PASIAN NGAIHSAANNA POIMAWH

By: Pastor Thangdoulal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

BIBLE:   "Tuachiin ama'uhte'n Israel mite lak ah, a va-gam etna uh thutut hoihlou a hung puak ua, "Ka va-gam etkhiatna uh gam pen, a sung a teengte nekzohsa vive ahi; tualeh ka va-muh uh mite zong mi lianpipi ahi uh hi. Tua mun ah, Nefilim mite ka mu uh hi. Anak mite pen Nefilim mite a kipan a hung kipankhia ahi uh hi; ka kimuhdan un kou pen, kauphe tawh ka kibang giap ua, ama'uhte mitmuh in zong tua bang mah ka hi uh hi," a chi uh hi (Kis. 13:32-33).

Khristian hinkhua pen, khualzinmi innlam a zuan a pai tawh kibang in, i Toupa Pasian in eite a diing a a hung bawlsak vaan-inn zuan a paina ahihna ah, haksatna, lungkham sinkhamna, lungdonna, leh chihmawtak a omnate in a hung bop hun a omthei diing a, lungkiatna diing haksatna tampi phuuk hun zong a om diing a, Pasian Ngaihsaanna tawh panlakna a omkei leh, eimah leh i mite tung ah Pasian lungnuam louthei diing hi. Ni danglai in Israelte tung ah zong hibang in a na tungta ahihman in dik diing in ka gingta hi. Tuaziak in hih a nuai a thute i ngaihsun khawm diing uh hi.

1. I Haksatnate Uh Saang in Pasian Neuzaw Lou Hi

Khristiante'n khelhna khuukpi nusia a, eite a diing a Pasian mun sehna (vaangam) lam zuan a kal i suanbang un, Israelte'n zong a saltanna uh Egipt gam nusia in, ama'uhte a diing a Pasian in a sehsak gamchiam zuan in a hung kalsuan ua, lamkaal ah gimna, haksatna, leh lungdonnate tampi tuakkha uh hi. Hichibang in haksatna tampi tawh a hung pai ua, ama'uhte a diing a Pasian gamchiamna mun a luut diing kuan un, gam enkhe diing mi a kisawl ua, tuate lak a a tamzaw (mi 12te lak a 10te) in, Mite Lian Muh ua, Pasian Lian Muh lou uh hi. Eite bang i chi ua leh? Mite Ngaisaang in Pasian i ngaisaang kei kha maw? Mite lauhbawl in Pasian i laubawl kei kha maw? Mite thu mang in, Pasian thu i mangkei kha uh hiam? Hibang i hihkhaak diing uh lau-huai mahmah hi. Pasian mah ngaisaang ni. I haksatnate uh saang in Pasian lianzaw a, thupizaw hi.

2. Israelte Bang a Hoihna Lam-en Ngamloute I Hi uh Hiam?

Bible: Gam enkhe diing a kuante lak a pang, Nun tapa Joshua leh Jephuneh tapa Kaleb in a puante uh a botkeek ua, Israel mipi kikhawm zousiah kiang ah, "Ka va-etkhiatna uh gam pen, gam hoihtak ahi. I tung ua Toupa a lungkim naakleh, Ama'n hih bawngnawi leh khuaizu luanna gam a hung tut diing a, eite a hung pe diing hi.  Toupa tung ah giitlouhdah photphot un; tua gam mite zong laukei un, ama'uhte i an diing uh ahi uh hi; a kihumbitna un ama'uhte a nuseta a, tualeh Toupa'n eite hung ompih ahi; ama'uhte laukei un," a chi uh hi. Hilezong mipi kikhawm zousiah in ama'uh suang tawh den a sawm uh hi (Kis. 14:6-10a). Tuachiin Pasian in hibang in a gen hi: Toupa'n Mosi leh Aaron kiang ah: Hih mi gilouhonte'n, bangtanvei kei dou a phun diing uh ahia? Israel mi phun-haatte phunnate ka za a, kei dou in a phun uh hi. Ama'uhte kiang ah, "A hing ka hihna bang in," Toupa'n a chi hi, "Na gen uh ka zaak bangbang in na tung uah ka bawl diing hi: hih gamdaai ah na luangte uh a puuk diing hi; na lak ua kipan a kum sawm nih tunglam, kisimna a minkhum, kei dou a phun zousiah a puuk diing uh," a chi hi (Kis. 14:26-29). Pasian muang a hoihna lam-en ngamloute tung ah Pasian in sihna tungsak hi. Tu a i muh leh thuak uh haksatnate a pan a, Pasian muang a hoihna i lam-et diing uh Pasian deihna ahi a, tualeh hibangte tungtawn a Pasian in a Pasian hihna kilanghsak ut hi diing ahihman in hibangte Pasian min a i nawk/phuuk diing uh pen Pasian deihna leh eite mawhpuakna zong ahi. Tuaziak in thathak la ni hang in, i muhphaak ua om haksatnate a kipan a hoihna lam-en ngam diing in Pasian min in i kipanthak diing  uh hi.

3. Israelte Bang a Kimuanmawhna tawh Omte I hikha uh hiam?

Pasian in ama'uhte kiang a a piakna gam a luut diing in Israelte a kimuangkei uh chih pen, i theih chiatsa uh ahi. Bangziak a kimuanglou uh ahia? I chihleh, ama'uhte'n Pasian ah ginna neilou uh hi. Ginna a neihlouh ziak un, launa in ama'uhte lak a vai a hawm a, kauphe tawh kibang a, bawltheih neiloute bang in kimu uh a, a mailam diing uh tawh kisai in lau mahmah uh hi. Tuachiin ama'un Pasian muanna ziak a launa neilou tegeel suang a denlup a sawm lawh uh hi. Tuaziak in sanggamte aw, eite tawh hung omkhawm Pasian ahihman in laulou in a pai diing ua, Pasian in eite a diing a a sehna mun tangtak a i tuna diing uh i ngaihsut zaw diing uh hi. leitung ah bangbang om in, haksatna bangteng tuakta lehang zong lau lou in Pasian ah i dingkip semsem zaw diing ua, Pasian ompihna thei kawm a kimuangtak a om diing in pan i la zaw diing uh hi. 

4. Kua I ngaisaang diing ua? Mite maw Pasian?

Pasian in a teenna diing ua a piakna gam a luut diing pen Israel mite a diing in ahithei diing sil in kilangh lou hi. Pasian in ama'uhte a diing a a gam chiamna mun a teengte thupi a sa ua, haat a sa ua, a kulhbaangte uh zong thupisa in ama'uhte dou diing pen ahitheilou diing in ngaihsun uh hi. Aziak pen ama'uhte'n a Pasian uh saang in tua gam a teengte a thupisa zaw ua, tua in a tung uah siatna tun hi. 

Leitung ah thupi i sakte mah ki-ngaisaang a, lian i sakte mah zong kilau taangpi hi. Na leitung hinkhua ah, Pasian thupi nasakna gen diing hilechin, gen diing bangzah na nei diai? Mite saang a Pasian na ngaihsaan zawkna gen diing hilechin, na gen diing a tam taktak na diam? Na hinkhua taangthu mi dangte'n gensak lehang, Pasian mi taktak na hihna bangzah a gen diing uai? C. Ronaldo bawlpek siamsate'n C. Ronaldo ngaisaang ua, Messi bawlpek siamsate'n zong Messi ngaisaang uh hi. Tuachibang in Pasian thupisate'n Pasian ngaisaang ua, Mihingte leh Sum-le-paai thupisate'n zong mihingte leh sum-le-paaite mah ngaisaang uh hi. Nang Pasian na ngaisangta hiam? Na hinkhua zakdan ah, Pasian na ngaihsaanna a kilanghta hiam? Chih thute ngaihsut a, Pasian lam mah en tawntung diing in Toupa Pasian in thupha hung peta hen.

Share: