawtmun ah a luutta diing ua, midiktatte taangtawn hinna ah a luutta diing uh hi.' chi a hihman in gawtmun hun pen taangtawn ahi a, hih taangtawn pen a beitheilou genna ahi. 

Hih pen baihlamtak in i theisiam kei maithei diing ua, hilezong Pasian in a chih ahi chiin a dik in i pom chiat uh hi. Hih tawh zawkkhawm a zung thuuktak nei mihingte pianpih mawhna ahi.

6. Gawtmun Tawh Kikalhte

Khatna: 'Gawtmun pen Pa Pasian itna tawh kituaklou hi.'

Dawnna: Pasian itna pen Bible in a kibang in a gen a, a diktatna leh a siangthouna zong a gen hi. Pasian pen omlai (balanced) ahi a, itna leh diktatna a kibang in a nei hi.

Nihna: Taangtawn gawtna ah deih a omthei diam? Khelhna zousiah tha-man, a tawpna a hung piak diing maw?

Dawnna: Khelhna zousiah soisakna pen sihna ahi (Rom 6:23).

Thumna: Mawhna khat ziak a mi khat taangtawn a gawtna pen mawhna tampi neite a tawh a kibang diam?

Dawnna: Laibu khat in, "Taangtawn gawtna pen gawtna kikim leh kibang a hi kholkei diing," a chi hi. Hilezong kei mimal ngaihdan in mawhna gawtna pen a kibang diing hi.

Lina: Gawtmun a omte kisiik leh hutdam a hithei diing hiam?

Dawnna: Hutdamna pen a omthei nawnkei diing (Lk. 16:24-27).

Ngana: Mi tatsete'n gawtmun a hawl ahih diing uh a theihlouh uh a diam?

Dawnna: Pasian zahtaakloute pen, Pasian diktat leh siangthou pa mai a kipan in a paimang diing uh hi.

Gukna: Gawtmun thuakgimnate lak ah, sia-le-pha theihna leh lungsim a chiamteh theihna pen thuakgimna chi khat ahi diing hi.

Sagihna: Sih nung chiang, ahun-hun a etkhiatna omthei lou diing maw?

Dawnna: Hih pen a omthei kei diing hi (Heb. 9:27; Mk. 9:42-50; Matt. 18:8-9, 25-46 nate ngaihtuah in).

7. Gawtmun Thuakgimna Saandan leh Ngiamdan

Deut. 32:22, 'Ka hehna ziak in mei a kuang a, haankhuuk tawta pen tan a kang hi; tua in leitung leh a sung a khangliante a haaltum diing a, mualsang ki-ngakna zungpite a kaangtum diing hi. 

Matt. 10:15; Mk. 6:11; Lk. 10:12, 'Tuate thuakna saang in Sodom leh Gomora thuakna a phadawm zawlai diing hi,' a chi hi.

Thukhitna

Bangziak a mi khat gawtmun a luut e? I chihleh, Jesu leh a thukhunte a ngaihsak louhziak ahi, Heb. 2:3, 'Hibang tazen a thupi hundamna thu ngaihsaklou a i om leh bangchiin ahia i suahtak ding uh?' chih ahi. Pau. 15:24, 'Nuailam Haankhuuk tawh kipeelna diing in, mipil a diing in hinna lampi a paitou hi.' Gawtmun tawh kipeelna diing lampi Jesu Khrist ahi.

Doknate

1. Laate 9:17 gendan a gawtmun a pai diingte kuate ahia?

2. 2Thess. 1:19, leh Lk. 16:23 gendan in, gawtmun bang a kichi a?

3. Gawtmun hung kipatkhiatna bang e?

4. Is. 5:14 in, gawtmun bangchibang in a hilhchian a?

5. Gawtmun limlahna chi sagihte gen in?

6. Gawtmun leh vaangam pen, taangtawn ahi chih bangchibang in i theithei ua?

7. Dik maw, diklou: 'Gawtmun pen, Pasian itna tawh a kituak kei,' chih thu hilhchian in.

8. Gawtmun a luut khate kisiik le-uh ngaihdam ahithei diam? Bangziak in?

9. Deut. 32:22 leh Matt. 10:15 a pat in, gawtmun pen, bangchibang in i zilkhia ua?

Share: