A DINMUN LEH HIHNA THEILOU MIHING (E02) By: Pastor Thangdoulal

A DINMUN LEH HIHNA THEILOU MIHING (E02)

By: Pastor Thangdoulal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

BIBLE:  "… Naupang pen a piankhiat a kipan a Pasian a diing a Nazir mi ahih diing ahi. Filistiate khut a kipan a Israelte hutkhiatna nna sep ama'n a pan diing hi," a chi hi. Vai.16:17, "Ka piankhiat a kipan a Pasian a diing a sehtuam, Nazir mi ka hi a, ka sam a kitan ngaikei hi. Ka sam kitan taleh, ka haatna in a hung nuse diing hi; ka haatna a bei diing a, mi dangte bang in ka om diing hi," a chi hi.

I na gensa bang un, leitung mihingte lak ah a hihna diktak leh a dinmun diktak thei a hinkhua zangh kuamah ki-omlou i chi ut masa uh hi.

Tutung a "A Dinmun Leh A Hihna Theilou Mihing," chih thupi tawh kisai a i taangthu suut diing uh ahihleh, SAMSON taangthu ahi.

Samson pen Nazir mi ahi. Hih Nazir kichi mite ahihleh, mi ki-tuamkoih, Pasian a diing a ama ut-thu a kipia a, a tuam a omkhete, ama'uh utbang, deihbangte nusia a, Pasian ut-bang leh deihbang a hinkhua zangh diing a kipekhete ahi ua, hibang a mi khat a kipiak chiang in kichiamna in a zui a, hih kichiamna pen Kisimpina 6:1-21 a, kichiantak a a kimuhtheih ziak in a Bible taang i omna leh i lemdaan chiat un i na sim diing ua, hia'h i gendah maidiing uh hi.

SAMSON PEN, NAZIR MI AHIHNA AH, A DINMUN LEH HIHNA DIING DIKTAK HIHTE AHI.

Pasian in a mi Israelte bailamtak a hunkhia ahihke'h tankhe diing in Samson a bawlkei a, A (Pasian) piaksa tha haatna bek tawh a gaalte dou a, zougawp diing in zong a bawlkei hi. Pasian in a mite a it mahmah a, tuachiin a gentheihna uh, a thuakgimna uh, leh mangbangtak a a omna ua kipan a ama'uhte, Amah (Pasian) min a hunkhiatna tun a, Filistiate mai a Pasian thupisak diing in Samson a tungding hi. A tamlam a gen in, Ama (Pasian) min a hutkhiatna tun diing a Ama'n (Pasian in) Samson a piangsak hi. Pasian in mi dangte muh a Israel Pasian a vaanglet daan taaklangh diing in Samson a tungding hi. Pasian in Ama vaangletnate bang vaangletna leitung a omlou ahihdaan taaklangh diing in Samson a tungding hi. Tuabang a Pasian thupina pe kawmkawm a Samson in a hinkhua a zakh-theihna diing in Pasian in a zuihdiing lampi a bawlsak a tuate hih a nuai ate ahi.

  NAZIR MITE'N A BAWLLOUH DIINGTE UH:

1. Siluang (Mihing leh ganhing) a thamlouh diing  uh.

2. Nazir mi hi diing a Pasian pom ahih ua kipan a a sam uh a tanlouh diing uh ahi. Samson pen a pian masang a kipan a Nazir mi diing a Pasian she-le-guat ahihziak in a sam tan diing kiphallou hi.

3. Zu (Grepzu hi in bangbang zu hitaleh) a dawnlouh diing ahi.

4. Grape kichi mawngmawng a thamlouh diing in, a kibawlna huansung a zong a luutlouh diing ahi.

5. Meelmate a kiteenpih louh diing ahi.

6. A Nazir mi hihna a kepbit diing ahi.

7. Kamtamlou ahihke'h haam-le-paau leh hehbaih a kidek diing, chihte a taangpi a i muhtheihte uh ahi.

SAMSON IN A DINMUN LEH HIHNATE A ZOU EI?

1. Siluang thamlouh diing hinapi a tham hi. Khatna ah lawhsam (Vai. 14:8).

2. Sam tanlouh diing kichi pen, tanlouh in a omden kei a, Delilah in a tansak hi (Delilah in Samson a pheipi tung ah a ihmusak hi. Amahnu'n pasal khat a sam a, a luzang a sampheek sagihte a tankhiat mangsiangsak hi (Vai 16:19). A nihna zong lawhsam.

3. Zu dawnlou diing chih a hi a, dawnlou in a omsuak na hiam? Om zoulou hi (Vai. 14:10-11). A thumna zong lawhsam.

4. Grep huan a pailou diing chih ahi a, pailou in a om hiam, omlou hi (Vai. 14:5). A lina zong lawhsam.

5. Meelmate a kiteenlouh diing chih a hi a, kiteenpih lou in a om hiam? Omlou, kiteenpih a, sihlawh hi. A ngana zong lawhsam.

6. A Nazir mi hihna a kepbit diing, chih a hi a, a keembitzou hiam? Zoulou hi. A gukna zong lawhsam.

7. Kamtamlouh diing, hehbaihlouh diing chih ahi a, a kichi bang in a hizou taktak ei? Zoulou hi. A sagihna ah zong lawhsam hi.

SAMSON In A Nazir Mi Hihlam A Mangngilh Maw? 

Mangngilhlou hi (Vai.16:17, "Ka piankhiat a kipan a Pasian a diing a sehtuam, Nazir mi ka hi a, ka sam a kitan ngaikei hi. Ka sam kitan taleh, ka haatna in a hung nuse diing hi; ka haatna a bei diing a, mi dangte bang in ka om diing hi," a chi hi).

Samson In A Dinmun Leh Hihnate A Zoukei Chih Na Muta Hi. Nang Na Zou Hiam?

Bangziak A A Hunloupi A Samson Si E? I chih leh, THU amanlouh ziak ahi.

Eite zong Samson bang a Pasian a diing a kipia, sehtuam siangthou hi diing a Khrist nungzuite i hi uh hi. Samson pen, Pasian in a mite hunkhia diing a a teelpa ahihbang in, nang zong Pasian mite (leitung mite) hunkhia a, mite muhna a Pasian thupitak a tawisaang diing a a Khrist Jesu a sap na hi.

Pasian in Samson hinkhua zakh diingdaan a khunsa or a guatsa ahi a, huate thei napi a, Samson in a zuihlouh ziak in, a lungpeenna or a thu manlouhna sihpih hi. Samson bang a eite zong, Pasian in i hinkhua zakh diingdaan uh leh i om diingdaan uh a bawlsa or a khunsa ahi a, tuate pen i ut leh i zuithei a, i utkei leh i zuikei thei hi. 

Samson bang a Thu i manna uh leh i manlouhna un i tung chiat uah thu a hung khen diing a, tua thukhenna pen tu a i lungsim puakdaan bang ahi na diam? Bangteng hileh i Pasian lam ah kileh ni. Khristian i hihlam uh kithei chian mahmah napi a, Khrist lungsim leh meel puaklouh-thei ahihziak in i Toupa lam uah kileh thak ni, chi in Jesu min in i kichialzaw uh hi.

TOUPA'N THUPHA HUNG PIA HEN….

Share: