HEHPIHNA HUN A OM MITE’N HEHPIHNA THEISIAMLOU?? By: Pastor Thangdoulal

HEHPIHNA HUN A OM MITE'N HEHPIHNA THEISIAMLOU??

By: Pastor Thangdoulal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

BIBLE: Eph. 2:8, Hehpihna  ziak a ginna (taksanna) tungtawn a hutdam na hi uhi, huazong noumah a suak a hikei a, Pasian sil thawnpiak ahi.

Khristiante or tulai a Saptuamte pen, Hehpihna hun a om/ding i kichi ua, eima hoihsakna bangbang in hehpihna hung pia Pasian i bia uh hi. I Pasian biakdan uh a dik leh diklouh pen thutuam hitaleh, Jesu Khrist tungtawn a Pasian hehpihna saang or ngahte i hi uh hi. Hih Pasian hehpihna nuai a I omkhaakdan uh hih a nuai a bang ahi.

Hihpihna nuai a om i hihdan uh i theihsiamna diing un, hih a nuai a HUNBITE i en diing uh hi:

1. Mawllai Hun (Innocency): Hih hun pen Adamte hunlai ahi a, hih hun a Pasian in mihingte a etkhiatna ahihleh, thumanna ahi. Tuachiin Adam in thu na manglou ahihman in tuni dong Adam a pan a i buahbaannate uh kisuut tulmawh hi.

2.  Sia-le-Pha Theihna Hun (Conscience): Hih hun in Kaina a pan in Noah tan a huap hi. Hih hun a Pasian in mihingte a etkhiatna ahihleh, Kithoihna ahi. 

3. Mimal Kivaihawmna Hun (Civil Govt.): Hih hun in Tuiziin tunzaw a kipan in Babel innsawng dong a huap hi. Hih hun a Pasian deihna ahihleh, Leitung luahdim diing ahi a, Tualthatte pen Thah kiik teitei diing chih ahi.

4. Thuchiam Hun (Promise): A huap sung Gen.11:10-Ex.18:27 ahi. Hih hun a Pasian deihna ahihleh, Pasian thuchiam gintat diing, Thuman diing, A nna sep diing ahi.

5. Daan Hun (Mosaic Law): Hih hun in Ex. 18:28-Nas.2:1 tan a huap hi.

6. Hehpihna Hun (Grace): Hundangte ah hehpihna omlou chihna hituanlou in, hih hun ah Hehpihna kichingtak in a omzaw chihna ahi a, hih hun in Nas. 2:1-Kil.19:21 tan ahuap hi. (Hehpihna tawh Pasian in nna sepna ngahte or saangte'n (piangthakte) Hehpihna mah tawh Pasian nna a sep diing uh Pasian kinepna ahi).

Hih hehpihna hun ah, Saptuam dinkhiat in a om a, hilezong a mawk dinkhiat hilou in, Jesu sisan a leisa ahihziak in, Jesu taksa zong a kichi hi. Eite zong saptuam hun or hehpihna hun a om i hihziak un, Hehpihna in i hinkhua uah thuneihna or panmun a nei ei? Chih ki-enthak lehang deih-huai i sa ua, tua diing in hih a nuai ate i simkhawm diing uh hi.

1. Hehpihna Nna Sep leh Eite Nna Sep a Kituak Hiam?

1.1: Hehpihna Nna Septe En Masa Ni:

Hehpihna ziak a hutdamsate or hutdamna ngahte i hi uh hi (Eph. 2:8-9). Hehpihna ziak a Pasian ta hihna tang/ngahte i hi uh hi (Eph. 1:5,Gal. 4:5-7; Jn. 1:12). Hehpihna ziak a thupha ngahte or hamphatna mu-le-tangte i hi uh hi (Rom. 11:6). Hehpihna ziak a Khasiangthou piak a omte i hi uh hi (Zech. 12:10; Jn. 14:16-17; Jn. 1:14). Hehpihna ziak in zahngaihna i ngah uh hi (Heb. 4:16). Hehpihna ziak in neih-le-lam (Gou) i neithei uh hi (Nas. 20:32). Chihte leh a dang tampi a omlai a. tuate i genkim kei diing uh hi. Hih Hehpihna ziak a Pasian in nna hizahpi a hung sep a, Pasian lungsim zong Hehpihna in hizahta a a zawh leh, nang leh kei lungsim zong a zawh diing ahi.

1.2: Hehpihna in na lungsim ah mun a nei hiam?:

 Hehpihna in Pasian lungsung ah nna sem a, or mun nei ahihman in, Pasian in hih Hehpihna ziak in Adamte a diing in kithoihna a na bawlsak a, belaamvun tawh a na tuam hi chih pen mi zousiah theihsa tawh kibang a ngaihtheih ahita hi.

Tuni in nang leh ken hehpihna ziak a i sil hoih bawl sim diing hilehang khat beek a om diai? 

A si diinglai Hehpihna ziak hutdam or panpih i neite uh hiam? 

Neek-le-dawn diing tasamte kiang ah, Hehpihna ziak in bangzah i peta uai? 

Na sung a om Hehpihna ziak in, mi dangte a diing in Thupha na hita hiam? Khotuahna ngah diing a zong chinglou khat, na hehpihna ziak a khotuahna ngah a omta hiam? 

Zahngaihna tang diing a kilawm lou khat, na Hehpihna ziak a Zahngaihna tang a omta hiam? 

Na hehpihna ah, mi genthei khat beek in hinna a muta hiam?

A TAKTAK A CHIH IN:

Na antangham hamte, Hehpihna ziak a na ham ahi hiam?

Na sawm-a-khatte, Hehpihna ziak a na piak ahi hiam?

Hehpihna tawh na innsak-innkhang na it taktak hiam?

Na lungsung ah Hehpihna in mun a nei taktak hiam?

Pasian Hehpihna ziak a na ngah zousiah, damnate, hinnate, zun-le-ek tha-thei a na omnate, nethei dawnthei a na omnate, huih diik a na hinkhua na zakdante, tu-le-ta na neihte, leh na neih zousiah ama'n (a fee) piaksawm lechin na pezou diam? Piakhak mahmah diing hi. Bazar mun khenkhat ah, ekthakna mun zakman India sum in sawmnih ahi a, tua zong na ek na thak-theihna diing a, na sung-le-lai hung leptuaksak uh hilou hi. Pasian Hehpihna ziak a hibangteng ngah a, tuchiang dong a kalsuanta na hihleh, nang zong hih Hehpihna tawh nna semlou diing maw?

Tangvaal in Nu-ngak a ngaihna pen nu-ngak in zong na theisiam saam hi. Hilezong Pasian in eite a hung ngaihna leh a hung itnate eite'n theisiamlou hilehang kilawm mahmahta ahihman in i Saptuam kivaihawmnate uah Hehpihna muh diing tamlou a, i Pasian nna senate uah zong Hehpihna muh diing tamlou hi.

Hehpihna ziak a Pasian nna septe tungtawn a tu na dinmun a dingta na hihman in, nang zong hih Hehpihna mah tawh nang hung Hehpih masa Pasian itna tawh Hehpihna nna sep panta lechin hoihlou diing maw?

Hehpihna ziak a tu na dinmun a hung dingsak Pasian phat in om henla, Nang zong, Hehpihna mah tawh tu a kipan a kalsuan diing in Toupa'n Thupha Hung Peta Hen.

Share: