MOTHER’S DAY SPECIAL By: Pastor Thangdoulal

MOTHER'S DAY SPECIAL

By: Pastor Thangdoulal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

BIBLE: Kenkaria (Khopi) a Saptuam Deacon (διάκονον) nna sem (a pang), ginna a i sanggamnu uh Phoibi (Φοίβην) noute k'ung meeltheihsak hi. Toupa min in misiangthoute bang in a na pom unla, panpih a ngaihna teng ah a na panpih un, amah mi tampi a dingin a phatuam a, kei a ding in zong a phatuam hi. (Rom. 16.1-2)

Mother's Day simsial a i theihzing uh Anna Jarvis ahi. Hih Mother's Day tawh kisai thute, a kipatdante Gospel Thuzintung leh http://khalvontawi.com ah i na suahta ua, tuate simtheih diing ahi. Tuni in nu manpha leh manphaloute en in, nu vakvaite leh nu gin-omte leh a innsung mite uh Pasian min in i hanthawn ut uh hi. Tua diing in hih a nuai a thute limtak in i sim diing uh hi.

1. Nu Kipezou Phoibi.

Phoibi taangthu pen, mi tamtak in a na suut utlouh uh, leh a na limsak khollouh uh nu khat ahi hi. Amahnu kipiak zawhna pen a thupi mahmah a, tuachiin Paul in Rome khopi a om Saptuam mite kiang ah, theihsakna bawl hi. 

Phoibi min khiatna ahihleh, ei haam in, "Siangthou, Salhvaak, Taang," chih ahi. Hihnu pen mi tampi a diing in a phatuam a, tualeh Paul mahmah a diing in zong mi phatuam mahmah khat ahi. Aziak pen, Phoibi in Pasian leh a thute a lungdampih or a kipaakpih a, Pasian leh A thu min a kalsuante tengteng a diing in mi phatuam mahmah khat suak hi. Tuaziak in Paul in Rom. 16:2 ah, "…mi tampi a dingin a phatuam a, kei a ding in zong a phatuam hi," a na chi hi.

Tu NUTE NI in, Nu. Phoibi bang a Pasian leh A thu lamdampih Nute lak ah kizong leh a kimu diam? Mu diing na chi maithei, a taktak a chih in i tu khang uh nute lak ah, Khristian hihna zaal a diam, kuamah in Pasian a dahpih kei or a huat bawlkei, or mudah kei uh hi. Hilezong Nu. Phoibi bang a Pasian leh A thu kipaakpih a, amah kipia, a hinkhua kheel a, hindan thak a hinkhaw zangh, amh leh amah kisiansuah a Jesu a diing a theihpih mi a pang numei i gam uah or i saptuamte uah omleh, a nailam a gen in Sajan zuakte, Khaini zuakte, Shikhar zuakte, or Talab zuakte, leh zateep zuakte, kuhva zuakte, beidong kisa in a dukante uh (sumbuukte uh) khaak diing uh hi. Aziak pen a sung ua teeng kha in a neek diing uh phallou diing ahihman in nelou diing ua, a zuakte beidong diing uh hi. NUTE NI zang zousiah in ngaihsun ni, Nu Phoibi in Pasian leh a gam a diing a khualna ziak in, Saptuamte ki-ngakna khuampi (Deacon) suak hi. Pasian a diing a kipete Pasian in zang a, a kipeloute zanglou hi.

2. Kikheelna a Nu Ettontaak Ruth.

Dokna: Hih kikheelna a nu ettontaak Ruth kua ahia?

Dawnna: Elimelek tapa taak pen Mahlon zi ahi a, Naomi mounu ahi.

Dokna: Bangziak a kikheelna a nu ettontaak hung hithei e?

Dawnna: Ruth pen, Pasian thei-ngailou Moab numei ahi a, milim pasiante bia numei khat ahi hi. Pasal a neih masang a a biak pasiante a pasal neihna ah a kengkei or a pawkei a, a pasal pusa-pasa biaknate amah a diing in manawh ngam hi. A nu-ngaklai a a nu-le-pate'n a zuihpih uh tawndante (customs and culture) a pan in tawndan thak zui diing in lungsim khensatna nei hi.

Dokna: Eite'n kikheelna tawh kisai a bangchi etton diing?

Dawnna: Kikheelna tawh kisai a i etton diingdante uh ahihleh;

Khatna ah, A nunglam a pasiante pawlou in nusia a, Israel Pasian ah a muanna nga hi.

Nihna ah, Aman a nunglamte tawndan (customs and culture) a pasal neihna innsung ah pawluut lou hi.

Thumna ah, Amuhthak Pasian muang in thu mang hi.

A tawpna ah, Ruth pen taanglai peveng-veng a nupi khat hilezong tuni dong in i mangngilh theikei uh ua, Pasian a omlaisiah a min mang lou diing hi chilehang zong khiallou diing in ka gingta hi. Eimi numeite'n pasal a neih chiang un puak-le-ken hau mahmah uh ahihman un a phungtanna uah, a puak-le-kente uh ziak in buaithei zeel uh hi (A puak-le-kente uh pen vanh saang in tawndan, (customs and culture) hitheizaw hi). Ei numeite'n pasal a neih chiang un a nu-le-pa tawndan nuselou ua, hilezong Ruth in nusia hi. Ruth in pasal a nei masang in thu zilkhiat a nei a, tua a zilkhiat thu pen hoihsa mahmah ahihman in, a hinpihtheihna diing in a thu zilkhiat pen tawh kituak in pasal nei a, a pasal ahihleh Mahlon ahi a, a thu zilkhiat ahihleh Pasian tawh kisai thute ahi. Eite pen hibang in ki-omthei khollou hileh kilawm ahi diing a, Biak-inn sung a Pastorpa'n Ruth taangthu a gen chiang in nute a lusu tamzaw hi, chi in khenkhat in chiammuih bawlna in zangthei zeel uh hi. NUTE NI i zakna uah, Ruth bang a a kikheelthei diing numei kizong leh a kimu diam? Tuni a i biak uh Pasian pen, Ruth in a na biak Pasian mah hiveh aw, bangmachik a Pasian hing theilou nu Ruth bawn a kikheeltheih leh, eite'n i neu a kipan a i theih hita lou maw? Ruth bang a na kikheeltheih leh nang zong Pasian in hung chiamteh diing hi.

3. A Zah-omna Keembitzou Kumpinu Vasti.

Kumpinu Vasti ahihleh Kumpi Ahasueras zi ahi a, a taangthu Esther laibu bung khatna ah a kimzaw in na simthei or muthei diing hi. Kumpi Ahasueras in a pawi bawlna ni za leh sawmgiat nung in ni sagih sung susan innpi ah pawi khat a tuam in a bawl a, hih pawi a zukham a a omlai un, etnop a et diing in kumpinu Vasti a samsak hi. Hilezong Vasti a utkei a, tuachiin kumpipa a heh a (Est. 1:10-12), hibang hehna a kipan in Vasti, kumpinu ahihna a pan a paihkhiat diing thu a hung piang a, tuachiin paihkhiat in a hung om taktak a, ama mun ah Esther a hung chingta hi. Hilezong Vasti in bawlkhial or mawhna a neikei hi.

 Vasti in a pasal thu a manlouh ziak a paihkhiat a om ahi na chi maithei diing hi. Ahinlah numei khat dan in ngaihsun lechin, hih pen sil hithei hilou ahi. Aziak pen kumpinu hi ngal a Etnop a et diing chih pen a zah-omna bei diing hi or Pasalte etnop diing a numei khat a omna diing a poimawh bang e? chih i ngaihtuah lezong buai-huai hi. 

Zukham honte lungdamlaitak a a mai ua ki-show diing pen Vasti ngaihdan ahi kei a, tualeh numei tamtakte ngaihdan zong hilou diing hi. Aziak pen a taksa hoihna zousiah a muhsak or a etsak diing ahi a, hih pen hindanthei numei khat pouhpouh a diing a sil hitheilou ahih ziak in, vasti zong a na utkei a, tuachiin paihkhiat in om hi. 

Vasti na utta leh a bang a chi diai? A kipaihna diing lampi Pasian in zong veve diing hi. Aziak pen, amah a diing a Pasian hunseh a tung hita ahi. Esther in tua mun a kumpinu hihna a ngah mengmeng kei leh A (Pasian) mi Israelte kithatbei diing ahihman in Pasian in program bawl a, tuachiin Esther kumpinu in hung pang hi.

Kumpinu Vasti in a zah-omna, leh a mi hihna diktak in keem a, ahihna leh dinmun a kipan a paih diing ahih dong in zong keem hi. Nang leh ken, Khrist ah i mi hihnate i keembitzou uh hiam? I zah-omnate uh i keembitzou uh hiam? Nupi hita, Papi hita a, zawl saisai chihbang i omkha uh hiam? I zah-omnate uh i kepbit diing uh pen ei mawhpuakna ahi a, hilezong vaihawmna pen Pasian a ahi.

Kumpinu Vasti bang a i zah-omna (dignity) keembitzou nu/pa hi a, i mi hihna diing uh diktakte limtak a vengbitzou i hihna diing un pan lathak chiat ni…

TOUPA'N THUPHA HUNG PETA HEN

Share: