Interview: Zolengthe

Zolengthe toh Zogam Today Houlimna

EIMI Social Media lama fel vawt a kithei, tangval lungsim siangthou, uniform toh kum 10 val bang kithuam hita, Ukhrul a um, unau 4 (P3+N1) lahah nautum ahi. Ama khu "Connecting the Zo People" kichi toh kituah vawt achi uh. Mi 12,000 val nitenga "news" tatlou a supply zou gige. Thau kap sa'ng a news kap siamzaw, a chi lai uhi. A houpi theihna hun lemchang kimu kha zenzen.

Zogam Today in ZOLENGTHE WhatsApp Group 48 tah a ADMIN hina pawtu, Mangminlian @ OWEN MANG MUNLUO toh Bruce K. Thangkhal, Joint Editor, Zogam Today, SUNDAY -- 17 May 2020 nia a houlimna uh tam anuai a bang ahi.

ZOGAM TODAY:  Zolengthe Adminpu, hinate maw? Zogam Today apat hing ei, nang toh ki-interview lei chi utsim ka vele, na man diai?

ZOLENGTHE: Aw hi mang ei. Man e, man e. Kipahuai eleh.

ZT: Zolengthe WhatsApp Group ah Admin bangzat na pha uai?

ZLT: Zolengthe WhatsApp Group 48 tan akipha a, Group khat ah Admin 3/4 vel ka um uhi.Tuana Admin khen khat group 3/4 vel a pang na um a ahin abon a apha zah ding chu 2x48=96 vel ka pha ding un ka gingta.

ZT: Zolengthe WhatsApp Group (Connecting the Zo Pepple) ang kipat dan them khat nang genthei diei?

ZLT: Za umtah Pu T. Zamlunmang Zou @ Pupu Zou in amasapenin ZOLENGTHE SMS Gupshup news ana pankhia a, tuazaw in Zolengthe Facebook Group hing bawl in, tuanah kei zong Pupu Zou toh kang kithei ua, ka active dan leh online mun dan banah i Zou group ka ngainat dan hing thei in Zolengthe FB Group enkai din Admin in hing koi hi. Tuazaw in Pupu Zou in ZOLENGTHE WhatsApp Group hing bawl kia in Admin in hing koi kia hi. Tuachin theitawp sua in ka pang chenchen hi tutan in.

ZT: Tuni tanin Zolengthe in Group leh Subscriber bangzat nei?

ZLT: Tutan achu Pasian mapui na toh ZOLENGTHE WHATSAPP Group 1-48 pha ta hi. Member phazat ahileh group ah 256 aphah na zong a um a, 257 apha na zong a um hi. Ahin ZLT group a last 48 pen khu group dang teng a full zia in 07 May 2020 in ki-create tha pan in tami kigelh tan in member 105 pha hi. Group khat a 256 member in koi lei, 256 X 47=12,032 pha chi thei phot hi. Group 48-na pen full nailou ahi chia sim da phot vai.

ZT: Adminte sum-le-pai bangchi ki-manage?

ZLT:  Admin ten Zolengthe apatsum muna kinei lou u, zong sum mu na dia kitum tuan lou hi. Admin ten ka netpack ding uh kaki thun tom zel uhi. Ahin khatvei teng ZLT member mi phattuam ngai group ngaina ten ka netpack ding ang thunsah hun zong a um zel sam hi. Amaute Pasian in gualzawl touzel ta hen.

ZT: Zolengthe Group adi'n One Day or One Month ah sum bangzat bang na sengpha di uai?

ZLT: Group adin sum senna chi a tuam in a um sih a. Netpack thun dan in kingah ding hi. Admin khenkhat in netpack 1-month-te athun zong um ding hi. 1-month thun ten 1 month price zat aseng ding ua, ken chu 3-months adi netpack ka thun ziahin Rs 500 vel ka seng zel.

ZT: Zolengthe tatlou in na update zou ua, bangma asia-apha zakha vateh lou uh maw?

ZLT: Asia apha ki zah zel ma hi. Ka group et kai dan leh hun chin a thutha news ka member-te ka pia thei zel zia in member ten "pha" hing sah zong um a, member khenkhat in bang kaki mulem kha ule i group uh bawl hoi mama uteh chin singpi dawnna ding hing pe pawl zong um. Tualeh sil mang sah te vel, mi chimoh sisan poimaw vel, si suunna vel i post pia chiang kipahthu hing gen zong um veve.

Ase lam kizah dan ahile khenkhat inlah Admin nahileh kifuh sah maw nangpa, ki popular sah ut man a Admin a pang chi vel kiza mun mama. A group a nungah hoi asah teng ahoupi chi pou a hing na dem zong lah tam ei. Tami tungtang a hing hilchian vanglah vang, nungah hoi kisah zia kihoupi hilou in pasal aguh a numei lim leh numei min gel member khenkhat a um a tuate ka check chiang in nungah te bang va houpi kha zel ma ka hi. Huchia nang dem ut teitei ule hichin gen mei vang, tangval kahi zia nungah ka houpi ma ahi, hehehe!  Atah tahin a kibuai toh news typing ding tam toh kinaw angai toh nungah houpi na di hun zong nei ngai sing ei. Tualeh member khenkhat apat inbox zong en man ngailou kahi, guai! Tualeh Admin ten na request-te uh ahun banga hing kibawl sah man khalou chiang, hing na theisiam un, ka buai laitah uh toh kituakha ahi chi hing na theipi un chin kang ngen ut hi.

ZT:  Police Case or thubuai chivel tuokha ngai samlou?

ZLT: Facebook ah chu na kituah kha in ka thei a, WhatsApp ah chu khat vei UNC Blockade lai in VDF-te thu khat aki post a tuami zia in Ccpur Police Station ah Adminte hat in ka um uhi. Tuana unaupa Suanlyan Tungnung leh unaupa Khams Zotal in Zolengthe ngainatna toh Adminte sih-le-tang in ana pei ua, a buaina thu kei hing dong un a source ka piah ule buaina veng thei pei vanglah hi.

ZT: Zolengthe in 12th Anniversary & Multi-Academic Awards 2019 a bawl khu'n bang tup-le-ngim nei?

ZLT: Zou sung banah Lamka context a eimite lahah lam tuamtuam a siamna leh pilna nei banah Zou sung ma a sil ana pankhe masa eg. Film, Motion Picture, Pastor masapen chite kitawisang ut zia a Award kisai ahi. Eimi tawisang dia kilawmte tawisang ding chi ahi.

ZT: Mabanah Zolengthe Award sai na sawm uaile?

ZLT: Ahithei leh maban ah kum 2 hal vel a bawl tou zel ding in kaki sa sim uh.

ZT: News na bangchi collect uh?

ZLT: News collect dan ahileh atangpi in keima theite ka post zel a tualeh mun tuamtuam apat ka mute uh zong ka post zel uhi.

ZT: Zolengthe Admin lahah koipen khu'n over-all incharge puo?

ZLT: Over-all Incharge puo leh group teng en kaitu chu keima hisam ing. Admin teng lahah kei chou in group a full chia atha ka bawl zel a, group 1-48 tan ah Admin in ka um suah hi.

ZT: Bang ziah nang, ZOLENGTHE 1-48 tan a um suah namah? News-te Admin dangte post din pethei lou namah? Group tawm join lechin na phone in zong hing thuah deu din ka gingta.

ZLT: Masang in zong hichin ka bawl ua, News post na di Admin Group ka bawl un tuana news kagel zou chiang ua ka post un, admin ten amau group chiata ana post sawn zel uhi. Ahin Admin online lou ten news mu ha kha zel uhi. Member ten ZTL news timing kibanga amu theina ding uh deina group tenga um suah in, keiman news teng ka post zel hi.

ZT: Zolengthe in Guidelines nei maw?

ZLT: Guidelines point 21 tah ZLT in kinei, a bawtsete warning piah masah hi in azop ule  "remove" chetchet!

ZT: FAKE News toh kisai in thubuai na tuokha ngai uai?

ZLT: Zolengthe in tutanin fake news kisuah kha nai sam lou hi. Adminte ki pilvang mama.

ZT: News itemte na kapkhiet masang un "cross-checking/verification" na bawl uai?

ZLT: Ki bawl tham e. Ki kankual masa, a kithei chiang chia kikap khe pan hi. Khenkhatte banga group dang a imu tengpi kanchian loupia kimaw forward ngam lou hi.

ZT: Social Media ahoina leh ahoilouna point 3 hing kum voi?

ZLT: Ahoina:- 1) Lawm luite toh lawm thate toh kimeltheina hing tun. 2) Govt or any organisation tunga lung kimlouna press-te kunga vatai man lou chiang in social media a thezaah thei hi. 3) Information --- video, voice, photo, text --- awlsam ta in kishare thei. Thu thate kithei zel. Ahoilouna:- 1) Fake account zang a group chin teng a kipil sah deu a mitoh kiselna kihauna lam zang tam, mi sutuo, nam sutuo tam. 2) Social Media ah kikhemna tam. 3) Hun leh sum kiseng.

ZT: Biahinn sunga mobile pua lut pha nasai, phalou?

ZLT: Biahinn sunga mobile pua lut hoi kasa a, ahin silent in koi thei chiatlei hoisem va chi'ng, azia i Biahinn kai kal in thukin um le kihil theina ahi zia in.

ZT: Khenkhat in mobile phone khu Bible etna/simna bang in a zangh ua, pha nasah naile?

ZLT: Bible etna a i zahleh hoi mama hi. Azia Bible sim tam in i lungsim zong siang sah hi.

ZT: Social Media zangh in i society uh siemphat thei dan a umthei diei?

ZLT: Um thei ta luo, i Society sung ua hoilou i sahte uh social media a phuang khe zel din tuaban a i society uh hoina ding ngaidan i neite gelkhia in social media a viral sah zel lei mi tampi ana sim ding a tuate ahoi lam kigen kha teng zui sawm chiat lei i society u hoi mama ding in ka gingta hi.

ZT: Social Media tungtawn in Government in gamsung khantouna dinga development scheme tuamtuam apiehte khualchin thei ahi diai?

ZLT: Khualchin thei e. Hoi deu a atheisiam te'n tam scheme te govt in hichi dan ding a abawl ahi chin hing gel khe hen len mipi thei ding in kap zah le koipou in development scheme te ahi di bang tah in asai tuten abol na uai chi koipou in hing thei ding uhi. Aki bawlnate kipahna thu mipi'n social media a hing post uhen len ahi di bang tah a peilou or kibawlloute zong social media ah hing phou khia uhen len i CM-pu kung tan deng thei din hoideu in English leh meitei ham bang in gel ule hoi ding in ka gingta hi.Tulai CM-pu loi zong social media lunglut le ngaisang ahi ta ua social media tungtawn in ki khualchin thei ding hi.

ZT: Social Media zangh in "corruption" bangchi'n i doudal thei di uoi?

ZLT: Tampen atung a kagen dan toh ki bang sim hi. Social media a kapzah ding CM-pu teloi tanpha mu thei dia bawl ding hile Action ki la mei din, koiman corruption bawl ngam nawnlou ding hi. Tulai i Govt uh zong nidang lai toh kibanglou in mipite lungkimlou nate hing ngaikho deuta in ka thei hi.

ZT: Tutung Lockdown ziahin Biahinn kai theilou in kium a, tam khu bangchi'n na geel ei?

ZLT: Tampen khu ase seng in ka gelsih. Govt in natna kilawsawn gang mama khat toh kidou gige ihi zia un tuami apat iki venna dia abawl in mipi ki punkhom di aphal lou zia in ka thei hi. Eite adi ma a abawl ahi zui din hoi kasa.

ZT: Tutung buoina Coronavirus/Covid-19 ah Manipur Govt panlah dan pha nasah nai? Gen nuam na nei ei?

ZLT: Ing, hoi kasa. Lockdown ziah in van man akhang chin mipi aphun na aw aki za a, Govt leh Social Organisation te'n mipite khualna in enkai tou zelleh a dei huai.

ZT: Covid-19 douna lamah eimi philantrophic organisation tuamtuamte panlah dan uh pha nasah nai? Tachi deule chi, na nei ei?

ZLT: Pha kha sa hi,Tualeh tachi deu le chi ding khu i sil hoi bol te top san lou in pangtou zel vai..

ZT: Sepaih ang chi ua, bang pen na hia? Tangval or....?

ZLT: Hichu hi nimnem sam Pasian lunsiatna toh.6th Bn Manipur Rifle a sem, ka Hqtr/unit uh Ukhrul a posting ka hi. 2010 kum a lut ka hia, training kazaw apat tamun a um. Manipur State force akihi dungzui in Govt office lian teng kou ka guard ua, tualeh MLA, Minister, DC chite vel zong kou guard ngen ahi. Tualeh Election um chiang in zong kou ma duty in polling station teng a ka kuon uhi. State dang ten election anei chiang un security kining chinglou vel chia Manipur Govt kunga ngetna anei ua tuana kou MR-te leh IRB-te state dang a ka kuon zel uhi. Zi ding zong Pasian kunga thum pumpum in ka pang.

ZT: Bangchi bang mi na mitsuan aa?

ZLT: Innkuonpite hindan hingthei siampi thei ding, Pasian lam a hing pui thei ding numei khu ka thumna ahi. Mun tuamtuam a ki-um koikoi in i dei bang tuokha hah mama sa ve'ng aw. Numeite lungsim thei hah nalai, buai dap sim ing ei.

ZT: Bangchih vel chia Biahinn dahsat di na chi eile?

ZLT: Ahun ding gen ngam huai sih Pasian khut ah ngansia mai leila.
Van a Pa'n ang piah chiang Biahinn dah hing ging ta ven, chi'aw!

ZT: Atangpi'n dah bangza a thou, dah bangza a imu? Phone zan dah bangzah tan na khoi zel?

ZLT: Tampen ka sepna a ka um chiang in Duty timing zil in ka lum zel ka thou zel. Duty zingkal bei tah a ka nei le lumbei in ka thou bei hi. Duty zaan sawt nua a ka nei kha leh lumha thouha hizel. Duty i fulfill leh tung aten zong hing theisiam mama uhi. Inn lang ka um chia chu no timing hizel! Phone pen ka imut lou a nasep di um lou le battery um tan ka khoi himai. Ahin sep di pawimaw vel kimawl hun vel chia chu ka phone ka koi khia sam hi.

ZT: Mobile games na kimawl ngai ei?

ZLT: Zolengthe Group tenga Admin kihin games kimawl manna ding hun kivang hi. Member-te ZLT news na ngah zing ding uh chi ka gel chia group a news post lou di kaki awi sih hi. Tuaziah in news ma ka sui ka buaipi zaw hi.

ZT: Zolengthe in Mobile Apps (application sofware) nei sawm lou ama?

ZLT: Tam khu technical leh sum lut ding ahi chia, Adminte ka kikup  ngai di uh. En tou zel lei maw!

ZT: Zolengthe toh kisai in na boss or senior te'n ahilouleh mi khenkhat in gen-leh-sah a hing nei kha ngai ma? Ang kiphaw kha ngai ei?

ZLT: Tutan in chu Zolengthe leh mipi adia kapan lah dan pen ka innsung mite hileh mi tuamtuam in gen leh sah hing nei lou un hing kipahpi mama uhi. Topsan in chi sa'ng hing hapan in hing chizaw uhi. Ahin ka sepna a ka senior ten Mang pen imu teng a mobile chouh khoi gige...duty azoh leh potlou in a lupna a mobile khoi in um, a hoi mama Barrack Santry (Room Guard) lah hikom chin kizen hing sah mama uhi.

ZT: Member apun laisia, Zolengthe group zong kibelap touzel ding ama?

ZLT: Tami khu gen hah vawt khat ahi. Zolengthe News buaipi leh a post-tu leh group bawl zeltu kei ka hia, khat vei chia ka phone in thuah sihle group bawl tou ding hasa ding hi. Phone hoi a RAM tamte vel kinei zou lechu group bawl toutou zong pawilou hi. Phone a kingah chi mei vai.

ZT: Adminte adin bang ahasa pen ei?

ZLT:  Hasah neuneu kituah mun thou veve. ZLT in Partiality -- panpi/ deisah/ hut tuam -- neilou in nna kisem hi. Ahasah mama chu tribe level orgainsation toh kisai thusuote post chiang, khat in hoisa  khat in hoisalou. Demna leh kigii simna bang hiuhiau a kamsua bang kiza hi. Gitlou khu gitlou a thuh ding ka ut sih a, ken koima ka dem sih hi. Ang kidem le hatna hing petu in ka la a,  kakipah zaw hi. Tualeh data i "ON" chia group tam sengseng ka WhatsApp kholzou zel hi. Tuami ngah sung zong hasa kasa, koima theipilou in. Breaking news thakhat a tampi ang um chiang English/Meitei apat eiham a kin-le-buang ahing lekhiat (translate) vevaw pen khat vei teng hasa vawt ei!

ZT: Tami interview simtute din bang na vaiha nuam ei?

ZLT:  Koipou in thutah peipi vai, silhoi bawl lam ah kidem chiat va ui.

ZT: Pu Admin, interview-na hun nang zatpina tungah lungdam ung.

ZLT: Keibang leltah mi adia bangma zong hilou keisang a chinzaw leh pilzaw mi tampi laiah tambang a i gam ua i Zou daily newspaper minthang leh piching mama Zogam Today te'n houlimpi dia deisahna nang pia zia un kei zong Zogam Today tungah kakipah mama hi. ZOGAM TODAY damsawt hen!

Courtesy: Zogam Today [20-05-2020]

Share: