QUARANTINE LEH PASIAN LUNGSIM

- - By: Pastor Thangdoulal Thangkhal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in  chibai ka hung buk hi.

Bible Taangteel, Is. 26:20. "Ka mite aw, na inndan sung uah luut unla, kotkhaakte kikhaakkhum un. Thangpaihna a bei masang in, tomkhat a kibu un."

Eite pen Jesu nungzui a Khristian mipawte i hi ua, Bible thu taksang or gingta leh pomdet a, a thu zuite i hi uh hi. Tuaziak in hih Innsung a kikhumna (Quarantine) Bible in a gendaan ngaihsut a nei kawm in, Kikhumna in tupna or a deihnate leh Pasian lungsim LST tungtawn in i enkhawm diing uh hi. 

1. Is. 26:20-21:

"Ka mite aw, na inndan sung uah luut unla, kotkhaakte kikhaakkhum un. Thangpaihna a bei masang in, tomkhat a kibu un. Aziak pen, leitung a teengte mawhna gawt diing in Toupa a omna a kipan in a hung paita hi. Leitung in a tung a sisan kisuahte a pulaak diing a, a tung a thah a omte a iim nawnkei diing hi." I Bible ua i muhbang un, innsung a kot kikhaakkhum a om diing deihna ziak ahihleh, leitung in a tung a sil kibawldap, aguuk-agaal a, kuamah theihlouh a kibawlte, aguuk a kithahna (abortion zong hih a guuk a kithahna a a pangkha hi), aangkawmna, leh a dang tampite ahi. Hibang a leitung mite mawhnate gawt diing a Toupa hung kipanta diing ahihziak a innsung a kot kikhaakkhum diing ahi chih muhtheih in a om a, hih hun sung a pawtkhiat louh diing ahoih mahmah hi. A pawtkhe teiteite pen thumanlouhna mawhna ah a awk diing a, tualeh Pasian thangpaihna in zong amah khawi tuamlou diing hi. Pasian thangpaihna a venhun, a khawl hunk hat a hung tung diing a, tua hun a tun dong innsung a kot kikhaakkhum a om diing mah ahi. Thumanlouhna mawhna leh Pasian thangpaihna tawh i kipeeltheihna diing un eima innchiat uah kikhum chiat ni. Pasian in a thumang leh a thumangloute a etchian hun ahi. Tualeh Pasian in kithoihna saang in thumanna poimawh sazaw ahi chih zong mangngilh kei ni. 

2. LEV. 13:14:

"A vun natna mun a kaan a, a vun saang a thukzaw daan a a kimuh louh a, a vun a mul poute zong a kaan kei leh, siampu in tua natna nei mi pen, ni sagih sung a tuam khum diing hi." Hihpen vun natna veite, or phaakte genna ahi. Ni danglai in mi phaakte, a mawk phaak ahikei ua, mawhna ziak a phaak ahi taangpi uh hi. 

Lev. 13:46, "Tua phaak natna a vei sung teng, amah buah in a omden diing hi. Amah tang a a tolteen diing ahi; a teenna mun pen giahphual pulam ahih diing ahi." Etsakna; Miriam, leh Akan. Ni danglai in phaakte a kigimneih mahmah a, tuamah bang in tun zong Covid-19 veite a kigimneih mahmah hi. Tuaziak in phaakte leh Covid-19-te a tuam in kikhum hi. Hih phaakte leh Covid-19-te a tuam a a kikhum ziak uh pen, a sipai diing chihna hilou a, a hinkhua ua Pasian in phuut or deih a neih ziak a, hih nattun a veisak himaithei diing ahi a, a kituamkhum sung ua a lunghei a, Pasian lam a zot ua, a dam kiik diing uh pen, Pasian lungsim hi diing in ka gingta hi. Tuaziak in hibang nattunte tawh i kipeel theihna diing un Pasian mah beel ni.

3. Num. 19:11:

"Mihing siluang thamkha zousiah ni sagih sung buahbaang in a om diing hi." 

Buahbaanna pen Pasian in deihlou a, leitung a teeng mite lah, buahbaang siangta i hihman un eite gawt diing in 'Toupa a omna a kipan in hung pai hi, (Is. 26:21).' Pasian mitmuh a siangthouna pen, ei leitung mit a et tawh kibanglou hi. Num. 31:19, ' Mi that kha zousiah ahihke'h siluang thamkhate ni sagih sung giahphual pulam ah na giak diing ua; a ni thum ni leh a ni sagih ni chiang in noute leh na salmatte uh na kisiansuah diing uh hi.' Matt. 5:22, 'Hilehzong ken: Aziak bei-a a sanggam tung a heh zosiah in thukhenna athuak ding ua; tualeh a sanggam thangpaisak mite'n vaihawmna a thuak ding uhi; tualeh a sanggam kiang a 'Nang mimaw!' chi-te pen, meidil a paihding dinmun lauhuai a ding ahi, chih k'ung hilh ahi.' Pasian in a huat mahmah buahbaanna i tung ua a omna diing in khut hiam a vatham, vakhoih sese ngailou a, lungsim a i ngaihsutnate un i tung thute khenkhin hi. Hibang buahbaanna ziak in mite a na kikhum or a tuam a khum in a na om uh hi. Tualeh hibang buahbaannate gawtna diing a Pasian in a bawl pen ahihleh, Quarantine ahi mai hi. Aziak pen Quarantine hun sung a i lungsimte uh i khel ua, Pasian lam a zot diing uh Pasian kinepna ahi. Pasian lungsim leh lunggulhna ngaihsut a nei a, i hindaante uh khel a Pasian kiang zuan diing in i ki-ngen uh hi.

Pasian in a mi Israelte Egipt a a saltanlai un, a mite bek a diing in Quarantine a na bawlsak a, hih Quarantine hun sung in Egipt mite tapa taakpente a thahsak hi (Ex.11). 

Hih hun pen Pasian mi hiloute a diing a sihna hun, lusuunna hun ahi a, hilezong Pasian mite a diing in bitna hun ahi hi. 

Pasian hehpihna ziak a i ngah uh Quarantine manphatak a zangh diing in i ki-ngen un, i kichial zaw uh hi. Pasian hehpihna thupitak i tung ua omlou hileh, Quarantine lou a, hih nattun vei a sibeitheite i hi uh hi. 

Pasian in a hehpihna ziak a, eite Amah lam a i kilehna diing ua a hung bawlsak hih Quarantine sung a Pasian lungsim zong a, Amah lam a kileh diing in, Toupa'n thupha hung piata hen…..

KHALVONTAWI

VOICE OF THANGKHAL

Share: