LAMKA VANMAN KHANGDAN LAMDANG

~ Major Muanpi Zou

KA high school kailai in niteng in ZOGAM THUSUO kana simjing a, nikhat EDITORIAL ah dukan a vanlei ding dan thu a ngaidan kupna khat kana simkha a, tuanah laigieltu pa'n tambang in agiel ahi 'dukan a vante ilei ding chiang in zong eimi te kung sese ah valei jing lei' chi'n adeidan tampi gielsuh ditdet a, tuami kana ngaisut chiang in dih jong kanasa a, hinanleh tuchiang in adihlou na tampi umta in kathei ahi. eimite kung sang a kolte kung a vanlei khu kimanjo ban ah houpi mama jong nuam hi.

Lamka khopi pen ZOUGAM chia iki letsah pi  vang un niteng ipoimawh van nengthem te uh juah tu mahajon lian teng kol leh vaite ahi ua, atomlam a gending in amauh te'n adeidan dan ua LAMKA khopi achalai uh china ahia, deihun hun in vanman dei jat2 a kikhangsah ua, sumpi hau thei mama uh ahijiah un stock tampi tahte khol zel ua, BANDH leh STRIKE te ahing um tah chiang in hun lemtang lahna te in hing neijing ua, tuapen atheilou koima ki umlou a, hinanleh koima'n ngaisah tham asah lou adiai ahisih leh angaisah zoulou uh ahidiai? Amauhte deidan zuimai chilou upai umlou bangmai tahi.

Tutung Covid-19 jiah a vanman ahing khangdan pen lungdon huai mama a, zanmang a matdi'n jong deihuai lou phial ahi. gamsung pumpi ah LOCKDOWN um ma ahia, hinanleh ESSENTIAL SERVICE kichi neh leh dawn lam toh kisai te ahuap khasih a, adiah in WHOLESALE vante khu ahuntah a truck te'n ahing puah tung jing uh ahia, ahing kipatna uh Guwahati, Dimapur or Silchar chite apat lampi tungtawn ah petrol pump teng kihong jing ahia, avan lahna mun uah vanman akhang tuansih a, alam zawtdan uah bangma akilamdang umtuanlou a, nidang sang in thoveng zotham a, hinanleh vanman adeidan ua ahing khangsah upe'n sil lamdang tah ahia, lamkai thunei vaihawm tute'n etzui lou theilou khat ahi.

Etsahna di'n potato (alu) khu wholesale rate ah Rs 28/- hing man a, tuajou in Rs 23/- in hing kehniam suh hi.(lockdown masang a Rs 18/- ahi) truck te jong atai ngaibang in taijing ua, gamtuam apat nasem a vakilawh te ahing tung ua, Covid-19 positive umta chia ahing kiphuang doh nitah in Lamka mite patau ua, tuami toh kiton in potato wholesale rate khu Rs 30/- hing tung tou hiau, bang chidan adiai? Nitah khat thu a positive vei mi aumta jiah a vanman khang phut thei. Adatmawh huai kia khat ahileh tuabang kolte'n igam uah thunei sengta uh ahiman un, idei leh leiding, deilou leh leilou ding chi himaita. Deiteel nading dang lah kinei tuanlou ahijiah in lei tei2 mai ngaita a, azuah sawn te'n jong tuami dungzui a ahing mantam sah uh ngaikia zelta ahi. tambang hun ah I Zogam kineisah zel uh khu show thei ulei aphattuamna hing umzel thei ding dan hileh kilawm hial hi.

Tualeh alangkhat ah adatmawh leh puahnat huai diah mama ahileh; tuabang a kol mahajon te kung a Rs 28/kg wholesale a valate'n uang deuh sem in ahepi mama uh ami-asa te uh kung ah angiam theipen  in Rs 50/kg in zuahsawn kia zel ua, mun khenkhat ah bang Rs 60/kg tungpha a, puahnat huai thei mama hi. Kol mahajon te chilou eimi leh eimi jong hun lemtang a metna huaisetah sui kitam jing a, tambang igamtat dante uh pen eima mimal sia leh pha theina ahita a, sun leh zan a Biahinn a Bible isim busuah te uh geeldoh zel vai in, panpi ngaite panpi dingdan igente uh theijing vai in, eima tung a tungding mitung a jong bawl ding ahi chi phawng jing lei silpha tampi hing piangdoh tham ding ahi.

English te'n PENNY WISE and POUND FOOL achite uh kihi nalai ma adiai mah! Dukan neu nou2 bawl itam mama ua, wholesale dealer tan tungpha umnailou phot ihi jiah un kolte khutnuai a umding mah ihi ua, hinanleh thutah  khautah in paipi lei amaute jong dihtah a paisah thei nading lampi umtham ding ahi. kolte'n eite ahing solna sang a eite ei leh ei kisol nasa jing nalai ihi ua, Biahinn a kumtawn hinna leh vangam kaiding thute igen jing lai un kol mahajon te kung a van kiman tah a leina mun midang hinsawn nuamlou te ihi ua, puahnat jong huai zel sam ahi.Tuchiang in wholesale agency lam sai eimi hing umpan ta a, tuabang eimi tampi company toh direct a kikhutzop, igam a van poimawh tuam2 hing polut ding hing kibelap jing leh chi lunggul huai jing hi.

Tambang hun hamsa ah uleh nau khat leh khat kilungsiat tuah vai, kideisah tuah vai, khat leh khat phattuam nading te kikawh mu tuah jel vai, Christ a unau khat leh khat athawn a iki piah zoulou in jong nehsiat da vai in, lockdown sung a tampi kholdoh tei2 sang in phattuam ngaina nasep tampi bawldoh somlei, igam ah ki-itt ki-ngaina pungsem van in, igam hing khangtou van, kol leh vaite tung ah vaihawm vai in gentheite gentheina kibelap sang in dinmun nopzawh ah itun thei ding ua, LOCKDOWN gentah lou in MAUTAM KIAL tanpha jong hamsa lou kei in ipal gaalkai thei ding uhi.

VANMAN KHANGPHUT LEH TAMPHUT(kiam ngailou)KHU EI AGAM A TEENG TE KHUT A KINGAH JING AHI. PANGKHOM IN KIAL DOUNA DING IN VANMAN KHANG PHUT JING TE DOU MASA PHOT VAI!

-:(25-05-2020):-

Share: