PASIAN THUGEN KIZILNA (E01) Compiled by: Pastor Thangdoulal

PASIAN THUGEN KIZILNA (E01)

Compiled by: Pastor Thangdoulal

Bible: Thu k'ung pia hi: Thu tawh kisai tangthupha phuang in! (2Tim. 4:2.)

A Sunga Thu Omte

I. Khenpi khatna: Pasian Thugen Kizilna

Thugenna (Preaching) ki-chi bang e?

Thugenna (Preaching) tup-le-ngim.

Thugen (Preaching/ Sermon) dinga sapna.

Thugenna  (Preaching) neihdan tuamtuamte.

Thugenna (Preaching) ding a kiginna.

Thugenna ding dan.

II. khenpi nihna: Special Days Sermon Outlines

Kumthak (New Year)

Palm Sunday

Good Friday

Easter Sunday

Missionary Day

Mother's Day (Nute ni)

Youth Day (Khanglai-ni)

Pentecost Day

Children's Day (Naupang ni)

Father's Day (Pate ni)

Christmas Day

III. Laisiangthou Donghu

IV. Incharge Lakna Thuchiam

1. Mawhpuakna Sângthak Dingte Hânthawnna

Thu Patna

Pasian' thugen kizilna leh, ni biik thugen guhgelna a hung kipatkhiatna pen mi tangpi'n i theih ut chiat ding uh ka gingta hi. Khenkhatte'n "Leltak in," a hung chihsak ding ua, khenkhatte'n lah, "Hoih e" ahung chihsak kha ding uhi. A diak in, Pastor ka hihna leh Saptuam khat kem ding a ngansiahna ka tung a a tukna sawtpi hinaikei lezong, Saptuam sung a ka muh leh theihte'n hi-bang thu gelhna tawh panla a, lamkaihpih (Lay Leaders)te tawh kihanthawn tuah ding in a hung sawl teitei hi. Kei a taaksapna om tampite leh ka lamkaihpihte taaksapna ka muh tampite lak ah, "Pasian' thugen kizilna leh, ni bik thugen guhgelna" a poimawh masapen in ka thei hi. I sil neih uh tampite lak ah Jesu a thupipen a i neih theihna ding un, Jesu' lungsim in i lungsimte uh a thuzawh nai? Chih ngaihtuah kawm in, Pasian' thu suut dan leh Pasian paidante ban ah, Pasian lungtang mite lak a bangchi phuan khiat ding e? Chih mi zousiah in i ngaihtuah chiat ua, khat-le-khat i kithapiak tuah theih ding uh pen sil poimawh pen ahi. Tuaziak in, a sung a thute limtak in simsuak ni hang in, hoih tak in ngaihsut chiat ni. Eimite'n kikhopna i neih chiang un, i thugente'n a Bible simna uh tawh kituak lou pi'n, a ut-ut uh a kigen uh hileh kilawm bang in, khenkhatte'n a neulai thute a gen ua, khenkhatte'n a gamvak dan leh a sa-kap dante ban ah thu tuamtuam tampite zong a genbeh lai uhi. Christmas thugen ding a kisep hinapi-a, a neulai vasabeng dan gen bang, eite lak ah tam tak om hile-hang a kilawm hi. Khenkhatte lah, thugen thei pen bang a ki-ngaihsut i hih man un thugenna hun a kipiak keileh NUAK, or PHUN chih bang om thei hile-hang a kilawm hi.

Bangteng hileh, taaksapna lompi tawh Jesu taksang a Pasian bia leh, Saptuam sung a mawhpuakna poimawh taktak neite i hih uh thei kawm in, Pasian' thugen  hih laibu neunou apan in kizil chiat ni. Tualeh a diak in, Pasian thugen dan kizilna, sapte'n "homiletics" a chih uh, Matthew B. Gag thuhilh chiamtehna (note) apan ei hihna tawh kituak a let in i zilkhiat sawm ding uhi.

I. Khenpi kahtna: Pasian Thugen Kizilna. (By: Matthew B. Gag)

Matthew B. Gag ahihleh, Baptist Basics University a laihilhmi (Lecturer) ahi a, "Homiletics 101: An Introduction To Preaching Lecture Notes" gelhpa ahi. Hipa laigelh pen (Basic) a bulpite ahih ziak in eite tawh kituak in, theih noptuak pen i sa uhi. Hibang ahih ziak in "BaptistBasics.org" website a pan a tei-sawn in, i kizil chiat na ding un, Pasian thu' genna ding a poimawh thubulte hih a nuai a bang ahi. Ki-zil chiat ni. 

1. Thugenna (Preaching) Ki-Chi Bang E?

Tawndan ngai-na bang in Saptuamte'n Pasian bia a kikhopna i neih chiang un 'thugenna' i thupi bawl chiat ua a hoih hi. Kikhopna mun a kizakdan tuamtuamte, mipite lasakna leh tum-ging hoih nounoute leh laa-pawl sakna i chihte a bei chiang in thugen ding penpente a hung ding ua, mipite en kawmkawm in thu a gen uhi. Hih 'thugenna' omlou in kikhopna a tawp/bei ngai kei hi. Tua ziak in 'thugenna' kichi pen kikhopna laigil leh thupipen ahi, chih thei masa chiat ni hang in, thugen a i pan khak chiah i ut-utpi mawk gen kei ni.

'Thugenna' kichi bang e? Hihpen speech or teaching i chihte uh lak a khat hilezong hite sang a thupi zaw tham hi. Aziak, 'thugenna' kichi pen, ngaikhetute lungtang kheng ding a, Bible a om thudik hilhchetna ahi a, thugen dingte'n a hilhchet ding Bible a om thudik a theih chet teitei ding ahi.

 Hibang 'thugenna' sung a theih ding a poimawh i ki-sinsakna ding un hih a nuai ate i en ding uhi.

a. Thugenpa- Rom. 10:14: Thugenpa pen Pasian mipa ahi a, tualeh  'Thugenna' kichi pen, Pasian mipa Pasian' thugenna ahi. Tualeh thugenpa pen Pasian in thugen theihna a piak mipa ahi. Sermon or 'thugenna' kichi pen, ut-thu a pongbawl thoh ahi kei a, hihpen lungtang a piang a puakthoh leh phuanzakna hi.

b. Thugenpa Thugen. 10:15: Pasian mipa thugen bang e? Amah thugen ding a mohpuakna neipa ahi. Thugenpa'n Pasian a pan a mipite a ding thu a neih teitei ding ahi. Hibang a neih theihna ding a, thumna tawh pang a Bible' thu lunglut tak a a suut/sim leh, aman khasiangthou huhna tawh mipite a ding thu, Pasian apan in amu ding hi.

c. Thugenpa Thugen Dan – Nas. 8:35: Thugenpa'n thu a gen chiang a, a ngaikhia a na pang mipite, a thugen thudik in a lungtang uh a zawh a, hindan thak a neihna ding ua thupukna abawl theihna ua a gen ding ahi. Hih tawh kisai in, thuhilh dan leh gen dan tuamtuam a om kha ding hi. Hinanleh atawp chiang a ngaikhetute'n, Bible thudik tawh kituak a hinkhawzak ding thupukna a bawlna ding ua a gen ding ahi.

d. Thathohsakna – Nas. 8:5-6: Thugenna ah tup-le-ngim tuamtuam a om maithei ding hi. Hilezong agah suah ding pen mipite'n Bible thudik zui ding a thupukna alak ding uh mah ahi veve hi. Hihpen, Jesu Khrist hundampa a pomna, semtute'n a muanhuaina uh a suah semsemna ding ua thupukna lakna, gingtute biakna a ahat semsemna ding ua thupukna lakna leh a tuamtuamte ahi maithei ding hi. Thugenna pen hun sukbukimna ahikei a, mihing khat hinna a sil kisam khat sukbukimna ahi. 

e.Thugen Dinga Thupiakna – II Timothy 4:2: Pasian in a thu tangkoupih a pang ding in, sillamdangte leh vantungmite a teel kei a nang leh kei ahung teel zaw hi. I kibulphuhna ding un Bible i nei ua, a hung lamhilh ding leh hung thahatsak ding in Khasiangthou i nei uhi. Gam mial taanvak ding leh Khrist a sanggamte hatsak dingte i hi ua, a nih in "thugenna" taw i sem uhi. 

Thugenna tawh kisai a mite thugen khenkhatte tawh i khumsin ding:

(1)"I mihihna diktak pen mite kiang a thugenna ahi." -Phillips Brooks 

(2) "Thugenna ahihleh thudik kikuptuahna ahi." - Phillips Brooks 

(3) "Thugenna ahihleh thudik meikuang bang ahi." -  Jack Hyles 

2. Thugenna (Preaching) Tup-Le-Ngim.

Thugenna in ngimna hoihtak Pasian suangtuahna ah a nei hi. Tualeh leitung pumpi zong, Khrist a gualzawlna hinna thugenna tungtawn a dimsak ahih ding Pasian lunggel ahih ziak in, tuni tan in thugenna i tawpsan thei kei hi. Tuaziak in, thugenna in a hilhchet ding ngimna khenkhatte i ensuk ding uhi. Zilkhawm chiatni. 

a. Thugenna Taksanna Hilhchet Ding Ngimna: Thugenna in a ngim pipen hi-ding a ka taksan khat ahihleh, Bible thudik phuanzak ding ahi. Ngaikhetute'n thuginpite' a theihsiamna sangzaw a neihna ding ua, thugenna zousiah a Bible thudik  tangkoupih ding ahi. 

b. Thugenna pen Taksanna Vengbit Ding Ngimna Ahi: Pasian' thu, Bible thudik tangkoupihna tan bek a hun a hikei a, hih pen venbit ding ahi. Setan ahihkeileh Leitung deihnate, Taksa utnate'n hih Taksanna Thudik gal bang in a sim gige uhi.

c. Thugenna pen Mangthangte THU Hilh Ding Ngimna Ahi: Mangthangte kiang a tangthupha gen pen, thugentu nasep thupipen ahi. Ama'un Jesu Khrist a hinna a neihna ding ua, thudik ama'uh tawh kituak a gen ding ahi.

d. Thugenna pen Khelhna Suklatna Ding Ngimna Ahi: Jesu'n Farisaite hangsantak a a gitlouhna uh a phuanzak dan leh, Baptispa John in Herod gamtat hoihlou hangsantak a a phok ngam dante leh, Jesu' sihna tungtang a judate khelhna Peter in hangsantak a a genkhiat dante ngaihtuah kawm a, khelhna suklat ding pen thugente mawhpuakna ahi hi. 

e. Thugenna pen Christian Tawk/Chou Ding Ngimna Ahi: Chirstian khat pen Pasian hehpihna a a khanlet theih keileh, ginna leh a dangdangte ah zong khanglian theilou hi. Pasian hehpihna a khanlet a, tua apan a a dangte a zong khanglian dinga tawk/chou ding ahi.

f. Thugenna pen Ngaikhetute Poimawh Bukimsak Ding Ngimna Ahi: Thugenna in ngaikhetute poimawh a bukimsak chiang bek in a manpha pan hi. Tuaziak in thugentu in a mipite a taaksap a theih siam mahmah ding ahi.

3. Thugen (Preaching/ Sermon) Dinga Sapna.

Thugenna a kiphualdap leh poimawh pen ahihleh, 'Sapna' (thugen ding a sapna) ahi. Thugen ding a Pasian' sapna tang lou pi'n, thu va-gen lechin zong, mipite'n na thugen kham in luaksuak huai asa ding uhi. Pasian in khenkhatte Saptuam lamkai ding, khenkhatte Pastor ding, khenkhatte 'mission field' a sem ding chih bang in a tuamtuam in sam hi (Eph. 4:11). Hih Pasian thugenna tawh kisai a sapna anuai a bangin i zilkhawm chiat zaizai ding uhi.

a. Kha Siangthou Zang in Pasian In Mi Sam Hi: Pasian sapna pen Kha Siangthou tungtawn in amimal amimal ah a hung pai a, hihpen thugen utna puaknatna neihna dan in a om a, hinanleh mi zousiah pen Pasian in ahung sap hun akibang kei hi. Khenkhatte'n a dek uhi.

b. Sapna Pen Lunggulhna Tawh Ahung Paikhawm Hi: A thugen ding a Pasian in a sap mite pen, Pasian in ngimna dettak tawh amah bawl hi. Hibang mite'n nna tuamtuam sem in, bangteng bawl leuh zong, lungkimna taktak neilou bang leh, lamzang thei taktak lou bang in a om ding uhi. Tualeh ama'un ministry khat a lutna aneih chiangun zong, hunta chih neilou mah bang in, a sang a thupi zaw a delh ut toutou lai ding uhi.

c. Pasian in Asapte A Sakholh Hi: Pasian in a sapna tangtun thei lou dingte A thugen ding in a sam kei hi chih akichetna mahmah ahihleh, thugentute a tangpi in thugen theite ahi uhi. Tualeh hibang a Pasian sapte Pasian in bangteng hi-in, khoilam teng ah hilezong a lamkaih a, a kisapna uh pia hi.

d. Pasian Sapna pen Kisa-kholh Dinga Sapna Ahi: Mawhpuakna leh sep-le-bawl ding tampi tawh Pasian sapna ahung paikhawm hi. A diak in, kisakkholhna ahi deuh pen hi. Sa leh Kha a kisakkholhna, Pasian hehpihna a khanletna ding a kisakkholhna leh kisakholhna tuamtuamte a kisakholh ding a sapna pen Pasian in A thugen ding a a hung sapna ahi.

4.  Thugenna  (Preaching) Neihdan Tuamtuamte.

Thugenna zousiah in a guhgeldan khat chiat a nei a, tualeh thugenna a hilhchet ding a thugualte (Outlines) pen thugen dingdan lim diktak ahih ban ah, thugenna kichi pen, mipa inn-lam tawh kibang ahi. Inn-lampa'n a inn-lam ding hibang hibang ding ahi chih guhgeldan nei lou in, inn a lam kei hi, thugenpa'n zong guhgelna kichian tak tawh thu a gen ding ahi.  

Tualeh thugenna a chi-tuam tuam in a neih theih a, tuate apan a i kizil theih chiatna dingun, hih a nuai ate i en ding uhi.

a. Thupi, Thu Genna (Topical Sermon): Thupi thu genna ahihleh, thupi a na telkhiat penpen, Bible-tang mun tuamtuam la-in na hilh chian thei hi. Hihpen khat veivei "Theme sermon" chihna tawh kibang hi. 

Thupi thu genna guhgel anuai a bang ahi.

Thupi: Khamangthang matna dinga sil poimawh gukte

1. Pasian a dinga hinna manphat dan theih ding.

2. Khamangthang man dinga kilatkhiat ding.

3. Kha Siangthou lamhilh dinga kipiak khiatna.

4. Kha Siangthou temsau nasem dinga goih—(a thu).

5. Kha nasepna a kawkmuh hihna.

6. Lawhchinna bangteng om-nanleh, hunta chih louhna.

(Tu'n na thupi, ITNA hitaleh, ITNA thu Bible mun tuam tuam a la in na hilchian dinga, mipite'n ITNA aneihna ding ua, na thugen a pat a thupukna alak thei teitei ding uh ahi).

b. Taangteel Thugenna (Textual Sermon): Hipen, thugenna a i Bible tang telkhiat penpen, chiiktak zonkhiat a, tua apan a sinsakna piakna ahi a, hih in tang-khat sunga thudik guuk-omte a phuangzak hi.

Tangtel thugenna guhgel hih a nuai a bang ahi.

Thupi: Baihlamtak a Hung Man Khelhna

Tangtel: Hebraite 12:1-2.

1. Theihpihtu Meipi Thupitak

A. Theihpihtu meipi thupitak pen a nambal a tam hi.

B. Theihpihtu meipi thupitak pen lainat leh kilop huai ahi.

C. Hih theihpihna mizia pen a thupi mahmah hi.

2. I Khelh Baihlamnate Uh.

A. I khelh baihlamnate Sawltakte'n greek thumal khat in a hung na hilh ua, "euperistaton" ahi. Hihpen, khelhna baihlamtak a eite hung mantu chihna ahi.

B. Saltakte'n hibangte apan a kihemkhe di'n, ahung ngen uhi. 'i koihkhia ding' a hung chi uhi.

C. Hibang khelhnate i koihkhiat leh, i ngaihsak nonlouh ding uh, Sawltakte' deihdan ahi. 

3. Tanpa Kichinna.

A. Amah pen, i genna uh bulpatna leh tawpna ahi. "Jesu en chiat un, Amah a tawpna thuneipenpa ahi.

 B. Amah pen eite tha-khengpa ahi.

 C. Amah pen eite siampi lianpenpa ahi.

c. Hilhchetna Thugenna: Hibang thugenna pen, Bible bung khat or tang bangzah e-khat sung a thute hilhchetna thugenna ahi a, thu chiik zonna tungtawn in thudik phuankhiat ding ngimna nei ahi.

Hilhchetna Thugenna, Etsakna Guhgel hih anuai a bang ahi.

Thupi: Mangbang Talezong Kipak Hi.

Kumpipa doute (Laate 3)

Amuhte a tam mahmah uhi.

Amauhte pen a poimawh sang in a tamzaw uhi.

Kumpipa Venbitna (Late 4)

Amah thumna saangpa ahi.

Amah mite hoihna pepa ahi.

Kumpipa Phatna (Laate 5)

Hih in Pasianni kongkhakte hong hi

Hih in Mimal Pasian biak-inn tawh kinaihsak hi.

Lungdamna leh nuamna tun hi.

Thugennate bangchi tel a, bang pen zak a hoih e? (1). Kha lamkaihna zui in. (2). Na thugen dingpen thugenna dante lak a koi pen tawh kituak pen e chih limtak in ngaihsun in.  

5. Thugenna (Preaching) Diing a Kiginna.

Thugenna nei ding hinapi-a a thugen ding lam theilou eimite lak ah a kithang mahmah hi. Hibang mipa/nu na hihkhaak leh Pasian mai a zumdan leh kisuanlah dan ban ah, chinlouh taktak a chinglou na hihlam kithei inla, tualeh na thugen ding na theih louh ziak in, na utut phei gen kenla, thumgualna or mipite thumna ah lamkaih inla, hua tawh na hun zou mai in. Tualeh, thugen dingpa/nu a omlouh ziak a 'bingmat' chihte zong i hahzak uhi. Hibang a 'bingmat' a ompa/nu na hih a, na gen ding na theihkei leh, atunga i gen bang in thumna tawh na hun zou in. Hibang gen ding theihlouhna zumhuaina pan a na kihep khiatna ding in hih a nuai ate limtak a ngaihsun inla, zui in.

a. Laisimna hun zangtam in.

1. Pasian kianga mimaltak a kilatna nei gige in.

2. Bible thu suut detdetna hun zangtam in.

3. Laibu tuamtuam simna hun tam zak in.

b. Thugen tuamtuamte ngaikhe tam inla, thu kan in.

c. Kha dinmun a, nang poimawh leh midangte poimawhte thei in.

6. Thugen Dingdan.

Thugenna tawh kisai tampi i enkhinta ua, tun 'thugen dingdan' hih a nuai a bangin, a ETSAKNA i en ding uhi. (Thugen ding chiah)

a. Bible Simna.

1.  Thu na gen ding chiang in, na Bible sim ding gen masa in.

2. 'I deihna tantan sim ni' chih kammal zang ken. Aziak pen, kiginna ma-neih louh a, a thudan a dingte gen dan ahi. Hibangte pen, Pasian in zang lou hi.

3. Na Bible simna ding nihvei or thumvei bek genkhia in.

b. Thu Patna (Introduction) 

1. Na gen ding 'thupi' pen phuangkhe masa in.

2. Na 'Thupi" gen ding a kilawp huai dan phuangkhia in.

3. Na 'thupi' genna in a tuamsuak ding thubulte luikhia in.

c. Thugenna Taksa.

1. Hihpen, na thugen ding zousiah ahi.

2. Hihpen, a tung a i gen, thugenna neihdante zakna ahi.

3. Atangpi'n gen ding thubul tam koihlouh a hoih hi.

d. Thukhupna (Conclusion)

1. Na thugen zousiahte thutopna khat nei in kaikhawm in.

2. Na thupi in a tuamsuak a na gente tawpna kibang nei in 

    sutuah in.

3. Ettehna hoihtak zang a thukhupna bawl ahoih mahmah hi.

(Khenpi khatna: Pasian Thugen Kizilna. By: Matthew B. Gag tawh kisai a, theih beh ut na neih leh: visit BaptistBasics.org for more resources). 

Share: