ZU-ZUAH KHAAM APHATTUAM EI?

~ Major Muanpi Zou

INDIA north east state te lah ah Assam leh Meghalaya te'n dry state chi pomlou in agamsung uah Zu-zuahna te phalpiah in tuami te jiah in a state uading in REVENUE hoi mama khat suah thei hi. Hinanleh Mizoram leh Manipur te'n tuabang in bawl utlou in dry state chi'n kiphuang ua, state sung pumpi ah Zu zuah phal ahisih a, tambang te'n phattuam louna tampi nei hi.

Manipur leh Mizoram pen DRY STATE chi ahivang in Zu kimu pungpang lou china hituanlou hi. Adihtah a gen ding in dry state loute toh kibang a bailamtah a muthei in a um veve a, hinanleh akikhiah na pen ahileh  state dangte  ah WINE STORE um a, dry state te ah tuabang umlou in BLACK MARKET dan in pai a, tuajiah in Zu mantam mama a, adon te'n lah ngawl mama tuanlou ding ahijiah in illegal trade hing um a, transport te tungtawn in zu khu state tuam2 te apat in alom2 in aguh in hing puah ua, aguh in kizuah a, aguh in kilei a, aguh in kidawn a, langtang tah in khamjing veve uhi.

Etsahna ding in Assam state govt in jan-june 2019 sung in zu zuah apat REVENUE Rs 824.92 crore mukhia a, tualeh Meghalaya in kum 2019 sung in REVENUE Rs 260 crore mukhia a, tambang sum kimute apat in state govt adding in phattuamna tampi tun a, tualeh alamkhat ah nasepna petu (employment generation) khat jong ahi. Manipur pen centre apat chilou adang muhna um senglou hi.

Zuzuah ahoilouna tampi  ithei maithei uhi. Hinanleh zuzuahlou ahoilou nate tamzo mama ding ahi. Etsahna ding in Manipur a zu (local zu te chilou) khu langtang tah in kizuah lou a, aguh a akizuah jiah in aman ahip thum/hipli in tam a, tuate pen assam leh Meghalaya apat hing kipuah ahia, tuami pen akileina state govt ading in phattuam mama a, hinanleh akizuahna state adin manna liantah ahi ban ah, mantawm tah a leithei khat mantam tah a state govt adia bangma a panglou a kilei jing veve khat suah hi.

Lamka dinmun adin entalei:- guwahati leh shillong a BLENDERS PRIDE whiskey bottle khat 750ml te Rs 450/- vel a kilei khu, Lamka ah aguh in Rs 950/- lah vel man a, tami pen kitheipi neite rate ahia, tuachilou in Rs 1200/- velin kilei zel hi. Tuami jong dei hun2 in kimuthei lou nalai hi.

Manipur state ah Zuzuahna kikhamlou hitaleh, zu dawn te ading in zuman akiman mama ding a, bazaar dung ah WINE STORE um henle'n, naupang kum 18 nuailam te kung ah zuah oilou ding kichi henle'n, zu leiding phot in aadhar card kitoi chiat henle'n, apoimawh leh zu donna munding bar chite bang um henle'n, tami pen state govt in phalpiah taleh, Manipur gam pen tambang a zawng talawm lou ding ahi. Tam pen Christian dan toh kituah lou ichi maithei, hinanleh Meghalaya state khu eite sang a jong Pasian lam a nasatah a hatzawh uh ahia, hinanleh agam uah langtang tah in zu kizuah a, adon te jong pilvang mama uhi. Tambang hitaleh tuitha luipang, munsip chinteng a zudon sang in bar ah koipou in hun nuam zang nuamchiat ding in gintat huai a, tuabang hun izat napen jong govt ading a sil phattuam khat leh adon te ading a jong thoveng khat hiding ahi. Koipou pilvang chiat jodi'n tahsan huai hi.

Silbang kim ah eima sie leh pha theina ahi. Zu kizuah akiphal lou jiah in adon ten mantam pipi a lei in don veve ua, tahsap lawh hial uhi.

Tun jong igam ah TALAB, SHIKHAR leh KHAINI te masang a Rs 20 mante tun Rs 100 amanta a, tampen bangma dang jiah hilou, akikhaam jiah ahi. Aneh ding te'n lah ngawl tuanlou ding ahijiah un, bangma khaamlou kei in kizuah leh anete'n sum tampi save ding ua, tuapen a innsung ua ding in phattuam ding a, lamkhat ah tuami alei jiah un govt kung ah jong REVENUE tampi muhna hiding ahi.

TUAJIAH IN IGAM UAH ZUZUAHNA KHAAMLOU IN UMLEH MIPITE ADIN PHATTUAM VA'N, GOVT JONG HAUSA DEUH VAN, MUH BAILAM, DAWN THOVENG LEH ZAUTHAWNG DING BANGMA UMLOU KEI IN PILVANG TAH A KHANGTOU LEH CHANGKANG NA KHAT HIDING IN NA GINGTA EI!

-:(54-05-2020):-

Share: