SANGGAM MEELMA (E03)

By: Pastor Thangdoulal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in chibai ka hung buk hi.

BIBLE:  Absalom in Amnon kiang ah thu hoih hi-in, thusia hileh bangmah a kum ngaikei a, a sanggamnu a suam ziak in Absalom in Amnon a haw mahmah mai hi (2Sam. 13:22).

Sanggam Meelma chih kammal pen, ei mite gendan taangpi a gen diing hilehang, khawmui hun chiang a, mi khat kua hiam hung pai a kimu, hilezong a meel kimulouh hunlaitak pen Sanggam Meelma hun a kichi hi. Hilezong tuni a i gen ut uh hih Sanggam Meelma (Khawmui) hun ahikei a, Uta or Unau or Sanggam kimeelmakna or kituaklouhna or kibaklouhna thu ahizaw hi.

Tutung a i ngaihtuah diing uh ahihleh David Tate Kituaklouhna thu ahi.

AMMNON LEH ABSALOM KIMEELMAAKNA

Amnon ahihleh David tapa taakpen ahi a, Absalom ahihleh a thumna ahi a, hilezong ama (Absalom) tung a pen a neulai a si ahihziak in a nihna chih diing ahita hi (David Tapate:  Amnon: A taak pen ahi. Nihna Kileab or (Daniel) ahi a, Karmel a Abigail tawh a (David) tapa ahi. Amah a nihna ahi a, a neulai a si ahi. A thumna Absalom ahi (1Khang 3:1-2)).

Amnon leh Absalom kimuhdahna hung kipatna ahihleh Absalom sanggamnu Tamar ziak ahi. Tamar pen mi meel hoihtak, ngaihbaang, leh duang etlawm, hoih chihtak a hoih a gen in a om hi. Hihnu pen hoih mahmah ahihman in a U-pa Amnon in aamlah mahmah or enlah mahmah a, tuachiin lungsim bawl in a tawp ah, suam (tha gumhaat a buan) hi (A taangthu kimzaw a na et ut leh, 2Sam. 13 na sim in).

Amnon in Absalom sanggamnu Tamar a suamgawp ziak in Absalom tawh a kaal uah, kilemlouhna a hung kipankhia a, a tawpna ah a Uta (Unau) un kithah lawh uh hi.

Kisuamna or kitha-gum bawlna pen tuni dong a India leh leitung pumpi in a buaipihte uh lak a khat ahi. Tualai chiang in taksa kisuamna pen a gendan tuamtuam tampi a omta hi. Kisuamna or tha gumhaat a kibawlna in a gen ut pen ahihleh, 'Mi khat utlou sasa a bang hiam bawlsak or utlou sasa a sil khat bawlsak teiteina,' ahi a, hih pen eite lak ah zong tam mahmah hi.

Amnon Khelhna Bang?

Amnon in a bawllouh diing bawl a, or mi khat (a sanggamnu) a utlou sasa in sil khat bawlpih teitei a, tua a sil bawl pen diklou ahi, chih thei napi a, ngaihdam ngen utlouhna pen a khelhna lian pen suak hi.

Amon in a sil bawl a hoihlouh ahi chih thei napi-a, a sil bawl huu a, pan a laak teitei mahbang a, i sil bawl uh, leh i nna septe uh, diklou ahi chih thei napi-a, a huu teitei or mite theih diing a diksak teitei mihing pen, eite lak ah kitam mahmah hileh kilawm hi. Tuaziak in zu dawnte'n a siatna omlou, teep-le-muam zongsanghte'n zong a siatna omlou or a hoihlouhna omlou chi in, hoihkei chite i tangdeek ngam uh hi. 

Sanggam aw, tunni in na Amnon lungsim paisan or nusia or paai inla na hinkhua a bawldik ngai a omleh bawldik mengmeng in, hileh Pasian leh mite deihsakna na ngahtheih na diing, hun hoih na neilai diing hi.

Absalom Khelhna Bang?

Absalom khelhna pen a U-pa Amnon that ahihman in mawh hi or khial hi. Khutkhelh thu a a thah ahikei a, tupna leh ngimna dettak or hoihtak nei a a sanggampa a thah ahi. Tuaziak in Absalom a dik ngaikei diing hi. Absalom in ngaihdamna neilou ahihman in khial hi. Absalom in itna neilou ahihman in khial hi. Absalom in deidanna or khentuamna nei ahihman in khial hi.

Absalom mizia or hindan tawh kibang mihing pen, i tulai hinkhua uah zong tam mahmah leh kilawm hi. Absalom in a sanggam khelhna or mawhna a ngaihdam theihlouh bang a, a sanggam mawhna or khelhna ngaidam theilou na hikha hiam? A hunlai peet in ngaidam in. Absalom in a sanggampa a it zawhlouh bang a, a sanggam it zoulou mi khat na hikha hiam? A kikheel masang in na it in, na sanggam in mawhpaihna a poimawh kei a, na itna a poimawh zaw hi. Absalom in a sanggamte lak a deidanna or khentuamna a neihbang a, na sanggamte lak a, it-tuam, ngaih-tuam, hehpih-tuam nei mihing khat na hikha hiam? Hibangte'n khantouhna saang a siatna hung puakzaw diing ahihman in, tawpsan mengmeng in. Absalom mizia nein a hikha maw? Kisiik in Pasian kiang hung zuan meng in, Toupa nang ngak a om ahi.

Hih a tung a thute na simna tungtawn in Toupa Pasian in Thupha Hung Peta Hen..

Share: