GIN-OMNA By: Pastor Thangdoulal

GIN-OMNA

By: Pastor Thangdoulal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

BIBLE: Jn. 5:19 Jesu`n akiang uah, "Adiktak in k'ung hilh ahi, Pa'n a bawl amuhte chih louh Tapa in amah thu in bangmah a bawlthei kei hi, Pa'n a bawlte mah Tapa in zong a bawl ahi.

Gin-omna chih kammal pen, 'Pasal khat in a silate khat muntuam a a sawl a, tua sawl a om sila in a kisawlna bang a a omna pen gin-omna ahi,' i chi masa ut uh hi. Pasian in a tapa tang neihsun, leitung a eite hundam diing a a hung sawl a, Ama'n a kisawlna bang a eite a hung tatna pen gin-omna ahi (Jn. 6:38; 14:31). Pa khat in a tapa nna sem diing a a sawl in, a tapa in a pa sawlna bang a nna a vasepna pen gin-omna ahi. Saptuam pen Jesu sisan a phuhkhiat or kilam ahihziak leh Jesu Khrist taksa ahihziak in Jesu tawh kisuun or kibang a om diingte ahi masa phot hi.

Pasal khat in ta a neih leh, a inn veengpa tawh kisuun or kibangkha laizang ahihman a lungkim lou or lungnuam lou chihbangte bawn a ki-omtheih leh, Jesu Khrist tawh kisuutna or kibakna a neilou saptuam tung ah Jesu a lungkim diam? Saptuam pen nang leh kei i hi uh hi. I tung uah Jesu a lungkim diam? Chih pen mi zousiah in ngaihsut thei lehang i Pasian zong lungdam deuh diing in ka lam-en hi.

PA TUNG A TAPA GIN-OMNA LEH EITE A A KIBANG HIAM? 

Jn. 16:28 'Pa a kipan a hung paikhia a, leitung a hung pai ka hi, tualeh leitung nusia a Pa kiang a paikik ding ka hi,' achi hi. Jn. 6:38, Aziak pen, kei deihlam bawl ding a vaan a pan a hung paisuk ka hikei a, ahung sawlpa deihlam bawl ding a hung paisuk ka hi zaw hi. Jn. 10:30, Kei leh ka Pa pumkhat ka hi uh," achi hi.

Jesu'n ama utthu in bangmah a bawlkei a, a lunggulhna, a deihna, leh a tupnate tengteng pen, Pa a kipan vive ahi a, a nna sep zousiah zong Pa deihna bang a a sep ahi. Hilezong mi khenkhatte'n theisiamlou in a dem or a housie ua, dawikungpu chi a kou pawl tawh a na kitek uh man uh hi. Jn. 8:49 ah, "Jesu`n adawng a, Dawi paai ka hi kei a, Ka Pa pahtawi ka hizaw hi, nou kei n'ung pahtawi kei uhi," a chi hi.

Jesu'n ama utthu leh Ama deihbang a nna a seplouhna ziak, or bangmah a bawllouhna ziak ahihleh, eite kisinna diing, eite'n zong Ama keengkhaap i zuih diing uh a deihna ziak ahi a, hilezong hih pen eite'n nna hakpi daan in i ngaihsun mawk uh hi. 1Pet. 2:21 ah Peter in, "Huachibang bawl ding a sap nahi ua, aziak Khrist in zong akhap a najuih ding uh, na etton ding uh hung nutsiat in eite tangin a nathuakta hi (TK. NT)," a chi hi. 

Eite zong Khrist tungtawn a or Khrist a i ginnate uh ziak a tapa hihna ngahte i hi uh hi. Gal. 4:5-6 ah Paul in, "Ta hihna i tantheihna ding a, daan nuai a omte tankhia ding in Pasian in Amah (Jesu Khrist) a hung sawl hi. Tualeh ta na hih ziak un Pasian in a Tapa kha, noute lungsungah a hung sawllut a, tua Kha mah, "Abba Pa!" chi-a kikoukhepa ahi," a chi a, tualeh Rom.8:15 ah zong, "Launa nuai a koltan kikna Kha tang na hi kei ua, ta suakna Kha tang na hi zaw uhi. Tua kha ziak in "Abba Pa!" chi`n i kikou hi," a chi hi. Hibangteng ahihleh, nang leh kei zong Pasian tapa suakna or hihna tangte i hita ua, Jesu'n Ka Pa a chihbang a, Pasian pen ka Pa chihtheihna diing hamphatna i neita uh chihna ahi. Tuaziak in nang, Jesu bang in Pasian thu na mang ei? Leitung ah Pasian lungsim leh agenda or tupnate na paipih taktak na hiam? Na omdaan in Pasian tan a hihna kichiantak in a kilangsak diing a, nang mahmah zong, Pasian tanu or tapa na hihleh hihlouh tu mahmah in zong na kitheita diing hi. Pasian ta na hih leh Pasian deihna, or agenda or tupna tawh na leitung hinkhua zang in, tua hileh nang diing in a nuam diing a, Pasian a diing in zong a lungdam-huai diing hi. Pasian ta hi a na kitheih keileh, Pastorte or Pasian thu a khanglian na muante khat naih inla, Pasian ta hihna diing lampi kihilhsak in. Toupa'n hung ompih diing hi.

JESU'N PA TUNG A A GIN-OMNA A KILATSAK DAAN LEH EITE A A KIBANG HIAM?

Jesu'n a gin-omna A Pa tung bek ah a kilangsak kei a, hinanleh a nisial hinkhua a a kigawppih, a kihoupih, leh a kimuhpihte tengteng tung ah zong, A Pa tung a gin-omna kilangsak hi. Jn. 4:34 ah, "Jesu`n akiang uah, 'Ka ann ahihleh, hungsawlpa deihlam bawl leh a nna sep zoh siang ding ahi,'" a chi hi. Matt. 10:40 ah, "Kuahileh nou hung kipahpihte pen kei hung kipahpih ahi ua, tualeh kei hung kipahpihte pen kei hung sawlpa kipahpih ahi uhi," a chi hi. Tualeh John 5:23 ah, "Mi tengteng in Pa azah bang ua, Tapa zong azah ding uh ahi. Kuahileh Tapa zahlou in a sawlpa Pa zong azah kei uhi," a chi hi.

Eite pen, Pasia awidaan siamte i hita diing uai, i gin-omna uh Pasian kiang bek hileh kilawmtak bang in, Pa tawh pumkhat i hihna uh i kilangsak or i phuang ngamkei uh a, i nisial hinkhua uah zong Pasian meel kilatna diing omlou khawp in, Pasian deihna, Pasian agenda, Pasian tupna, leh Pasian ngimnate muh diing vaang mahmah hi. 

Jesu Khrist tungtawn a Pasian tapa or tanu na hihlam theizing inla, na hinkhua ah Pasian kilangsak in. Pa tawh pumkhat na hihna mangngil lou a, hindaan thak a hung hingthak diing in, i Toupa Jesu min in i ki-ngen un, i kichial uh hi.

TOUPA'N THUPHA HUNG PIA HEN…   

Share: