KANAAN NUMEI LEH JESU

By: Pastor Thangdoulal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

BIBLE:  21 Tuachi`n Jesu hua a kipan in apawt a, Tura leh Sidon gam lam ah apaita hi. 22 Tualeh ngaiin, hua gam a kipan Kanan numei khat a hungpawt a, "Aw Toupa, David Tapa! Ka tungah zahngaiin! Ka tanu dawiin aman a agim mahmah," chi`n a kikou hi. 23 Hilezong aman kamkhat in zong a dawng kei hi. Tualeh a nungzuite hungpaiin a kiangah, "I nungah aki koukou a! Paisak maiin," chi`n ahung ngen uhi. 24 Hinanleh aman a dawng a, "Israel nam a belam mangte kiang chihlouhngal ah sawl ka hikei," achi hi. 25 Tuachi`n numeinu a hungpai a, "Toupa hung panpih in!" chi`n chibaih a hungbuk hi. 26 Hinanleh aman a dawng a, "Tate tanghou laksak a, uinoute kiang a paih akilawm kei," achi hi. 27 "Toupa, na gen adik hi, Hilehzong uite`n apu an nekna dohkan pan a tanghou them kia anejel sam ve uale," achi hi. 28 Tuatakin Jesu`n akiang ah, "Numei aw, na ginna thupi na tazen e! Na deih bang in na tungah omta hen," achi a, adawng hi. Tuachi`n a tanu huahun mahmah in a damta hi.

Hih Bible a i muhtheihte uh ahihleh;

1. Numei in Jesu kiang ah ngetna nei, hilezong Jesu'n a ngetna dawnglou (t. 21-23a).

2. Lungkelou in Kanaan Numei in zui hi. Tuaziak in Nungzuite'n Jesu kiang ah kiiksak mai in chi in ngetsak uh hi. (t.23).

3. Tuachiang in Jesu'n a dawng a, 'Judah mite kiang bek a hungpai hi ing. Tate tanghou laksak a, uinoute kiang a paih akilawm kei,' a chi hi.

4. Numei in lungkelou in a ngenlai a, 'Toupa, na gen a dik hi. Hilehzong uite'n apu an nekna dohkan pan a tanghou them kia ane zeel samve uale,' achi a, tuachiin a deihpen a ngahta hi.

Hih a tung a thute tawh kisai a i gen ut pen ahihleh CHIHTAKNA ahi a, hih a nuai a bang in i kikumkhawm diing uh hi.

1. Kanaan Numei Innsung Buaina 

Hih numeinu innsung buaina pen, natna a kipan a damna ngahna diing a buaina ahi a, tualeh amah mimaltak a diing a buaina ahikei a, amah natnate a kipan damna a ngahna diing zong ahikei a, a tanu dawimat/china in damna a ngahna diing ahizaw hi.

Sanggamte aw, i tu hun uah, Ta-le-nau i chihte pen ei kep-theihna leh ei hilh-theihna khenlam pek tungta uh hi, chilehang i genkhial diing un ka gingta kei hi. Tuaziak in i tate pen, Toupa Pasian in a hung kepsak diing deih-huai a, eite thuhilhnate saang a, Ama'n a hung thuhilhsak diing zong deih-huaizaw hi. Tuaziak in Toupa kiang zuan chiat ni.

Nu-le-pa khenkhat in ama'uh pilna-le-theihnate tawh kepsawm le-uh zong keem zoulou in a tate uh khamtheih khuuk ah kia ua, a deihlouh lam uh nnate sem in om ua, mite mai a ka tanu, ka tapa chih diing zong ut-huai lou khop in omthei mawk uh hi. Tate kepdan siam dan a kilangh Nu-le-pa khenkhat lah, keemthei a kisak uh a tate uh a hung pichin chiang un, deihna leh utna kibanglou in, duh-le-ngaih kibang lou in, leh lungsim kibaklouhna in a kaal uah siatna tun a, kikhasiatsuahnate in a tung uah vaihawm thei a, lungsim zawngkhalna hinkhua in nuselou hi chih diing bang omta hileh kilawmta hi. 

Nou innsung bang na chi ua? Na damkim uh hiam? Na buaina uh a om maw? Jesu'n na doknate dawnna diing a nei hi. Jesu kiang vazuan meng in… Mi dangte kiang saang in Jesu kiang a vapai diing pen, hoihzaw a, muantak zaw hi. I haksatnate Toupa kiang ah tun ni.

2. Kanaan Numeinu Bang in Jesu'n Na Ngetna Hung Dawnglou Ahi Hiam?

Kanaan numeinu ngetna pen, Jesu tawlkhat sung limsaklou hi chih kimuthei a, hilezong numeinu lungkelou a, Jesu nungzui kawikawi ahihman in, Nungzuite'n zong ningtel-huai sa uh ahihman in kiiksak mail eh hoih diing hi chih ngaihdan nei uh hi (t. 21-23). Hibang hun chiang in lungkiat diing pen, baihlam mahmah diing in ka gingta hi. Thukhun Lui hunlai in Pasian in a mite a daihsan hun a na om zeel a, hilezong a mite'n lungsim taktak tawh Amah a zon chiang un mu zeel uh hi. Hih mun a Jesu daihna pen, ei a diing a etchetna hun zong ahikha thei diing a, Pasian in Amah a diing a i dinna uh detdou/kipsa lou a, tawlkhat sung ngen tadihlai diing a hung deih zong hikha thei diing hi. Bible in,  "Ngen un, piakin na om ding uhi; zong un, na mu ding uhi; kiu un, hon in na om ding uhi. Aziak pen a ngen zousiah in a ngah ua, azong taphot in amu uhi; tualeh kuapeuh akiu taphot honsakin a om ding uhi. Na lak uah kua in ahia a tapa in tanghou ngentaleh suang pia ding? Ahihkeileh ngasa ngentaleh gul pia ding? Ahihleh nou migiloute`n bawn, na tate uh kiang a silhoih piak dan natheih uleh, na Pa uh van a om in a kiang a ngente silhoih pezaw sem sem lou ding maw! (Matt. 5:7-11)," na in a na chihziak in i nget-ngam diing, i kiuh-ngam diing uh ahi. Lungkelou in i haksatnate uh Jesu kiang ah tun ni.

3. 'Tate tanghou laksak a, uinoute kiang a paih akilawm kei,' Jesu chi nalai.

Rev. Dr. JM Paupu in a thugenna khat ah, "Jentel mite (Judah mi ahiloute) pen Judahte muhna ah ui tawh kibang ahihman in Jesu in hih numeinu pen UI tawh genteh a, hilezong Bible siam khenkhatte suutna a Jesu kammal 'Ui' chih pen, Ui vaakthapte genna hilou in, Ui neu kikhawite, inn ngak a kikhawi uite genna hi, na chi uh hi. Hilezong hih numei in ngen teitei a, Toupa kiang ah, 'Himah hi, Toupa, ui tawh kibang a niin-le-buahbaangpi hi ing, hitalezong hung hehpih in,' chi a ngen teitei ahihman in a deih pen Toupa in pia hi," a chi a, a dik mahmah hi. 

Innsung mite tawh nuihkhawmna diing leh laamkhawmna diing in damna poimawh masapen lou a, Jesu poimawh masazaw hi. I haksatnate uah Pasian buan teitei ni, Pasian tawh pankhawmna a om masak kei leh, a ki-itna uh pen i kikhasiatsuahna diing uh a hung hithei diing a, i nuihna un kahna a hung tutkha diing hi.

Toupa Pasian In Thupha Hung Peta Hen 

Share: