ANGELPUKSETE LEH SETAN

ANGEL PUKSETE LEH SETAN

By: Pastor Thangdoulal

 

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in chibai ka hung buk hi.

Tutung a i gen diing uh ahihleh, Bible a Angel puksia i chihte uh leh Setan tungtaangthute ahi a, hih a nuai a bang in i en diing ua, zil zong i zilkhiat sawm diing uh hi.

 

1. SETAN HUNG KIPATNA

Setan i chih pen, Pasian sil bawlte lak a khat ahi (Kol. 1:16 Aziak pen amah pansan a sil zousiah siam ahi a, van a omte leh lei a omte, muhtheih leh muhtheihlouh, laltouna hi in lalgam hitaleh, vaihawmnate leh thuneihnate hitaleh zong. Sil zousiah ama siam ahi a, amah ding a siam ahi). Pasian in Setan a omsak hun pen theih ahikei hi.

Ezekiel 28:12-19 in Setan a genchetna ah hibang in a gen hi.

Taang 12- Setan pen pilna a dim, kilawmna bukim nei ahi.

Taang 13- Amah pen, Rubi, Topaz, Diamond, Beryl, Onyx, Jasper, Lapis Lazuri, Turquoise, leh  Emeral suangmanphate a kilawmtak a zep ahi.

Taang 14- Cherubte bang a sathau kibuak, Angelte saang a saangzaw leh thunei-zaw ahi maithei diing hi.

Taang 17- A kilawmna leh a pilna ziak in a lungsim in a kisathei hi.

Taang 15- Bawlkhiat ahih a kipan in Gitlouhna a kimuh dong, a gamtatnate ah dem a baangkei hi.

Taang 16- Amah khial in, hiamngamna tawh a kidim hi.

Taang 16-18- Vaan a Pasian kiang a kipan a hawlkhiat ahi.

Isai laibu bung 14:12-17na ah zong Setan tawh kisai muhtheih in a om hi.

Taang 12- Amah pen Lucifer chi a sap ahi a, ziinglam tapa zong a kichi hi.

Taang 13-14- A kisaktheihna a kipan in saang pen Pasian hih diing a lunggulh hi.

Taang 15- A vaang tawpna pen, Shoel thuukna laigil laizangtak ahi diing hi.

Setan pen, vaan a kipan a paihkhiat a om in, tu a huihkhua a a omlaitak ahihdan, Eph.2:2na in hung hilh hi.

Eite a diing in Setan pen, Pasian kiang a hung lehheekpa (Job. 1:6-12; Zech. 3:1) ahi a, hih lehheekna pen a paitoulai zeel a,  Kil. 12:10na ah a taangtung hi.

 

2. SETAN I CHIH MIZIA DIKTAK NEI AHI

Setan kichi pen, tulai a i theihdan chiang bek a hikei a, sil bawltheitak leh a deihdan a mihingte gamtasak a, thununpa zong ahi. Tualeh hih Setan pen, Dawimangpa zong a kichi a, eite'n amah i theihdan uh leh ama hihna diktak pen a kigamla mahmah hi.

John 8:44 a Jesu'n Juda mi gingloute kiang ah, 'Noupen na pa uh dawimangpa a hung kipan nahi ua, napa uh deihlam na bawl ut uhi,' chi ahihman in amah zong mizia hiam hihna nei ahi.

Job 1:6-12 ah, Setan in Job a muanmawhdan Pasian kiang ah a gen a, a thunun zawhlouh diing thu a gen kei hi.

Jesu kheem a a omna (Matt. 4:1-11) thu limtak a i sim leh, Setan pen mi hihna diktak nei, meelma diktakte piltak a bawldan siam, genkhiat theihlouh meelma ahi.

Setan kichi pen, mizia leh hihna kichiantak nei, leitung hinkhua a hausatak, piltak, thanei leh phurtheitak ahi.

Hitalezong, Setan kichi pen, kha(siangthou) chi khat ahi a, aman mihing taksa a neithei kei (Mei (tail) hi in, ki (horn) hitaleh a neithei kei) hi.

NB: Setan miziate pen, nang leh kei mizia zong hithei ahihna ah kikeem siangthou ni hang in, Pasian mizia i hinkhua ua a kilat tawntungna diing in theihtawpsuah chiat ni.

 

3. SETAN LUNGSIM LEH HIHNATE

 1. Amah pen gutapa ahi.

Zaakna a kipan a lungsim a Pasian thu om Dawimangpa'n a la mang hi. 'Kua-e khat in kumpi gam thu a zaak a, tuapen a theihsiam keileh, giloupa (Setan) hungpai a a lungtang a kipawisa khaichi pen a hung laksak ahi (Matt. 13:19). Guuktaatna pen Setan a ahi a, mihing pianpih gamtatna hilou hi.

2. Amah pen zuaupil mahmah hi.

2Korinth 11:3… "Gul zuaupil in Evi a khem bangin…" Gul pen Setan genna ahi. Setan in Evi a kheemlai in, a kheemna pen zuau hilou a, hilezong thudik taktak ahi kei a, unau mizote'n thudik chanve (half-truth) a chihte uh ahi. Hih Zuaupilna pen Setan a ahi a, mihing pianpih gamtatna hilou hi.

3. Amah pen Tualthatpa ahi.

John 8:44, "…Amah pen a chîl a kipan-a tualthat ahi…" Tualthahna pen Setan a ahi a, mihing pianpih gamtatna hilou hi.

4. Amah pen Zuaudan siam mahmah hi.

John 8:44, "…amah ah thutak ah a om kei hi. Zuauthu agen in amah a kipan in ahi agen, aziak amah mi zuau ahi a, tualeh zuaupa zong ahi." Zuauna pen Setan a ahi a, mihing pianpih gamtatna hilou hi.

5. Amah pen Kheempa Ahi.

Kil. 12:9, "Tuachi`n gulpi lian pen paihkhiat in a omta a, hua gulpitek pen Dawi leh setan zong a kichi hi, leitung pumpi khempa ahi. Amah pen leitung ah paihkhiat in a omta a, a vaantungmite zong amah tawh paihkhiat in a om uhi. Mite kheemna pen Setan a ahi a, mihing pianpih gamtatna hilou hi.

NB: Setan lungsim leh hihnate pen, nang leh kei a zong hithei ahihman in nang leh nang ki-enchian inla, Pasian in na tung ah thu a nei taktak hiam chih theichian in.

 

4. SETAN KITHEIHNATE

1. Vaak sawltaak.

2Korinth 11:13-15, "…Aziak setan zong vâk sawltak in a na kibawl tawm hi!..."

2. Humpineelkaai humham.

1Pet. 5:8, "Pilvang unla, kiveng gige in om un. Aziak na melmapa uh Dawimangpa humpinelkai humham bangin, nek ding zongin avak kawikawi hi."

3.Huihkhua a thunei kumpi.

Eph. 2:2, "Hua-ah, tu masang in hih leitung dan bang in na om ua, huihkhua a thunei kumpipa, tu hun a thumang loute sunga nasempa kha deihna bang in na khosa uhi."

4. Mial thuneihna nei.

Kol. 1:13, "Aman mial sil bawltheihna a pan ahung tankhiata a, Tapa a ittak gam ah ahung lutsakta hi."

5. Dragon lian, Gulpiteek, Dawimangpa, Setan.

Kil. 12:9, "Tuachi`n gulpi lian pen paihkhiat in a omta a, hua gulpiteek pen Dawi leh setan zong a kichi hi, leitung pumpi khempa, amah pen leitung ah paihkhiat in a omta a, a vantungmite zong amah tawh paihkhiat in a om uhi."

6. Leitung Kumpi.

John 14:30, "Hih leitung vaihawmpa a hung pai ding ziak in, na kiang uah thu tam ka gen nawn kei ding hi."

7. Leitung Pasian.

2Korinth 4:4, "Tulai leitung pasian in a gingta loute lungsim mit a tawsak a, Pasian mel bakpih Khrist thupina tangthupha vak in ama'uhte asalhvak theih louhna dingin a koih hi."

 

5. SETAN LEH A NNA SEPTE

1. Valhmangtheih diing zong.

1Pet. 5:8, "Pilvang unla, kiveng gige in om un. Aziak na melmapa uh Dawimangpa humpinelkai humham bangin, nek ding zongin avak kawikawi hi."

2. Buhtak lek a Buhkheem theh, Giloupa.

Matt. 13:25, "Hinanleh louneipa a ihmut kal in, a gaalpa hungpai in buhtak lak ah buhkheem a theh a apaimangta hi."

3. Mite lungsim mit tawsakpa.

2Korinth 4:4, "Tulai leitung pasian in a gingta loute lungsim mit a tawsak a, Pasian mel bakpih Khrist thupina tangthupha vak in ama'uhte asalhvak theih louhna dingin a koih hi."

4. Pasian kiang a eite hung lehheekpa.

Kil. 12:10, "… Aziak pen i sanggamte uh hektu pen paihkhiat in a omta hi, aman asun ajan in i Pasian maiah amau ahek hi."

5. Khristiante ze-et ut.

Luke 22:31, "Tualeh Toupa`n, "Simon, Simon! Ngai in, setan in buhbang a a hung seeptheihna ding in a hung ngeen hi. Hinanleh na ginna aman louhna dingin k'ung thumsak ahi."

6. Taksa a gawtna (Mihingte hinkhua haksatak a omsakna).

1Korinth 5:5, "Hibang mi pen, I Toupa Jesu ni chiang a a kha hundam a a omtheihna ding in, a taksa sukmangna ding in setan kiang ah piakding ka chi ahi."

NB: Setan kitheihnate a nang zong hung kichiamteh maithei a hihna ah, kiveen-huai mahmah hi.

 

6. SETAN LEH A NUAI ATE

1. Setan angelte pen, kha gilou, dawite ahi.

2Pet. 2:4, "Aziak vaantungmite'n sil a bawl khiallai un Pasian in a khawi kei a, hinanleh gawtmun ah a pai a, vaihawmsak a om diing in mialna khaute in a gaak hi." 

Juda 6, "Tualeh vaantungmite a tanvou uh hoihtak a keemlou a, hinanleh a teenna mun uh nusia pen, taangtawn a gaakna siikkolbulh in mial nuai ah ni thupi vaihawmni a diing in a koihhoihta hi."

2. Mialtung a vaihawmte, thu neihna neite, vaante lak a om kha giloute ahi uh hi.

Eoh. 6:12, "Aziak i doute pen taksa leh sisan a hikei a, mial tung a vaihawmte, thuneihna neite leh, vaan munte a kha gilou omte ahi zaw uhi."

3. Mi khialte pen, Khial tate ahihziak uh ahi.

John. 8:44, "Noupen na pa uh dawimangpa a hung kipan nahi ua, napa uh deihlam na bawl ut uhi. Amah pen a chîl a kipan-a tualthat ahih ziak in, amah ah thutak ah aom kei hi. Juauthu agen in amah a kipan in ahi agen, aziak amah mi zuau ahi a, tualeh zuaupa zong ahi."

4. Peter bang in mi siangthoute lungsim zong Setan in a bawl ut hi.

Matt. 16:22-23, "Tuachi`n Peter in amah atuam in apaipih a, "Toupa, hibang sil in hung gamlat hen! tualeh hibang sil na tungah a tungngai kei ding!" chi`n a gen hi. Hinanleh aman Peter kiangah, "Setan! Ka nunglam ah om in, Kei a dingin kipalpukna nahi; Pasian silte ngaihsun louin mihing silte na ngaihsun jawk ziak in," achi hi.

NB: Theihlouh kaal a Setan nuai a omtheih ahihman in, pilvaan-huai mahmah hi.

 

7. SETAN LEH A TUNG A VAIHAWMNA

1. Mailam hun hung tung diing ah, vaan a kipan a hawlkhiat in a om diing hi.

Kil. 12:7-9, "Tualeh vaan ah kidouna a om a, Michael leh a vaantungmite`n gulpi a dou uh hi. Tualeh gulpi leh a vaantungmite'n zong a dou uhi; hinanleh a zoukei ua, a mun uh zong vaan ah muh in a omnawn kei hi. Tuachi`n gulpi lian pen paihkhiat in a omta a, hua gulpiteek pen Dawi leh setan zong a kichi hi, leitung pumpi kheempa, amah pen leitung ah paihkhiat in a omta a, a vantungmite zong amah tawh paihkhiat in a om uhi."

2. Setan in Pasian mite nna sepna a dou/daal hi.

Kil. 12:12, "Tuaziak in nou vaan leh a sung a teengte kipak un! Hinanleh leitung leh tuipi a teengte tung a gik hi! Aziak pen hun tomnoukhat a neita chih a theih ziak in, dawi pen heh mahmah in, na kiang uah a hung paisukta hi."

3. Angel in amah (Setan) a hentaang.

Kil. 20:1-3, "Tuachi`n vaantungmi khat vaan a kipan a hung kumsuk, a khut a kawkhuuk tawbei chabi leh sikkhau lianpi tawi kamu hi. Aman hua gulpi, gulpitek, dawi leh setan pen aman a, kum tuulkhat sung diing in amah a henta hi. Tualeh kum tuulkhat achin masiah a namte a kheemkiik louhna diing in, kawkhuuk tawbei ah a pailut a, a khakkhum a, a sindetta hi. Hinanleh hih silte zoh chiang in amah pen tomkhat khahkhiat ahi diing hi."

4. Kum tuul khat sung kawkhuuk tawbei ah Setan khum in a om diing hi (Kil. 20:3).

5. Hihte khit chiang in khah in a om diing a, kidouna a pang diing in mite a kaikhawm diing hi.

Kil. 20:7-8, "Tualeh kum tuul khat a bei chiang in, setan pen khum a a omna a pan khahkhiat in a om diing a, leitung killi a om namte leh, Gog leh Magog, kheem a kidouna a puikhawm diing in a paikhia diing hi. A tamdan uh pen tuipi a sehnel bang ahi."

6. Taangtawn meikhuukpi sung ah paihluut in a om diing hi.

Kil. 20:7-10, "Tualeh kum tuul khat a bei chiang in, setan pen khum a a omna a pan khahkhiat in a om diing a, leitung killi a om namte leh, Gog leh Magog, kheem a kidouna a puikhawm diing in a paikhia diing hi. A tamdan uh pen tuipi a sehnel bang ahi. Ama'uh pen leitung vailam khaksuak in a paitou ua, misiangthoute giahphual khawpi deih-huai pen a kualkhumta uhi. Tualeh Pasian a hung kipan vaan a pan in mei a hung kesuk a, ama'uh a kangmangta hi. Ama'uh kheempa dawi pen gamsa leh Kamsaang taklou omna, mei leh kaat dil ah paihlut in a omta a, taangtawn taangtawn in thuakgimsak in a om diing uh hi."

 

THU TAWPNA

Setan pen, tha neitak leh sil bawltheitak ahi a, hilezong Pasian pen haatna bukim nei leh sil bawltheihna bukim nei ahi.

Setan in a tawntung in kalvari a dem a, gualzawhna tan diing kinepna in a sual hi. Hilezong, eite pen kalvari sisan zaal a Setan tunglam pek a gualzou diing in, theihtawpna suah in a kahtouh sawm chiatzaw diing hi (Kil. 12:11).

 

DOTNA

1. Setan a puuksiat masanglai hihnate chi sagih in gen in.

2. Setan miziate chi nga in lah/musak in.

3. Setan lungsim leh hihnate lak a poimawh nasak diakte, chi nga in gen in.

4. Dotna thumna ngaihsut in, setan mizia laau-huai pen khoi pen e? Bangziak e?

5. Setan kitheihnate, na theihdan a gen in a min chi giat pia in.

6. Setan nna septe, chi nga in a min pia in.

7. Setan nuai a omte (Setan assistant a pangte) kuate e?

8. Hilhchian in: Jesu hinkhua a kipan leh nungzuite a kilepmang theihna diing ua Setan thugen theihdan.

9. Kil. 12:7-12 leh 20:1-10 a kipan in, Setan suul nung leh a sil tupte gen in.

10. Bang khelhna in mihingte dawi leh setan a hung suaksak e?

Na dawnna uh, thangdoulal@gmail.com ah khaak/thot un.

Share: