Interview: Nitin Thusoh Founder toh Zogam Today houlimna

EIMI ZO SUON -- Chin-Kuki-Mizo-Zomi sunga WhatsApp Group chi tuom vilvel banah atuoma "apps" zong kinei NITIN THUSOH (Daily News) Group kichi khat um hi. Moreh khuo a um Nitin Thusoh Founder Mr S. Lien Mate toh Mr Bruce K. Thangkhal, Joint Editor, Zogam Today houlimna tam anuoia bang ahi.

Zogam Today (ZT): Interview thei dia phat nei pe jehin kipahthu ka hin sei e.

Nitin Thusoh (NT): Kei le ka tohkhompi ho jouse jong kakipah uvin, jana chibai kahin pe uve.

ZT: NITIN THUSOH WhatsAap Group hi eimi ZO SUON chate --CHIN-KUKI-MIZO-ZOMI lah a eimi News App nei masapen hidin gin chat a umin, ahung kipat dan nei seipih thei dem?

NT:  Nitin Thusoh tia WhatsApp News Group ahung kisem doh pan nikho hi 31st August 2015 chu ahin, hiche hung kisem lo nahi WhatsApp group chu eiho lahah tampi ana um tajongle I gamsung thusoh ho, Vannoi thusoh ho hetna, kijah mat nading deisah najal a hung kisem doh ahi.

ZT: NT apps (applications software) khu kon a bawl, sum ijat lut a?

NT: NT apps (applications software) pen hi keiho Staff lah a jao Sir TC Baite in asem ahin, Sum hi Rs 30K tabang kasu lut uve. Chule hiche apps hi Website kisem masa a, apps a convert ahinbol ahi. Ahung kibol pat a date hovang kahe tahih e. Chule Apps le website hi renew bolkit ngai ahin sum phabep lutding ahijih in, sum hahsat jihin chomkhat tadi manlouvin kakoi taove.

ZT: Nitin Thusoh Admin/ Staff Writer/ Correspondent ijat pha a, ipipi na buipi pen uva?

NT: Tutu in NT Staff hi munchom cheh, gamkai chom cheh a kon Correspondent, Writer kigom in mi 50 tobang kaum un, hiche lahah hin main Editor khat kanei uvin, keima cheh umna gamhoa konna thusoh mipi hetthei ding aumji teng hung kilakhom a mipi hetdia hung kisodoh ji ahi.

ZT: Koi ham tuletu a Main Editor?

NT: Goutinlen Gangte

ZT: Tuni 29-04-2020 chan gei in NT in WhatsApp Group ijat anei a? Chule, subcriber ijat hidem?

NT: Tuni chan hin NT in WhatsApp News Group 39 a kon in member 8240 val aumin, NT Discussions Group, NT Guitanlou Group etc jong akineiyin, Facebook Group ah 24K, FB Page ah 5.2K tabang aum e. Chule NT Assam state a din atum in akisem in, Group 7 aum in, chule Member 1500 tabang apang uvin ahi.

ZT: Nitin Thusoh Staff ho khu sum-le-pai ah iti na ki-manage uh hinam?

NT: NT Staff hohi sum mu na ima akineipon, nam mipite ding gelna a phat pedoh a thuso mijousen aphatcha a ahet theina dinga kipedoh cheh joh ka hiuve.

ZT: NT in ni khat ahilouleh lha khat ah sum ijat a mang chai pha vem?

NT: Sum muna ima aumlou jehin ijat expenses tihi seitheiyin aumpon, ahin Editor hi salary 3000/- kisempeh ahijeh in, kahkom le namsunga kineppi mihongphal khat le ni jal a kipedoh hamham ahi. Chuban ah, Editor lhalo hi aboi behseh teng NT Staff hon keima cheh pocket money a kon kadon khom uva kapeh jiu ahitai.

ZT: Nitin Thusoh Group ah ipi thu kiha post penji a?

NT: Thusoh (daily news) hi akiha post penne, adang article, thusim chule advertisement hojong mipi'n neiso peh uvo tichan chu akiliem in akisopeh jin ahi.

ZT: Nitin Thusoh Group khu regular tah a na update jou uhi pahchat na um uve. Readers hon ipi lunggel anei uva?

NT: Pachatna awgin akiha jah jing nai. Hinlah kahkom a suhkhel melchih lhi keiya Staff ho hin houpi jong aumji thouve.

ZT: Nitin Thusoh Group min in Social Work ahilouleh mi gentheiho panpi tiho na bawl kha uva, nei seipih thei dem?

NT: Nitin Thusoh hi income source neilou kahi jehuvin tuni chanin NT minin mimal hihen organisation hijongle kithopina hi ka bolkha behseh pouve. Tuchung Chassad boina a chun NT minin jo kham kham in pan ana kila in ahi.

ZT: NT Group in Police Case/ Complaint a tohkha tam?

NT: Pathen jal in atohkha naipoi.

ZT: Nitin Thusoh Award in ipi a tup ham?

NT: Nitin Thusoh in namsunga Award akibol hi ei Kuki Namsung lunggel kito nading, kilungkhat nading tohgon ahiban ah, ei le ei kichoisang ute, kidomto ute, kipahcha to ute tihi athupi pen a kitup a kichepi chu ahi.

ZT: Nitin Thusoh Award khu iti selection kibawl ham?

NT: Awardee hi hijat ti mong aum poi, kumseh a kalji ahi. 2017 Moreh ah Awardees (amutu) 18 aum in, 2018 D. Phaihel ah Awardees 20 aum in, ningkum 2019 Maitiyang Ccpur munna ah Awardees 23 aum e. Akivet dan hi ahile Film ho hi Jury Board kilhenga amaho chun avetlhah u ahi in, adangho chu Public Voice a kive ahi tai.

ZT: News iti na collect uh? Nang ho in news na kisep uham?

NT: News hi Staff in produce ka kibol ujong aum in, chule state news, national, international news hoa kon a mipi hetdia pha kasah houjong eiho pao a kahin ledoh uva hung kipost jong aumji e.

ZT: Nitin Thusoh Group ah kon overall incharge apo ham? 

NT: Overall a mopo kakilheng chom deh pouve. Ahin kum 1 sunga staff lah a hoitah a panla a kimang cha ho chu atum in Kipaman (Award) ka kipeh jiuve.

ZT: Nitin Thusoh Group in Guidelines anei hinam?

NT: Nitin Thusoh Group in Guidelines akineiye. WhatsApp group hi atam jehin member jong atam tan, mipi lunggel kibanglou akihi jehin group jouse ah member comment off akibol in, Admin/Staff bouvin thusoh ahilou le member ho mudia phaho share akibol peh e. Chule kivaipoh dan hi NT Staff sungah lamkai kilhenna aumjin, kum 1 lhinseh le akilheng jiuve.

ZT: Nitin Thusoh Group in lhaseh le mobile recharge ah ijat a seng pha dem?

NT: Staff jouse panla akihi jiehin ijat chet tivang kasei theipoi.

ZT: Nitin Thusoh in hasatna sei nom anei em?

NT: Ahahsa pen a kato u tiding hi mipi dia thuso ahung kondoh na Editor lhalo hi ahipenne.

ZT: Nitin Thusoh in Group akon sum muna a nei am?

NT: Nitin Thusoh in Sum akingai chat na a ahongphal khat le ni koma thum tilouvin a choma sum muna ima akineipoi.

ZT: Nitin Thusoh Group news ho eimi newspaper hon a sohji uva?

NT: Henge, akibang jong aum ji e.

ZT: Nitin Thusoh Group ah Subscribers hon ima post theilou, ipi je ham?

NT: Thusoh ahung konna kichehlou, Copy & Paste tia hung kiso jiho, thudih lou seiya mipi kilhepna, boina thei ho atamjeh a kikhah ahi. Hiche toh lhonna NT in thusoh khat chu kikhol chil a athudih, thutah ahile bou mipi mudia kisodoh ji ahi.

ZT: NT Group in Fake news toh kisai in thubuoi a tuo kha ngai em?  Itih a het khen am?

NT: Fake News thu'ah Pathen jal in Nitin Thusoh injong akisokha pon, tuchan in boina akitoh poi. Fake ahile ahilou hi thuso khat ahung kimu teng, agamkai miho kijahmat pi a kholchil na kinei masa ji a, adihnai atiule kisodoh a, adihlou ahile kisodoh jilou ahi. Hijih hin thuso lamah NT hi aki vaigei ji in, ahin thuchen akikhol lekah a ki mang jep ji ahi.

ZT: News ho khu iti cross check or verification na bolji uva?

NT: Nitin Thusoh Group in News sodoh ding ho koikhomna group khat "NT NEWS COLUMN" ti kamang uvin, thusoh ho Staff hon ahinkoi khom ji uva, kive cheh jia apha tai titeng hung kihomdoh ji ahi.

ZT: Nitin Thusoh in Group ah Fake News a post kha ngai em? 

NT: Fake News umlhalou.

ZT: Mi in Nitin Thusoh Group Admin/ Correspondent/ Writer ho phone recharge abolpe ngai em? 

NT: Masang jep chun NT Staff ho kithopi nadin koi tabang group a advertisement bolding hon kithopi na in recharge eihinbol peh hen ti kana sei uvin ahile hiche laichun member ijat ham in ana jui in kakipah lheh uve. Chule atum a Staff jouse kithopi na a recharge ana bolpih jong aumkha in ahi.

ZT: Social Media khu i phatchompi or setpi uham? 

NT: Vannoi khantouvin ihinphah utoh kilhonna eiho jong hiche phat sunga um ihitah jih un, Social Media hi iphatchompi pi uve kati nom e. Hinlah mihem lunggel kikibang lou ahijih in, akimkhat in setna tah a mangjong aumda pon, 85% tabang invang iphatchompi pihlheh uve.

ZT: Social Media phatna leh phatlouna point 3 nei seipi thei dem?

NT: APHAT NA: 1) Gangchella thusoh lasoh ho hetbaina ahi. 2) Man beiya news sim jing thei ahi. 3) Het khahlou loile gol kisemna jong ahi. APHAT LOUNA: 1) Emut suboi. 2) Simlai ho lekhasim suboi. 3) Insung mite phat kipe man ta lou.

ZT: Hou innsung a mobile polut pha ham phallou? Ipi jeh?

NT: Hou Inn sunga Mobile phone pohlut hi apha in kagelpoi. Akimkhat in Switch-Off/Silent Mode a jong koi theilou, ahilou akoi ding haimil aumjin, abang khat chun mipi kikhopna a Camera man dan a photo, video record bol a mi sunohphah in apang bep e.

ZT: Khenkhat in mobilephone khu Bible vetna/simna bangin a mang uve, hichi hi pha nasah nam?

NT: Pha kasah e. Phone ahivang a aphalam bolna a neipa dia ama phatchomna ahijih in, ase in kagelpoi.

ZT: Nitin Thusoh in Group asembe gut nam?

NT: Member apunbe dungjuiya group punbe sah thei mama chu ahin, hinlah mobile phone khat a WhatsApp group 50 above ho akiman teng phone aboi gam jin, hiti hojih hin group thah akisembe nompon, Group a jaonom a pending a kiumsah jong aumji thouve.

ZT: Nitin Thusoh in maban ah Award a bawl gut nam?

NT: Nitin Thusoh Group in namsunga kipapih dinga lom ho kipapihna ding platform khat ahung kigon hi chejompi a, ningkum, kum masa langa sanga hoiyo cheh a boldoh beding hi lungtup chu ahijing in, hinlah mipi/nam mite support ahilou le NT in ijat in kipaman kihom jongle phachom in kagelpoi.

ZT: Coronavirus/ Covid-19 chungchang a fake news hohi ipi ngaidan nanei am?

NT: Coronavirus hi natna gimnei, anisih a mihem hinkho asang sanga sumang natna ahin, natna jih hin vannoi mitin akicha in, alung lingalo gam in, hijih hin Thuso dihlou (fake news) manga mipi lhem chavai, kichatsah hi aphalou tah ahijih in, thudih lou seilou hiel aphai.

ZT: Nitin Thusoh in Group "Media Ethics,  Privacy Rights, Copy Rights, Human Rights,  Information Technology Act 2005" ho hi ichan a importance a pe nam?

NT: NT Media in North East News agency toh kitho pumma Media Ethics kichepi ahi in chule koitobang hi jongle keihoa konna news kilah son nom chan in kilah henlang keiho in kahin jihdan u "Correspondent" (news source/ reporter) min hi eisuh mang peh da leu kipa um inte.

ZT: Nitin Thusoh in ipi "plan" a nei em?

NT: NT in maban ah tukhanga vannoi khantou natoh kisaiya Social Media a kon thuso lama panlah akichejom pi jing nom in, chule Award kibol nachunga jong mipi deisah ahile ahoijo cheh a boldoh ding lunggel akinei jinge.

ZT: Nitin Thusoh logo a "Inform to be alert" khu ipi vetsahna?

NT: Kiging jinga um ding tina ahie,  hiche chun ipi avetsah ham itile itih phatle ikom ivel inaiya itabang thilsoh hunglhung ding ham kihe lou ahi in hijehchun Nitin Thusoh hi Media khatna kichepi ahi tah jeha Mipite jouse Media ho kigin keu hilouva midang jouse jing kigin jing ding ti vetsah ahi.

ZT: Tulai minu, mipa chuleh nungah gollhang ho "mobilephone" man dan uva sei nom na nei em?

NT: Mobilephone hi eima cheh in ikichoi uva jatchom/ lamchom cheh a iman u ahitan, ahin social media a apha hile aphalou hileh eima dei cheh seitheina iman uhi akijenna tah um jongle milah a aphalou leh mi ngainomlou seiya kilop kei sanga in ihina toh kitoh bep a apha a ihet hojoh hasei nale manna a inei diuvin ka tiem nom e.

ZT: Smartphone khu eimi ho dia setna khat ahe, nati nam?

NT: Smartphone hi ase a mangho din asetna tam tah sethei hijong leh apha lama mang ho jal in eimi hodin setna in kagelpoi.

ZT: Social Media mangchan i society uh semphat thei hidem?

NT: Namsunga lamkai, miching, mithem hon Social Media lah a Nam phatchomna ding asei jihou, Pathen thusei ho thusei ilah thei uva, ijuithei cheh teng ule semphat nachu ichan diu ahi. Chule lamkai thungai le lamkai thusei jouse (dih le dihhihle lamkai thusei ahinai tia tosot a juiding) ijuicheh teng uleh kitona um intin, kilungto na aum teng namsung hatdoh ding ahi.

ZT: Social Media mangchan itin Government in gamsung khantouna dia development scheme chomchom ape doh ho kholchih thei ahi dem?

NT: Govt. injong gamsung khantou nadia development jat chomchom ho Social Media ma a ahin seiphong le ji u ahijih in, a kholdoh nomho din hahsat umbeh ponte.

ZT: Social Media mangchan itin "corruption" kidou thei dem?

NT: Social Media a konna corruption doudal ding dan hi aseidan le abolding dan jong hahsa kasah jep e. Ajih chu corruption bolnom hon jummo henhun a abolteng ule abol ahitan, athua Social Media lah a ijat a sei vanga pha chom la hikit lou.

ZT: Tuchung Lockdown jehin Hou Inn ni ijat aki kai ta pon, hichi a kon a Khristian hon ipi pan ila thei diu vem?

NT: Lockdown jih a Hou Inn kikhop theilou man a Pathen ihou nao lhahsam nading aumpon, pan ilah thei napen uchu eima cheh i-insung mitoh kitoh tah a Pathen houkhom a, chule Pathen a peh dinga lom Hopsom, Maicham hovang suhmang louding ahi.

ZT: Coronavirus chung chang a Manipur Govt panlah dan pha nasah hinam?

NT: Henge, pha kasa lheh jenge.

ZT: Covid-19 douna a eimi society ho pan lah dan a nasei nom um a?

NT: Covid-19 natna a kon kivendoh nadia eimite chenna chan a i society hou panlah dan pha kasah lheh e. Kaseibe nom chu, natna a konna kivendoh nadia lampi khah a mipi nopnop a vah, tiho vang phachom din katahsan poi. Kivendoh nadinga Govt in thupe aneiho phatah a ijui diu bou apoimo pen in kagel e.

ZT: Hichi interview ana sim ana mu ho din ipi thu na vailhah nom em?

NT: Zogam Today in interview eihin bolna chung uva mipi henga seinom chu, mihem khat a Pathen in ei pensah hile eiman ibolthei ipi ham, eiya konna i nammi phatchomna thei ipi na boldoh thei em, tihi ahi. Nitin Thusoh hin lamkai hohi chapang chacha, kiloikhom chu kahiuvin, tuni chan a ka  nam mite dia ka panna theipen u, kabol theipen u tia social media mangcha a thuso kahin boipi u ahin, nang injong nam mipi a dia APHA khat nabol doh a, APHA ibolcheh teng ule aphalou/ase chun min nei taponte.

ZT: Interview phat nei peh jehin kipahthu ka hin sei e.

NT: Keiho jong kakipah lheh uve. Zogam Today damsot hen!!

Courtesy: Zogam Today [May 3, 2020 | Pg.2 & 4]

Share: