Covid-19 Vei: It a om ka hi

~ Vungbiaklun
    Staff nurse

Sir Ganga Ram Hospital, New Delhi a staff nurse kum 3 vel ka semta hi. Khovel in a buaipih mahmah Covid-19 hong pungtou jel in ei gam natan hon jelta hi.  Kou hospital in leng covid hospital bang bawl in huai a duty ding kisep jel hi. Kei leng ni 7 sung duty ding dia seh in ka om a, April 15, 2020 apat April 21, 2020 tan duty hoihtak a  zou in 14 days home quarantine din ka omna, Shadipur ah ka om hi.

Ka quarantine period a bei di ni May 5, 2020 nitaklam in fever ka hon nei mawk a, bodyache chu ni bangzah hiam ka neihsa (14 days room sungah ka om ziaka ka chi naa di kisa a ka ngaihsaklouh ahi). Huai ni a hospital ah pai didan ka ngaihtuah chiangin gari di lemlou in ka pai thei kei hi. A ni nawn 6 May, 2020 in test ka hihsak ua, nitaklam 5:30 PM in result hong suak a, COVID-19 positive kana hita mai! 

Ka lungsim a thawmhau mahmah a, om ding dan leng theizoulou in ka kap topmai hi! Mi tampi duty hi ung a, bangziak a kei sese tung a hong tung ahi de aw, chi in ka kingaise mahmah mai. Lungkhamtak a ka omlai in leng Pathian in kei A ta' dia le chinglou hon ompih den ahihdan awlin ka phawksuah.

Pathian in a hoihna hiai ka damlouhna tungtawn a hon muhsakte:-

1. Ka roommate nu bang ginglou mi  himahleh, symptoms teng ka neih nung inle test dia hon tai vel pih ding lawm hoihtak toh om kana hihi. Amah ka lawmnun leng test a hon nei a (kei ka positive ziaka amah leng test ngai) amah a hong negative, Toupa hoih hina tel e!!!

2. Patient tam mahmah jiak a hospital bed kidaihlou leh ambulance ngah haksatna mun ah ka incharge nu un ann le huan manlou jen in hon buaipih den. Pathian in kei a dia incharge hoihtak honna koihsak chih ka theisuah thakthak hi. 

3. 11:30 pm vel a ambulance hongtung ding chih ahi a, ka inn tan uh sam ngamlou in metro station tan hong pai din ka gen hi. Keichauh a pai di kisa a thawmhau mahmah a ka omlai in ka lawmnun kongkha ding hon chi. Inn apat ka kipat khiak un ka DMS nu un hon call a, i kihou den di ambulance na tung tan hon chi lai!!  Thawmhau hetlou in hospital ka tung thei hi.

4. Kei Pathian ngaihsaklou, thuumna khawng le ka neihlouh hun tamzaw, huchi himahleng Pathian in hon ittu leh hon thumpihtu ding mi tampi hon pia ana hi. Thawmhau a keikia hon omsaklouh ban ah, ka innkuanpihte leng amau chauh a omsak lou in Pastor te leh kuapeuh ana theikha chiang ten delh khawm in thumna toh ana pang den uhi. Noute hon itna tungtawn in Pathain hon iitdan ka chiang semsem hi.

5. Ni 5 sung damdoi hon nesak ua huai ban chu symptomatic treatment hita. Kei a ni 2 apat ka symptoms om nawnlou, kipak mahmah kom in  second sample ding ngakin ka om hi. May 15, 2020 in ki test  a huai ah ka hong positive lai hi. Huai hun in ka lungsim a Bible chang Isai 59 na ah "noute a ding in ka khut te hih tom ahi kei" chih hong lang in Pathian loungal hon damsak thei  omlou ahi chi in, Aman ka lungsim a hon luah dim mahmah.

6. May 20, 2020 ni in 3rd sample test result hong suaka, thumnate ziak liauliau in, a result hong negative ta mai Toupa hoih hi. Toupa' min ka phat a, thupi na tengnteng Amah ka pia hi.

Thuumna  tuh galvan thupi penpen ahihdan ka chiang mahmah. COVID-19 positive ka hih tungin, ka thiltuah ka theisiam thei mahmah kei, himahleh tun Pathian in  A  hon itna leh lainatna ka muh theihna dia hiai natna hon thuaksak ahi, chih ka theih khia a, hampha ka kisa mahmah. Ka lungkham mangbatna leh ka khituite tun Toupan kipahna hon suakgsak. Amah ka phoklouh lai a hon it a hon kem den Toupa  min ka phat ahi.

7. PPE silh a mihing kiven theihna teng in kiveng mahleng bitna taktak jo Pathian kiang kia a a om ahi chih, hon musuah thaksak hi.

Hiai COVID-19 Virus muhtheih louh, Khovel pumpin a lauh mahmah uh, himahleh ei Zomite' lungbuai leh lauthawng in om hetkeini, hon vualzoh pih ding bangkim hihthei Pathian nei ihi. Toupa' i bitna kulhpi, A muanhuai pen sungah kikem sak ni. Akul leh eite a dingin, Toupan ni leh khate zong hon khawlsak ding.

Sam 46 ah Pathian i kihumbitna leh i hatna, mangbat lai a huh pahpah  pa nai gige ahi. Huai jiakin leitung  hong kidang in, mualte tuipi sung pek a kisuan mahleh i lau kei ding uh.

via social media

Share: