JESU VEILAM A KIKHAIPA TALAWM! NA CHI HIAM?? By: Pastor Thangdoulal

JESU VEILAM A KIKHAIPA TALAWM! NA CHI HIAM??

By: Pastor Thangdoulal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

BIBLE: Lk. 23:39, Tuachi`n migilou kikhai tegeel lak a khat in, "Khrist na hihleh nang' ki hundam inla, kou zong hung hundam tanla!" achi hi.

Jesu kikhailupna (Mat. 27.32-44; Mrk. 15.21-32; Jhn. 19.17-27)

Thangkhal NT Luke 23:26-42: 26 Tualeh amah apaipih lai un gamlam a kipan-a hungpai Kurini gammi Simon aman ua, Jesu nunglam a pua dingin atung ah Singlamteh a nga uhi. 27 Mipi tamtakte'n Amah a zui ua, huate lak a numei, Amah sûn a, kahtam lou kawm a zui zong a om uhi. 28 Hinanleh Jesu ama'uh lam nga in, "Jerusalem tanute aw! Kei hung kah kei unla, nou a ding leh na tate ua dingin kapzaw un. 29 Aziakpen mite'n, 'Chiingte leh naupai ngailouhna gilte, tualeh naungek tepngailouh noite ahampha uhi!' achih na ding uh nite ahung tung ding hi. 30 Tuani chiangin ama'uhte'n mualte kiangah, 'Hung netkhum un!' Tualeh ta`ngte kiangah, 'Hung khuhkhum un!' achi ding uhi. 31 Aziak sing hing a bawn hih silte abawl uleh, singgaw ah bang akibawl tazen diai?" 32 Amah tawh migilou dang nih zong khailup dingin azohpih uhi. 33 Tualeh "Luguh Mun," kichihna mun ahung tung un, singlamteh tung ah Jesu migiloute tawh akilhden ua, khat aziatlam ah khat aveilam ah akilhden uhi. 34 Tuachi`n Jesu`n, "Pa aw, ama'uhte ngaidam in! A silbawl uh atheikei ua ahi," achi hi. Tualeh apuansilh kihawm in ai asan uhi. 35 Tuachîn mipite`n a en en ua, tualeh lamkaite`n, "Midang bawn a hundam vele; Pasian mitel Khrist ahih taktak leh amahleh amah ki hundam leh avele!" chi`n a enghou uhi. 36 Gâlkapte`n zong chiamnuih bawlna in azang ua, hungpai in grepzu thuk a tulh ua, 37 "Judate kumpipa na hih taktak leh nang-le-nang ki hundam in!" achi uhi. 38 Tualeh a lutung lam ah Grik leh Latin leh Hebrai ham in, "HIPA JUDATE KUMPIPA AHI," chia kigelh atuang hi. 39 Tuachi`n migilou kikhai tegeel lak a khat in, "Khrist na hihleh nang' ki hundam inla, kou zong hung hundam tanla!" achi hi. 40 A khat pen in amah phawkkawm in adawng a, "Pasian lau lou maw? Mawhtansakkhawm a i om thei tanla. 41 Eipen gawttak mawng i hi; aziak i silbawlte man mu i hi; hinanleh hipa`n bangmah a bawlkhial kei," achi hi. 42 Tuachi`n aman Jesu kiangah, "Toupa na gam na tunchiang' hung thei gige in aw!" achi hi. 43 Jesu`n a kiang ah, "Adiktak in k'ung hilh ahi, tuni`n ka kiangah paradis ah na om ding hi," achi hi.

Khristian kichi zousiah in, lam tuamtuam ah Jesu Khrist i kineppih chiat uh hi, chih pen theihsa ahi hi. Jesu hunlai a Ki-sahkhomisak or ki-Pasianmisak diak pawlkhat in zong Jesu muhchian ut uh ahihman in Jesu pen, Singlamteh tung a pan a kihunkhia diing in ngen ua, tualaitak in Jesu kihunkhia henla, a singlamteh a kipan in hung kumsuk leh bangchibang in a gen or gingta diing uai? Chih pen i genthei kei uh hi. Taanglai peveng a kipan in Pasian in, A bawlsa mihingte'n Amah a theihna diing un Siampute leh Kamsaangte a na zangh a, a tawpna ah Amah Jesu min pua in a hung pai a, nna zousiah bukimna a hung bawl hi. Jesu'n a nna sep diingte a zawh nung in, Sawltak liante zangh in nna sem a, tuachiin mihingte a diing in Laisiangthou (Bible) a hung pia a, hih Bible ah Amah (Pasian) theihna mihingte'n a neitheihtaak man un kilaakna om nawnlou hi. Tuni in eite'n hih LST (Bible) i khut uah i tawi uh hi. Hih LST (Bible) tawi kawm-kawm in Pasian pen ahilou lamlam a kineppih tamtak a ki-omthei mawk hi.

Jesu Veilam A Kikhaipa Talawm! Na Chi Hiam??

Jesu veilam a kikhaipa pen a mawhna ziak a khailup diing a om ahi a, kihut-theihna diing omlou, kipanpih diingdan zong omlou, a tawp tung ahita hi. Hibang a hinkhua a kinepna zousiah bei a, lungdongtak, chimawhtak, leh lungkhamtak a a omlai in a gei nainoukhat ah Jesu, Pasian tapa om hi, chih a phawk or a thei a, tuachiin, 'Ka mawhna sihpih diing hitangh, a si diing a lawm mawng hitangh, ka khelhna in keimah hung man a, tu a sih ngak hitangh e Toupa, Pasian tapa aw,' chilou in, 'Pasian tapa na hihleh kihunkhia inla, kou zong hung hunkhia in,' chi hi. Aziak pen ama'n a taksa thuakgimnate bek a mu a, a kha a diing ngaihsut lou hi. Ama'n a poimawh pen ahihleh a lei taksa hunkhiat diing ahi. Hilezong Jesu pen eite lei taksa hutkhiatna saang in kha hinna a hutkhiatna ah a lungdamzaw or a kipaakzaw ahi diing a, a veilam a kikhaipa hunkhe lou hi. 

Hih Jesu veilam a kikhaipa  bang in eite'n zong, i muhtheih uh kisapnate kibuaipih a, i muhlouh uh kha hinkhua a taaksapnate kibuaipih lou deuh hileh kilawm hi.

Jesu veilam a kikhaipa mah bang a, eima khelhna mulou a, or eima mawhna mulou leh theilou a, Jesu kiang a i leitung taaksapnate ngen diing pen awlsam mahmah hi. 

Na lei taksa hinkhua saang in na kha hinkhua ah Jesu a lungluutzaw hi chih mangngilh kenla, na kha hinkhua limsak masa in, tua hileh a dangte Jesu'n hung ngaihtuahsak diing hi.

Bangteng hileh Pasian lam ah kileh thak ni, Matt. 6:33, Pasian gam leh a diktatna zong masa un, tua hileh hite tengteng zong a hung piakbehlap lai ding hi. 

TOUPA'N THUPHA HUNG PETA HEN…..

Share: