CM IN HILL LEADER-TE TOH COVID-19 GENKHAWM

Tribe khat chiet Museum khat chiet Lakh 10 chiet CM in pe ding

Imphal, May 27:  Ana um ngailou a khatveina di'n Manipur Chief Minister N. Biren Singh in tribal leader tuomtuom mi 60 val toh Chief Minister Secretariat ah tuni'n kihoulimna neipi'n annkuong zong impi hi. Gamsung pumpi Lockdown nuoi a kium, adiehin singtang (hill) gam a COVID-19 doudal ding dan, social distance (kigamlat ding, kinai senglou ding) leh zuidia kibawlte genkhawm uhi.

Tunia Hill Leader-te toh kihoulimna ah Chief Minister in tribe teng in museum khat chiet akipatna mun/khuo chiet ua Rs 10 Lakh bei a bawlsah hiding chi'n phuong hi. Guollui vante khop khawm a kikepbit chiet theina ding chi hi.

Biren Singh in tam Community Leader-te toh WhatsApp group khat bawlkhiet hiding a, Chief Minister leh Govt top official  bangzat hiei khat zong pang in thukizatuohna zat hiding chi.

Chief Minister in Covid-19 toh kisai WHO, ICMR, Health Ministry, leh Home Ministry thusuote chauh gintat di'n mipite ngen hi. Amaute gen banga Quarantine a 14 Days sung um teitei ding zui chiet ding ahi chi. Negative result te'n inn azuon thei ding ua, Covid-19 veite (infected person)  zong i doctor-te uh, nurse-te uh leh paramedical worker-te siamna/bawltheina tungtawn in a dam ding uhi chi hi. Amaute uh i gam ua dia sun leh zan a nasemte ahi uhi. I gam un mipite support-na toh tam natna douzou ding chi kinepthu gen hi.

Keibul Lamjao ah i gamsung ua nam tuomtuomte pu-pa khanga kituahtah a ana tenkhom danuh kepbit tou zelna di'n Heritage Park lam ding chi hi. Kum siel a Manipur Sangai Festival kibawl zong tami park ah suon hiding. Tualeh tami park ah tribe teng Khanglui Inn (traditional house) khat chiet koisah hiding hi. Tam traditional house toh kisai Hill Leader te'n amau Khanglui Inn kilamdan alim (sketch) khat chiet Tribal Affairs & Hills Department kungah pelut ding ahidan gen hi.

Tribal Leader te'n zong Chief Minister in tambang a kihoulimna um ngailou aneipi banah singtang mite hasatna theipi leh a hoizaw sema panlah tou dia aumna tungah lungdamtu tut uhi. Tambang kihoulimna ana um ngailou hi'n kigen hi.

COVID-19 toh kisai thei-le-zuidia poimaw National Health Mission (NHM) Manipur in "awareness leaflet" abawlkhiet khu Meitei Mayek, English leh tribal ham tuomtuom in kisuo hi. Awareness Leaflet tam hamte in kibawl: Aimol, Anal, Chothe, Lamkang, Monsang, Moyon, Tarao, Chiru, Kabui, Inpui, Rongmei, Zemei, Liangmei, Gangte, Hmar, Kom, Mate, Paite, Simte, Vaiphei, Zou, Thadou, Kharam, Koireng, Mao, Maram, Poumai, Thangal, Maring leh Tangkhul. Leaflet-te tribal leader-te khutah piehkhiet in um hi.

Chief Minister in leader teng "gift" pie a, sun-ann (lunch) umpi lai hi. Manipur Legislative Assembly Deputy Speaker K. Robindro, Yaiskul AC MLA Th. Satyabrata leh govt officials bangzat hiei te'n zong kihoulimna uop uhi.

~ Zogam Today | 28-05-2020

Share: