COVID EXODUS LEH MABAN! ~ Major Muanpi

COVID-19 natna jiah a gamsung pumpi lockdown a um jiah in muntuam tuam a company vel a nasem a kilawh tawm te'n hahsatna liantah tuah ua, innluah man piah joulou guah hinonlou in tun neh leh taah lam Jong buai veng vung panta ua, lockdown pen MABAN a Jong hing umzou tou ding abat jiah in pianna Zougam lunguulna tha hing piang a, tuun anglum ngainat na hing um in, koipou in innlam ah ki um leh nasep ding a umlou tawp in Jong innluah man kipelou ding a, neh lam pang pen kingawl Sam lou ding chi lungeel neita uhi.

Bible a tapa taimang pa'n 'aw thou vang in kapa sianglam zuankia tavang kama meipi bang in jing e' achikhu hing tung bangmai ta hi. Ahoina tampi um nanleh asiatne te'n ahoina te lekhup Zou mama ahi.

Nasep thei lai a MABAN ding khual lou kei a 'mu masat, neh masat' a neite buaidiah in kilang uhi. Khungbai nu anehding aneilai in laam2 a khua ahing siat tah in meshi nu kom ah Ann nehding ngen in vatau chia khanglui thupil khu adihna tampi mukhiat in hing umta hi.

I Zougam pen gamnuam leh leihoi mama ahia, hinanleh asung a teeng Zou tate'n nual in kawlgam vaigam zuan in inuahsiah Siang ua, akhen te bang nasepna mun apat suty mu nanleh innlam hindan Ning kitel in painuamlou zel uhi.

Neulai a Zoudawn a kimawlna te
1. Igaal a singsat pa te
2. Lut sial sial te
3. Kang kikap te
4. Chiangphel kimawl te
5. Kuul ngahte kimawl te
6. Suangbuh kimawl te
7. Pehlum/sailumtang kimawl te
8. Khaini bawm/kokta kimawl te
Leh kimawlna chituam2 te athah a hing umtha ding bang in kangaisut a, neulai geeldoh huai a, lunghel Jong huai kasa ahi.

Tami Wuhan virus ivei in iveilou tah in Jong eigam ah pen koiman Jong zauseng lou in agingta lou kitamzo nalai dan ahia, igingtat lou laitan in a umlou ahimai a, lungnuam tah a hinkhua man pen ahoipen khat ahi.

Imi isate hoitah mun2 a um ahi uai chi tambang buaina apat in hing kithei doh tha2 a, india gam pumpi Hindu kuulmut te tamna Gujarat lah tanpha leh kolham Jong theilou south india lahvel a tampi ki umta chilei.... Manipur a census kilahte sang in nahpitah in akitam jo de aw chithei khat ahi.

Bang teng hitaleh... Gamtuam a umteng innlam hing tung nan uleh Jong sum leh paai hing tut sang a baki a hingpei tamzo ding ahijiah un, lungeel siam va ui in, MLA leh MDC te biahsiam dan ngaituah jova ui. Tuachilou in gamsung pumpi lockdown 4.0 hing umbeh nalai ding ahia, corona sang a kialrona a shi leh mang bang hing tam joding ahi.

When you are in Rome live like Romans chi thupil zat hunta ahi. Innlam ah pen louho leh singsat ban ah meihol hut chite lou ngal tutan in nasep nading um nailou ahia, kolgam bang a teddim road lahtuam a kolte dukan khat pou2 ah kisem zual heh chi ding umlou ding a, kani lei bawlteng lah khol sing phot, relief anntang Jong aki sot homzou sih ding a, MLA te'n Jong azou-azai in hing enkol zoulou ding ahi jiah un mahni kipat ma hing ngai ding dan ahi.

Atawpna ding in, koipou in ibiah Pasian theijing kom in laisim apoimawh dan leh MABAN ah Jong tambang buaina te hing umtou jing zel ding ahi chi lungsim tawng a geel jing kom in SAVINGS lam ngaisah vai in, eima innsung dinmun leh khotaang hinkhua dopkang nading in theitawp in panla jing vai.
===0===

Share: