Interview: Miss Ngaiboi Haokip

TAMIL NADU khawpi Chennai a kum 10 asim ana um nungah fel mama, a nasep komkom a Bible pumpi khut in ana gelh khesuo hi.

Tam ngahnu ahileh Tuibuong S. Canaan Veng a teng ex-serviceman Mr Ngamjang Haokip leh Mrs Kikim Haokip-te taa numei 7 leh pasal 1 lahah a 5-na ahi.

Education lamah graduate ahi a, tulel a Villivakkam muna um, Retail khatah Store Manager a ana sem, pumpum in Bible pumpi a khut liulieu in 8 months leh 15 days sunglah khawllou'n ana gelh hi. June 2019 a kipan March 2020 a zou.

Kuki Students' Organisation (KSO) Chennai ah zong Social & Culture Secretary, 2010-12 leh Treasurer, 2015-16 ana tu ngai hi.

Ponthotah a Bible khuta ana gelhtu Miss Ngaiboi Haokip toh Mr Bruce K. Thangkhal, Joint Editor, Zogam Today houlimna tam anuoia bang ahi.

Zogam Today (ZT): Amasapen a interview thei dia phat nei pe jehin kipahthu ka hin sei'e.

Ngaiboi Haokip (NH): Kei jong kakipah'e Zogam Today ten neihin geldoh jeh uvin.

ZT: Bible pumpi khut in na jih chai e ti kana ja'n, iti na kipat a, iti a na jih chai?

NH: June 16, 2019 apat kana jih in Pathen lungset jalin March 2, 2020 in kana chai e.

ZT: Nikhat ah pungkal ijat tobang na jih a?

NH: Office natong kahi jehin anisim in kana jih man pon, phat ong kanei kahkah bou leh kajihji ahijehin nikhat a pung hijat ti vang hi aum thei poi. Ahin ka free phat ahilou leh office kache lou ni teng leh vang chun kajo chan in kana jihji e. Chuleh office a ka free teng jong leh kana jih jing in ahi.

ZT: Bible khut a jih soh di tih lunggel hoia hung kon ham?

NH: Keiman jih di tia kana gel jeh a kana jih ahe.

ZT: Bible na sut masang in ipi na geel/plan em?

NH: Bible hi apum in khatvei beh kisim lha leh ti kana gel in ahi. Hinlah sim jong chu apha na'n hiche sang in chun eima khut a kijih chai leh ti hi ka lung a ahung um in, hiche jeh achu kana jih pan ahi. Chuleh timeframe ema jong kana ki plan pon ahi. Ajeh chu achung lang a kasei bang in tohna kinei ahijehin timeframe plan ti chu aum thei poe.

ZT: Bible na jih laichun ipi hasa or chol umpen em?

NH: Genesis khu hahsa kasa pen'e. Ajeh chu kipat til jong ahin chuleh a Bung a Chang jong atam in ahi.

ZT: Na favourite Bible verse ipi?

NH: Joshua 1:9: "Hat in lang hang in." Joshua 24:15: "Keile ka insung miten vang Pakai kinjeng kabol diu ahi."

ZT: Bible: Genesis apat Revelation chan na simso tam?

NH: Bible kana jih masang chun New Testament bou kana sim chai man e. Tun vang kajih chai apat kasim jing lai ahi.

ZT: Old Testament leh New Testament a ipi na sim nom pen?

NH: Old Testament a sim nom atam in hijong leh hiche ho lah ahin Psalms hi kasim leh nom kasa pen'e. New Testament adin Ephesus hi sim nom kasa e.

ZT: Bible a na favourite person - pasal leh numei ah - koi ham?

NH: Joshua leh Ruth

ZT: Bible sunga mi na vetdah um am?

NH: Aum poe.

ZT: Tuchung Coronavirus jehin Sunday kikhop a umlou, iti nagel em?

NH: Kikhop theilou hi egel leh lung kidan jong aum in.

ZT: Church a na ki-involve ngei em?

NH: Kum phabeppi vang ache tan, Manipur ka umlai in Sunday School Chapang neo lang ho teacher in kana pang kha e.

ZT: Church ah mobilephone polut pha nasah nam?

NH: Pohlut chu tulai alou theilou ahin adeh a City a um ho din, hinlah kikhop sunga man vang pha kasa poe. Chuleh kikhop sung lah a mobile man a Bible sim sang in Bible tahtah joh kimang khu ka ngaisang e.

ZT: Mobilephone phatna leh phatlouna point 3 cheh hin seipi in?

NH: Mobilephone hi tulai a dia call boubou a ahita pon thildang tampi a jong phachom ahe:- (1) Communication (2) Online Education – Study, Certification Course, etc. (3) Apps – mobile a apps tamtah aphachom aum e. Mobilephone phatlouna:- (1) Phat suhmang a pang (2) Sum lutna tam – recharge, phone upgrade (3) Phone manthem lou jeh a kinahna jong tampi asoh e.

ZT: Smartphone in khangdong (Youth) ho lungthim a suhset in nagel em?

NH: Thil kiti hi eima man dan in apo in ahi. Tulai hi evet leh nasatah in phone jeh a boi ahilou leh career jong nasatah in asuse in ahi. Internet ahung um toh lhon in tulai Content phalou tahtah jong aum in, khangdong ho lungthim jong asuh set da pon ahi.

ZT: Tulai gollhang nunga ho a pengtha leh pengthalou koi tamjo din na gingcha em?

NH: Hiche vang hi kaha sei thei poe. Ahin masang lai achu numei joh deng chang joh a ana kihe ahin tulai vang aki khel tae. Pasal jong numei sang a pha tahtah aum da poe.

ZT: Bible Reading/ Writing tiho sang in social media -- Facebook,  Instagram leh mobile games (PUBG) ah khangdong tamtah in aphat asumang taove, iti nagel em?

NH: Social Media chu phamo ahi pon, ahin social media boubou a phat mansah sang in tam hih jong leh Bible hi anisim a Chapter 3-4 beh hi kisim thei leh kati e. Chuleh ejo tho a ahileh jihtho jong hi thil phatah ahi ajeh chu khangdong lai a hi etha jong hat chuleh phat jong kinei jo ahi.

ZT: Sunday Worship Service ah Bible choi ho sangin Mobile choi ho atamjo e kiti, ipi jeh hidem?

NH: Achung lang a kasei bang in mobile jong chu avoid bol thei ahi pon, hinlah atam jo hin Bible app aum jeh a hi kichoi ahi dem tin ka gel e.

ZT: Chennai a ipi bol, na umna sotta?

NH: Boina [coronavirus] ahung um masang a chu Retail a Store Manager kahi e. Chennai ka um nahi kum 10 vel ahi tai.

ZT: Ipi Church a na kikhop ji, member ijat vel, chule Pastor koi?

NH: Church of Christ a kaki khop ahi. Church member hi mi 70 ho vel ahi. Pastor hi Pauchinen Guite ahe.

ZT: Tuchung "Lockdown" sung khu na boi uva, kithopina na mu uva?

NH: Pathen lungset jal in nehleh chah vang tuchan in ema boina aum poe. Kithopina jong ema kamu po uve.

ZT: Bible na jidoh na kon ipi na phatchompi em?

NH: Bible esim maimai sang in ejih tho leh akiha hetbe jo in ahe. Chuleh ki by-heart hih jong leh e lungthim ahin tamtah akiching doh e.

ZT: Gampam a um numeiho khu Facebook dungah demna akimuji in, iti nagel em?

NH: Hiche vang hi kaha sei thei beh poe. Seiset thei jong um himai thei intin, hinlah gampam um jeh a numei jouse jong seiset thei ahi deh poe.

ZT: Manipur ah Christian houbung chomchom ho khu ibawl a ki-vist (pulpit exchange) tohbe ngailou uh hidem?

NH: Hiche hi lunggel hi kibah lou jeh hinte tin ka gel e Christian cheh kihi jong leh. Chuleh Bible kijui cheh hi jong leh dan chomchom kinei ahi jeh ahi hinte.

ZT: Eimi Christian ho ipi na ponatpi pen em?

NH: Christian cheh aki hi vang in ki ngailutna hi aum ding bang a um theilou in ka gel e.

ZT: Chennai khopi khu Northeast numei ho din "safety" hinam?  Houset engdai tiho na toh khaji em?

NH: Chennai hi keima experience dan in safety dan in kamu in tuchan in Pathen lungset in ema incident ahilou leh engdai tiho hi ka toh kha nai poe.

ZT: Gampam a um ho din ipi hasa pen in nagel em, nei seipi thei dem?

NH: City a um a chele vale hi ahah pen e adeh a numei din.

ZT: Eimi numei gampam pot nomho ipi na seipe nom em?

NH: Gampan pot chu boi kasa pon, hinlah pao dan leh hindan chih thei jep angai e. Kitup tah a hinkho man angai e.

ZT: Na Handwritten Bible khu hoilai or koikom a na koi gut?

NT: Ka sei thei nai hih e. Kei iteh ka hung pot doh ding ham ka sei thei lou ahi jehin.

ZT: Mother's Day toh kilhon in Nute ho ipi na Wish nom em?

NH: Nu kiti thu cheng loupi dan hi ehet soh diu tahsan aum in ahi. Mi jouse'n engailut dan uhi ekipani hi hen damlou hasatni hijong leh egeldoh masatpen leh akou masat pen chu "Enu" ahi.

Numei dia "NU" kiti title hi aloupi dan chu numei jouse jong chang ahi deh pon, achang kha ho hi mi vangpha tah ahiuve. Hijeh chun Nu kiti title hi kiletsahpi leh kithang atpi tah a nei ho chu minu nunnom ahiuve.

Insung a Minu akitup leh Insung chu achom lou a nom jeng ahi. Nute pha atam leh Society jong achom lou a pha ahi.

Nute jouse'n "Hiche Nu" ahi na poimo dan geldoh jing leh ti hi ka wish ahe. Chuleh Pate leh Chaten Nute loupi dan he hen lang Nute hi jatah in kibol leh Pathen jong lunglhai mama din ka tahsan e.

"Numei jinu pha chu ajipa ding a lallukhuh ahi jengin, jum le jamo boldoh nu vang chu ajipa dia agu achang monsah tobang ahi." - Proverbs 12:24.

"Mivaicha te hu-nan akhut Anhang  jing in, angaichaa umte jong akithopin ahu jing e." -  Proverbs 30:20-21.

Hitobang numei hin a insung ding a buhbang hung lhah ding jong aging pon, a insung mite abono chan ponsan vamleh in atom in hijeh chun alung monge.

A Very Happy Mothers' Day! 😊

ZT: Hichi interview simho ipi na advice/ encourage nom em, nei seipi thei dem?

NH: Nache na lamlam a Pakai jeng phongdoh-in, chutileh Ama'n na lampi jouse nasem jangpeh ding ahi e. Chamna le ki ngailutna um jing ta hen.

ZT: Na phat mantam tah Interview hun a nei pe jehin ka kipah val e. Hing vangpha tan.

NH: Kei jong kakipah e. Mi hijat lah a Zogam Today hon kei ema hilou penpen hitobang phat pha nei hin peh uva ka experience ho share theia ka um jehin Pathen ka thangvah e.

Chuleh Stephen's Bible Reading & Writing Ministry ho chung a jong sei joulou kipathu kahin phong'e.

~ Zogam Today [10-05-2020 | Pg. 2]

Share: