NA HIHNA DIKTAK NA THEICHIANTA HIAM?

By: Pastor Thangdoulal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

BIBLE SIMNA: 1 Migiloute thuhilhna zuilou a, mikhialte lampi a zong pailou a, simmawh-haatte touna a zong touloute a hin-nuam ahi uh hi; 2 ama'uhte kipaakna pen Toupa daante ah a hizaw a, a daan thute sun leh zan in a ngaihtuah tawntung uh hi. 3 Ama'uh pen tui luan zingna luipang a sing kisuan, a teh zong vul ngai lou, ahun-hun a gah gige bang ahi ua, A sil bawl zousiah uah, a lamzang zel uh hi. 4 Hilezong migiloute pen hibang ahi kei ua, buhsi huih mut lengmang bang ahi uh hi. 5 Tuaziak in vaaihawmna ah migiloute a dingkei diing ua, midiktatte kikhop khawmna ah zong mi khialte a pangkei diing uh hi; 6 midiktatte lampi Toupa'n a enchian a, hinanleh migiloute lampi pen a mangthang diing hi. (Laa 1:1-6).

MI HIN-NUAMTE KUATE AHI UA?

Global Village /Global Neighbourhood

Internet vaihawmna nuai a om in Leitung pumpi khua khat a teeng khawm mahbang in, America a omte leh India a omte, ahihke'h leitung gam tuamtuam a omte leh ei Lamka khopi a omte pen, baihlamtak in i kithuzaak theita ua, tuaziak in khua khat a teeng kichih saang in zong, i kinaizawta uh hi. Tuaziak in leitung pumpi pen, ki-innveng kisuakta hi. Tuachiin global neighbourhood a om in, hin-nuamtak bang in i om uh hi. Hibang a leitung ki-innventuahna a hinkhua zanghte mi hin-nuam i chithei diing uai lee? Hih global neighbourhood khang ah, mite'n Bible leh Pasian tawh hun zakhna saang in, leitung mun tuamtuam a sil tungte leh thu thangte buaipih zaw uh ahihman un, hin-nuam hihna diing saang in buaina, lungkhamna, leh beidonnate i manawh toutou zaw uh hi. Tuaziak in hih a nuai a thute ngaihsut khawm ni. 

1. Kitheihchianna Omlouh Ziak A Buaina: Khristian Approach.

Leitung mihingte pen, vaan mi hi diing a leitung a khualzin bang a omte i hi ua, i kipatna uh leh i tawpna diing uh pen Pasian ahi. Tuaziak in eite pen, leitung mihing chih chiang bek i hikei ua, vaan mite i hizaw uh hi. Hilezong tamtakte'n i vaan mi hihlam uh i theipha kei ua, tualeh vaan mi hi diing a sapte i hihlam uh zong theilou in hinkhua i zangh uh hi. Tuachiin i hinkhua uh bawlthak theihlouh diing khop a kisia in, Humpty dumpty i bang chiatta uh hi. A kilemloute lah leptheihlouh in i omden ua, a khasete zong lungdam hun neilou in, phulakna diing lemtaang bek zong in ki-omthei mawkta hileh kilawmta hi. Leitung mi na hihlouh daante limtak in thei inla, vaan mi na hihna diktak thei hile chin, hichilou diing himah vechin maw… Sanggam aw, Pasian sung ah na hihna diktak zongthak inla, na hinkhua kheelta in, Toupa'n hung makaih diing hi.

2. Kisiamna (Fashion) Leitung.

 Tulai in i gam uah kisiamna a kithang mahmah a, adiak in numeite'n hih kisiamna/ kicheina ngaisang mahmah uh hileh kilawm diak hi. I gam uah leitung taksa daan a kisiamna/ kicheina a khang haat mahmah a, tuachiin kha-lam a i kisiamna diing uh hun omlou hileh kilawm mahmah a, physical fashion i ngaihsaan zah uh tawh kikim in, Pasian a diing a spiritual fashion ki-ngaisaang zoulou ahihziak in, innsung ah buaina, gam sung ah buaina, nna sepna ah buaina, leh hindaan ah buainate in i tung uah vaihawmta hileh kilawm hi. Physical fashion tawh kisai a i gen ut pen uh ahihleh, silh-le-teen bek ahikei a, Neih-le-lamte, Bike hoihte, Car hoihte, Inn hoihte neihna diing a i panlaknate uh ahi. Leitung ah kum 70-80 sung bek hinkhua zangh diingte i hi ua, hilezong, Jesu ah na piangthak in na piangthak kei zong in, kha a a beitheilou hinkhua zangh diingte i hihziak un, spiritual fashion ngaisaang zaw lehang kilawm mahmah napi, ki-ngaisaang zoulou hileh kilawm hi. Sanggam aw, ngaihsun thak inla na kisiam utdante Pasian a diing in kheek in. Toupa'n hung ompih in, hung lamkaih diing hi.

3. I Unpi Ua Actor Leh Actress Vive I Hi Uh Hiam?

Actor kichi pen, a taktak hilou a, a taktak bang a sil bawl ahihke'h nna sem pasalte genna ahi deuh hi. Actress kichi pen, a taktak hilou a, a taktak bang a sil bawl ahihke'h nna sem numeite genna ahi deuh hi. Pasian mi taktak hilou a, ki-Pasian misakte i hikha uh hiam? Jesu theihpihna omlou a piangthak kichite i hikha uh hiam? I Jesu nungzuihna uah, a taktak hilou a, a taktak bang a omte i hikha uh hiam? I Pasian biakna uah, a taktak hilou a, a taktak bang a Pasian biate i hikha uh hiam? Hilou! Kei pen a taktak a Jesu nungzui ka hi a, a taktak a Pasian bia ka hi, chi napi a, na hinkhua a kikheelna muh diing omlou mi khat na hikha hiam? Na pianthakna in na hinkhua a kheelna bangbang gen diing na nei a? Pianthakna in i tup-le-ngimte uh a kheek lamdang diing ahi a, hih Pianthakna tawhlou in, Kitheihchianna Omlouh Ziak A i Buainate uh a bei ngaikei diing hi. Ngaihsun thak mahmah ni hang in, Pasian lam zuanthak ni. Bangtanvei Actor, bangtanvei Actress hih sawmlai na hi hiam? Toupa'n nang teekteek hung tuulmawh hi.

MI HIN-NUAM KICHITE

1. Mi hin-nuam kichite pen mi pichingte ahi uh a, hih mi piching kichite ahihleh;

A. Bible simte ahi ua, ama'un a sim uh Bible in a hinkhua uh simsak uh hi.

B. Pasian ngaihsakte ahi uh hi.

Etsakna: Philippi jail sung Paul leh Silas pen gentheitak in om le-uh kilawm a, Jail sung a genthei kisa in, Pasian zong bethei kei le-uh kilawm hi. Hilezong ama'un noptak in Pasian bia ua, Jail sung lunglen chihte theipha vetlou uh hi. Ama'un noptak in hinkhua zangh theih uh ahihman un, mi hin-nuamte suak uh hi. 

Leitung ah mi giloute leh suamhaatte zong hampha thei ua, tuakphatak in zong omthei uh hi, hinanleh hih nuamtak a hinkhua zakhna pen Pasian neite kiang bekh ah muhtheih in om hi.

Hinkhua Nuam ahihke'h Hin-nuam kichi pen, buaina omlouhna, haksatna omlouhna mun a om ahi a, hih pen Pasian kiang bekh ah kimuthei hi. Tuaziak in, Kitheihchianna Omlouh Ziak A i Buainate uh beisakna diing in;

1. Mi Tuampi ka hi (Separated man) chih kitheihchian ngai hi. Leitung a om mite bang ka hikei a, vaan mi hi diing a leitung a khualzin bang a om ka hi, chih lungsim neih a ngai hi.

2. Laisiangthou Zui mi ka hi (Scriptural man) chih kitheihchian ngai hi. Kuante'n bangteng gen le-uh zong kei pen, Bible sim a a thute zui a om diing ka hi chih lungsim neih a ngai hi.

Hih thute na simna tungtawn in Toupa Pasian in thupha hung peta hen..

Share: