NAMTE NUAM UH HEN (E007) By: Pastor Thangdoulal

NAMTE NUAM UH HEN (E007)

By: Pastor Thangdoulal

Kha Mangthang Itna A Haatlouh Ni A Mission Tha Haatna 

Hehpihna hauhna ahihleh hih missionari nna sepna diing a tha thousaktu leh hoih penpen zong ahi hi. Hih hehpihna panglou in eite'n ki-ngaih ngiamna manpha i theipha kei ua, tuachiin eite'n a thawn liu-liau a i gou manpha muh uh, khantawn a hin tawntungna thu pen, midangte'n zong a neihtheihna diing ua i genzaak diing lam uh i na mangngilh uh hi. Tualeh, hih hehpihna midangte tung a i neih un eite, Pasian thupina leh pahtawi a a om diing veinatna i neihna ua pan a hungkhen diing ahikei chih zong i muthei uh hi. John Dawson kichipa in khamang thang itna tawh kisai a a gendaan ahihleh hibang ahi, 'i hinkhua ua khamang thang it taktak a itna, leh hehpih nguut-nguut chih pen i hinkhua ua i tuahkhak (experience) diing uh pen, sil haksa mahmah khat ahi a, tualeh hih itna leh hehpihna i neih ua, i sung ua a hung om chiang na-ngawn in zong eite theihtheih diing in a omkei hi,' ana chi hi. Hih omdaan diktak pen, mihingte'n kha mangthang i it uh leh i hehpih nguut-nguut laitak un kha mangthang ka it in ka hehpih hi chiin i kithei-thei kei chihna a na hi diing daan ahi hi. Athugen kim zaw anuai ah i en ding uhi.

Kha mangthang itna na theihdaan in lamdang na sakha ngaita hiam? Hih pen Christiante a diing a a theihhak mahmah haam (kammal) ahi. Gingtu tamtak in a lungsim un hih thu a ninkhin theizeel uh hi. Aziak pen, ama'uhte'n evangelism nna sepna diing a hehpihsiamna thak a lungsim ua a hung luut a, tua in a sepsak diing a kilam-en uh hi. Hih pen khamangthang itna diing a sil omtheilou ahi hi. Na lungsim a na thil muh hiam , na ngaihdaan hiam khat pen, a taktak a hita chiin, nang mah sung ah thuktak in theihna taktak na neithei kei diing hi. Tuaziak in hih itna leh hehpihna pen na lungtang a a hung luut chiang a evangelist nna sep hiam, missionary nna sep hiam kipat diing na chihkhak leh nang pen a diklousa na hita hi.

Na theih ngai louh mi khat kiang ah na hondampa Jesu Khrist thu na gen theihna diing in, na lungtang ah itna leh hehpihna a hung luut diing na ngak diing ahi kei hi. Aziak ahihleh vaan a om na pa (Pasian) bawl a hi chih na theikhin a, hinanleh,  amah (asiam pa Pasian) a pan a a tuam a na omkha ahi aw hi. Na Pasian na itna ziak in hi bang ngaihdaan nei in, evangelist nna sep kipankheta diing a thupukna na bawl diing pen, nang a diing in a hunta hi. Hehpihna leh veinatna midangte a diing a i neihte uh ziak sese a i ginna uh midangte kiang a i gen diing uh ahi sese kei hi. Pasian itna tawh midang tengteng it diing ahi zaw hi. Laisiangthou Ephesate 6:7-8 na in hi chiin a chi hi, "Mihing nna sem bek hilou in, Toupa nna sem bang zaw in kiloptak in sem zaw un. Mi chih in, Sila hiin zalen hitaleh sil hoih a bawl zousiah uh Toupa kiang a pan hua mah amu kik diing uh chih theih in bawl hen," a chi hi. 

Leitung mihingte'n Pasian itna i ngah or tantheihna diing un bawltheih leh septheih bangmah i neih louh uh chauh hilou in i-phu kei uhi chih i thei chiat ua, himahleh i neithei un, i tanghthei uh hi. Tuaziak in nang leh kei leh eite tengteng pen, tuni'n Christian humanist i hihlouh mawngmawng diing uh a hi, chiin ka hung ngen in ka hung chial hi. Mi zawngte (poor poeple) leh khelhna a dim mite kiang ah Jesu Khrist vapuak in, a hinkhua ua, hamphatna tamzaw sem a hung neihtheihna diing ua i kipat uh a hun a hita hi. Pasian hamsiatna thuak diing pen mihingte tantawk or phutawk lel ahi a, himahleh, Jesu Khrist Pasian Belam nou in, a thuakgimna lawhman (nuam man) a ngah or a saan diing pen a ki lawm mawngmawng ahi hi8. Chih thei siam chiat ta ni uh aw.

Khitui Pawtsak Ittna Lamdang 

John Dawson thu gen i na simsate un a hung haanthawn in a hung halhsak tuam mahmah diing in ka lam-en a, tualeh a thute zong a pil-huai mahmah hi. Aman eite a hung hilhna thupi pen ahihleh, hehpihsiamna leh midangte vaveinatna chauh a i Pasian nna sepna uh chiangtan (limit) lou diing chih ahi. A bangteng hileh, tuni a ke'n ka genbeh ut ahihleh, Toupa'n mun gamlapi a om mite veinatna neihtheihna diing puak gik or veinatna a pethei hi chih ahi. Etsakna dingin; Wesley Duewel OMS International in a chiamtehtak China leh India a diing a a muh puakgik or veinatna taangthu hibang in ana khum hi:

"China leh India mite a diing in ka nu in a kum a kum a sim in gilkial thuak kawm-kawm in a na paipih a, inn sung kikhopna leh thumnate ah, hih Nam nih te (China leh India) a diing a thum in a thumna a zoh masang in a kap kouhkouh hi. A itna ahih leh a thuk a, a gin-om hi. Hih pen Khrist itna a kipan a hung poukhia, Khasiangthou tungtawn a hung om Nam nihte veinatna ahi hi.7"

Hih tawh kisai a ka genbeh ut ahihleh, Pasian thupina leh minthanna diing a mi hehpihna ahihke'h thuaknatpihna leh kuhkal (hahkat)na tha thousaktu pipen ahihleh a tuamtuam ahi kei a, God-centered compassion ahi. Hih pen mite i valainat leh hehpihna laizang laigil laitak ah Pasian a om hi chih na ahi. Pasian lainatna in mite Pasian thupina nial a, a haamsiat thuak diingte a hung veinasak (pona) leh hung hehpihsak in, a hung kapsak aw hi. Hih pen i Christian hihna ua i lungdam na uh, i na mansuah ziak a kahna ahi kei hi. Himahleh misiangthoute'n aman pha mahmah hinna kha, a manthat diing i kah khumna uh pen, alehlamtak ah, Pasian sung a lungdamna ziak a kahna ahi. Hih kipahna a kahna ziak ahihleh, a mangthang diingte hinna a sautheihna diing leh, a lettheihna diing ahi hi. Tuaziak in, veinatna sung a kahna ahihleh lungdamna leh kipahna kahna ahi a, hih pen a bei mai ding midangte hinkhua sausakna diing ahi hi.

Pasian Sapna

Pasian in i hinkhua pumlum ua dinmun leh thuneihna saang pen a neihtheihna diing a eite'n Pasian pen sil zousiah saang a a penpenpa ahi chih i damsung ua thupi a i neih ua, i veinat diing uh pen, Pasian in tuni a nang leh kei a hung chialna leh sapna ahi hi. Jesu Khrist in a khoih khaklouh lungsim leh lungtang a kipan in missionari nna sepna diing lunggulhna lungsim leh lungtang a suak khengai kei diing hi. Tualeh mi khat in, Jesu Khrist a sil thupi mulou in, missionari nna sep a thu piitdaan leh a letdaan baan ah, a poimawhdaan a muthei kei ding hi. Leitung pumpi Pasian a diing a laktheihna diing a vision (muh kholhna) lian mahmah pipen, a vaanglian mahmah leh a thupi mahmah Pasian om lou hileh a om kei ding hi. Biakpiakna tengteng Pasian piak diing leh mi tengteng in Pasian a biak diing uh veinatna i neihkei leh, bang chiin i biakpiakna uah midangte i kailuut-thei diing ua –limtak in ngaihsun in.

Pasian in a sil bawltheihna veinatna tawh mi zousiah, haam zousiah, Nam zousiah, amah sung a lungdam leh kipak tak a om a, amah biakna, mi zousiah in i piaktheih chiatna diing uh veinatna leh lainatna liantak nei kawm in, i nung uh tuni tan in a hung zuilai hi. Aman (pasian) kilopna leh thathohna gim leh bah chih mawngmawng nei lou tawh, Namte lak a a min a than diing pen a veinatna ahi hi.

Tuaziak in, eite'n zong i chiin (tatdaan ngainate) daante uh leh i tawndaante uh, amah (pasian) a tawh kituaksak ni! Tualeh amin ziak in tuni'n eite'n khovel nopsak utnate tawpsan in, leitung pumpi a diing a ama tupna leh ngimna ah, i pangta diing uh hi. Hih Pasian tupna leh ngimna a i zauhtheih leh gaal zohna diallap kitak bang in, Pasian sil bawltheihna chiamna amin in eite tung ah a hung om ding a, tualeh gimthuakna tamtakte ziak in i mansuah nawnkei diing uh hi (Nas. 9:16; Rom. 8:35-39).

Saptuam tup leh ngim thupi pen ahihleh, Missions a hikha kei a, himahleh, Biakpiakna ahizaw hi. Missions a hin (om) tawntungna ziak ahihleh, Mission a hin tawntung louh ziak ahi hi. Eite a diing a i (commission) sep diing ua hung kipia lian pen pen ahihleh, Toupa sung a kipak leh lungdam diing ahi (Sam. 37:4) tua khit chiang in eite'n "Namte kipak uh henla, kipak in laa sa uh hen" (Sam. 67:4) chi in i tangkou theipan diing uh hi. Hichibang lampite ah Pasian pen a bul a kipan in a tawp dong in, amin thang in a thupi tawntung diing a, tualeh Biakpiakna in missionary enterprise (pat khiakna) te i Toupa Jesu Khrist a mi siangthoute la a a hung kileh kiik ma siah (masang siah) a haatsak tawntung ta diing hi.

Toupa Pasian sil zousiah bawlthei, Na sil bawlte thupi in lamdang hina mai zen uh e! Na lampite adik un a tang uh hi, taangtawn kumpipa aw!

Topa aw, kua ahia nang hung lau lou ding? Tualeh Na min pahtawi lou diing kua ahia? Nang chauh lah na siangthou ngal a, Nam zousiah a hung pai diing ua, Nang a hung be diing uh hi; na diktatna sil bawte mi tengteng in amuhtak ziak un (Rev. 15:3-4)

END NOTES (Hih endnotes ahihleh, E001-E007 Sung a Lai Kaihkhawmte Ahi).

1). Murray. The Puritan hope. (edinburgh: the banner of truth trust,     1971) p. 140

2). ………… Meditations on God's delight in being God (Portland:Multnomah Press, 1991)

3). ……………. Meditations of Hedonist (Portland:Multnomah Press, 1996). Pp. 227-238.

4).  John Stott. The Bible in World Evangelization (Pasadena: William Carey Library 1981).

5). John Dawson. Taking Our Cities for God (Lake Mary, Florida: Creation House, 1989) pp. 208-209.

6). Wesley Duewel. A Blaze for God (Grand Rapids: Francis Asbury Press, 1089) pp115-116

7). Paul Enns. The Moody Handbook of Theology (Chicago: Moody Press, 1089) p. 305

Share: