SANGGAM MEELMA (E02) By: Pastor Thangdoulal

SANGGAM MEELMA (E02)

By: Pastor Thangdoulal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in chibai ka hung buk hi.

BIBLE: Hilezong a sanggamte'n, a pa un ama'uhte saang in Joseph a it zaw chih a muhtak un, amah (Joseph) a hua ua, kampha khatbeek in zong a houpih ngai kei uh hi (Gen. 37:4).

Sanggam Meelma chih kammal pen, ei mite gendan taangpi a gen diing hilehang, khawmui hun chiang a, mi khat kua hiam hung pai a kimu, hilezong a meel kimulouh hunlaitak pen Sanggam Meelma hun a kichi hi. Hilezong tuni a i gen ut uh hih Sanggam Meelma (Khawmui) hun ahikei a, Uta or Unau or Sanggam kimeelmakna or kituaklouhna or kibaklouhna thu ahizaw hi.

JOSEPH LEH A SANGGAMTE 

Joseph leh a sanggamte kaal buaina thute ahihleh, Khristian ka hi chi a biak-inn khat a kikhawmte lak ah, taangthu kithang mahmah khat ahihziak in eite lak ah zong, Bible taangthu khat ahihna ah a theilou i om diing uh ka gingta kei hi. Tuaziak in a taangthu i suut nawnlou in, a khelhnate uh leh a bawl diing ua kilawm a bawllouhte uh a kipan in i Khristian hinkhua uh i enthak zaw diing uh hi. 

Joseph in Khelhna or Mawhna a Nei Hiam? 

Joseph taangthu suut zousiah in Joseph mawhna or khelhna bangmah a gen ngaikei un ka thei a, tualeh Joseph tawh kisai a Bible a thu kigelh i muhnate uah zong, a mawhna or a khelhna gen diing a omlou hileh kilawm hi. Hilehzong Joseph in bawlkhial or a sil bawldan a diklou om hileh kilawm hi. Bible en ni, Siamc. 37:2 na in hibang in na gen hi; "Hih Jakob khangthu ahi. Joseph in, kum sawm-le-sagih a phak in, a sanggamte tawh belaam honte a ching uh hi; amah pen, a pa zite Bilhah leh Zilpah tapate panpih pen ahi; Joseph in a giitlouhna thu uh a pa uh kiang ah a hung tut hi," a chi hi. 

Joseph in a pa kiang ah a sanggamte thuguuk a theih zousiah genkhia ahihman in a tung ah a sanggamte lungdam lou uh hi. Hihziak in Joseph a khial tuankei a, hilezong a pa uh kiang a a hilh diingdante gen masa leh, a sanggamte a diing in naa nguut-nguut lou deuh maithei diing ahi. Hitalezong Joseph dinmun i et leh, a mawhna diing bangmah a omkei a, a mawhmatna diing omsun ahihleh a dikna or a diktatna ahi.

I gam uah a diktatte a maw a kichih hunlaitak ahihna ah, nang bangchibang a gen in na om a? Joseph a diktatna ziak a dem leh mawhsakna thuak in a om a, ei Jesu Khrist sisan a lamkhiat, Jesu meel pua diingte lak ah, diktatna ziak a minsia, diktatna ziak a mite muhdah, diktatna ziak a gensiat thuak i omta uh hiam? Na diktatna ziak a na thuakna gen diing a omkei leh, a diktat zou nailou na hi maithei hi. Pau. 12:12 "Migiloute'n giitlouhna a a muh uh punna nasan a deihgawh ua, hilezong diktatna thagui pen a gahpha mahmah hi." Pau. 12:28, "Diktatna lampi ah hinna a om a, tua lampi zuihna ah sihna a omkei hi." Pau. 14:34, "Diktatna in nam a tawisang a, hilezong khelhna pen mi zousiah mualphouna ahi hi." Diktatna ziak in Joseph Educational Qualification Background neiloupa Egipt gam a Governor in Pasian in pangsak hi. Na muhdan in, diktatna kichi nag ahia? Na diktatna in nang leh na innsung, leh na mi namte lampi diing sial or bawlsak ahi chih thei kawm-kawm, na sepna ah or a zahtaak-huai na office ah hung diktat in. Pasian in hung ompih diing ahi.

Joseph Sanggamte Bangchibang Mihing Ahi Ua?

Joseph sanggamte hindan or mizia pen Pasian a tawh kituaklou, a nu-le-pa a tawh zong kituaklou ahihman in Joseph in a sanggamte thuguuk (a khelhnate uh or a mawhnate uh) a pa uh kiang ah tut zeel-zeel hi. Siamc. 37:2 na in, "Joseph in, kum sawm-le-sagih a phak in, a sanggamte tawh belaam honte a ching uh hi; amah pen, a pa zite Bilhah leh Zilpah tapate panpih pen ahi; Joseph in a giitlouhna thu uh a pa uh kiang ah a hung tut hi," na chi ahihman in Joseph sanggamte pen a mi hoihkei uh chih a kichian a, a omdante uh leh Pasian deihnate a kituak kei chih, leh a pa uh Jakob deihna tawh zong a kituak kei chih a kichian hi. 

Hih Joseph sanggamte pen, leitung or ama'uhte ut bangbang a hinkhua zakna ahi a, Pasian ut bangbang a hinkhua zakna hilou hi. Tuaziak in Pasian utna leh deihna tawh kituaklou hinkhua pen, Pasian lak a khelhna leh mawhna ahi. Na utbangbang a na hinkhua na zak ziak in na khial or na mawh kei a, hilezong Pasian utna bangbang leh deihna bangbang hinkhua na zaklouhna ziak in Pasian lak ah na khial a, na mawh hi.

Joseph sanggamte bang a, nang deihna zui diing na hia? Or Pasian deihna zui zaw diing? Nang hoihsakna pen a hoih a pom diing na hi hiam? Or Pasian hoihsakna a hoih hi chi a pomzaw diing? Na ut bangbang a na hinkhua na zak pen na khial hi ka chikei a, Pasian utna leh deihna bang a na hinkhua na zaklouhna in, Pasian lak ah nang hung khialsak hi. Bangteng hileh, ka it sanggam aw, ki-ngaihsun thak ni hang in, Pasian lam a kileh thak mai ni uh aw….

PASIAN IN THUPHA HUNG PIA HENLA HUNG LAMKAIHTA HEN

Share: