SANGGAM MEELMA (E01) By: Pastor Thangdoulal

SANGGAM MEELMA (E01)

By: Pastor Thangdoulal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in chibai ka hung buk hi.

BIBLE: Tuachiang in apa`n a kiang ah, 'Tapa,' 'nang ka kiang a om gige nahi a, ka neih zousiah zong nang a ahi (Lk. 15:31).

Sanggam Meelma chih kammal pen, ei mite gendan taangpi a gen diing hilehang, khawmui hun chiang a, mi khat kua hiam hung pai a kimu, hilezong a meel kimulouh hunlaitak pen Sanggam Meelma hun a kichi hi. Hilezong tuni a i gen ut uh hih Sanggam Meelma (Khawmui) hun ahikei a, Uta or Unau or Sanggam kimeelmakna or kituaklouhna or kibaklouhna thu ahizaw hi.

BIBLE A SANGGAM MEELMATE 

1. KAINA LEH ABEL: 

Kaina leh Abel pen mi masa Adam leh Eve tapa tegeel ahi uh hi. Ama'uh geel pen kituaklouhna nei masa sese lou in kithat uh hi. Hih Uta tegeel taangthu Gen. 4 ah kimuthei hi. Bible ah, "Gen.4:5 Hilezong Kain leh a silpiakte Ama'n ana saansak kei hi. Tuachiin Kain a heh mahmah a, a mai a mual dikdek hi. 6 Toupa'n Kain kiang ah, "Bang diing a heh na hia, tualeh bang diing a mai mualsa a om la? 7 Bawl hoih lechin saan in om lou diing na maw? Na bawl hoih kei leh, na kotkhaak ah khelhna in nang a hung buk hi; a deihlam nang a a hi diing, hilezong nang na thuneih khum diing ahi," a chi hi. Bangteng hitaleh, hihte Uta kithah lawhna ziak pen silpiak thu ahi a, Kaina silpiak Pasian in a saanlouh ziak a, thangpai a Kaina in a naupa a thah ahi.

Kaina Khelhna

Kaina pen a mawk khelh or a pawngsan bawlkhial ahikei a, a khelhna hung kipatna pen Kiletsakna ahi. 'Pasian in Sisan a kithoihna a saang hi,' chih Kaina in a naupa maitaam a kipan a a theihsa ahita hi. Hinapi'n kimisak or kiliansak, or ki-Upasak, or ki-ngiamkhiat utlou mahmah ahihman in Sisan a kithoihna bawl utlou a, Sisan kithoihna bawl a naupa that hi.

Eite bang i chi ua le? Kaina bang a kimiitsakna, or kiletsaknate, or ki-Upasak, or ki-ngiamkhiat utlounate in i hinkhua uh Pasian tawh a kigamlaatsak diing lau-huai mahmah hi. Job. 33:14 na in, "Pasian in thu gengen napi a, kuamah in A thugen limsaklou i hizaw uh hi," na chi hi. A hunlai in lunghei in Pasian beel ni.

2. JAKOB LEH ESAU:

Gen. 25:21 Isak in a zi a chiin ziak in Toupa kiang ah thu-ngetna a nei nguut-nguut hi; tualeh Toupa'n a thu-ngetna a saang a, a zi Rebekah nau a hung vomta hi. 22 A sung ah naupang tegeel a kisual uh hi; ama'n, "Hibang diing ahihleh, bang diing a hing ka hia?" a chi a, Toupa dong diing in a kuan hi. 23 Toupa'n a kiang ah, "Na suul ah nam nih a om a, na sung a kipan a piang mihing nihte a kikhen diing hi; khat pen a dang khat pen sang in a hat zaw diing a, a taak zaw pen in a nau zaw pen nna a sepsak diing hi," a chi hi.

Uta kigaal or Uta (Unau) kimeelmaakna laklak ah, Esau leh Jakob a pen, huaise mahmah hi. Pastorte, Evangelistte, leh Bible thu tawh kisai a theihna neite'n a suut chimlouh uh thu khat ahi hi. Hih Uta (Unau) tegeel pen a khantawn ua kidou or kigaal or kimeelma tawntung diing bang a a kilatlai in, khatvei a na kihoulemkha uh hi. Hilezong kilungkim louhsa nana pen, teenkhawm, giak-khawm chihte hithei taktaklou ahi diing a, teengkhawmlou, giak-khawmlou in om uh hi.

Jakob Khelhna Bang?

Jakob in a nu thu a man ziak in mikhial ahi diam? Thumanna khelhna ahi diai leh? A taktak a chih in Jakob in a nu thu a man ziak a, a Upa Esau thupha ngah diing a guuksakna ah a khial kei a, hilezong a U Esau gilkialtak leh bahtak a a omlaitak a, a Upa hihna a nget teitei pen ah a khial hi. Tuaziak in Pasian in a pute kiang a a gaaltaaina ah, a pu tungtawn in Jakob gawt a, a tawpna ah Jakob aguuk-agaal in hung taaikhia hi.

Jakob mahbang a eite zong, mi genthei leh chimawhte tung a hamphatna zong i hikha uh maw? Mi chimawhte or mi bahsamte tung a kipan a banghiam hamphatna diing zong i hikha uh hiam? Bawltheih neilou leh gentheih neiloute tung a banghiam hamphatna diing zong i hikha uh hiam? Ki-ngaihsun ni hang in Pasian lam ah kileh ni.

Esau Khelhna Bang? 

Esau a khelhna thupi penpen ahihleh, a neihlouh diing numei a neihna or a kiteenpih louh diing nu-ngakte a kiteenpihna ahi. Bible en ni, "Gen. 28:6 Isak in Jakob thupha a pia a, Paddan-aram gam ah zi nei diing in a sawlmangta chih leh, thupha a piak a, "Kanaan gam numeite na kiteenpih lou diing ahi," chi'n thu a pia chihte leh, 7 Jakob in a nu leh a pa thumang in Paddan-aram gam zuan in a kuankheta chih, Esau in a thei hi. 8 Tuachiin Esau in, Kanaan gam nu-ngaakte'n a pa Isak a sulungkim kei chih a theih in, 9 Ismael kiang ah Esau a vahawh a, Abraham tapa Ismael tanu, Nebaioth sanggamnu Mahalath a kiteenpih a, a zi neisate baan a a neihbeh ahi." 

Esau omdan i muhbang ua, nu-le-pate lak a lawhsam kisak ziak a nu-le-pa tawh kikalh a gamtat teitei diing hilou hi. Sanggamte lak a lawhsam kisak ziak a nuak tawntung diing zong hilou a, a lawhching zawte kikepsakdan kizilthak zawk diingdan ngaihsut zawk diing ahi.

TOUPA'N THUPHA HUNG PIA HENLA, HIH THUTE THEISIAMNA IN NA HINKHUA HUNG KHEELSAKTA HEN

Share: