NAMTE NUAM UH HEN (E006) By: Pastor Thangdoulal

NAMTE NUAM UH HEN (E006)

By: Pastor Thangdoulal

Jesu Khrist nung ka zuihkhawmpih Saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Inn mun  pan in chibai ka hung buk uh hi. 

Amin Jiak A Inn-le-Lou Nu Siatna

Jesu leh neih-le-lam hung kiteelsak diing hileh, bang pen i teelzaw diing uai maw!.. chi a ka ngaihsutlai in, ka lungsim a hung kilang pipen ahihleh "tangvaal haupa" ahi. Hih tangvaal haupa mah bang in eite zong, i gamtat uh leh hindaante uh, Jesu deihna tawh kituaklou hita leh kilawm mahmahta a, hilezong mi kamsiamthei mahmahte i hihziak uh a diai, a genthoh in kipom chiat vaanglak hi. 

Jesun hih tangvaal haupa a houpihlai a, a sil muhkhiat bang hiam i chihleh, mite'n a neih-le-lamte uh saang in, kei a ngaina zawkei uh chih ahi. Hih pen tuni tan in zong, mi tamzawte'n Jesu i kam uh tawh i zui ua, hinanleh i hindaan uh leh omdaante un Jesu i kiheisan uh hi. Jesun tangvaal haupa a pan a a lawhchin louh a theihtak in, a neih-le-lam nusia a amah nung, gin-omtak a a nazuite kiang ah, hibang in thu a hung gen hi, "Adiktak in kung hilh ahi, mi hausa a diing in vaangam luut a haksa ahi" (Mat. 19:23) a chi hi. Tuachiin nungzuite'n lamdang satak kawm in Jesu a dong ua, "Kua hundam ahi ta diai?" (v.25) chiin, tuachiang in Jesu'n a dawng a, "Hihpen mihing a diing in sil hitheilou ahi a, hinanleh Pasian a diing in sil bangkim ahithei hi" (v.26) a chi hi. Hibang ahihlai in, Peter , a inn-le-lou nusia a a nungzuipa'n missionarite bangdeuh sim in, hi chi in a hung chi hi, "Ngai in, kou bangkim nusia in k'ung zuita ua, bang ka mu di uai le?" (v.27) a chi hi. Tua chiin Jesun Peter kipum piakna phawk-hilhna tawh kawm in, hi chi in a dawng hi, "Mi chih, ka min ziak a, a inn hiam, a sanggampa hiam, a sanggamnu hiam, a pa hiam, a nu hiam, a zi hiam, a tate hiam, gamte hiam nusia in, a lehza a mu diing ua, taangtawn hinna a ngah diing uh hi," a chi hi. (v.29).

Hilaitak a, ei a diing a simmun poimawh leh theih-huai pipen ahih leh "Ka min ziak a" chih ahi a, hih ka min ziaka chih pen tangtak a i et-zui diing un hoih ka sa diak hi. Mi kua hitaleh, inn hiam,  lou hiam, gamte hiam, zi hiam, tate hiam, nu leh pa hiam Jesu min a nusia ngamte'n, a nutsiat-theih leh a nutsiat ngamna diing ua a tha thousaktu leh a tha haatsaktu diktak khat a om a ngai a, tua pen Jesu Khrist ahih ding  ahi. Khrist itna ziak ahih diing ahi hi. Hih pen Jesu Khrist reputation taang a amah (a inn leh lou leh a itte tengteng nusia ngampa) ding, or kipan chihna ahi a, hih pen Englishte chihdaan hileh "for the sake of Jesus' reputation" chih diingdaan ahi.

Tualeh leitung a mi zousiah in Pasian tapa min pen a tawisan ua,  a zahtaat diing uh pen Pasian tup leh ngim ahi hi. Aziak ahihleh mite'n Tapa a pahtawi ua, zahna a piak chiang un Pa zong pahtawi in a na om hi (Marka. 9:37). Tualeh Jesu Khrist min a khup tengteng a khupdin uh hun chiang un zong, Pa Pasian thupina diing mah a na hi zeel hi (Phil. 2:0-11). Tuabang ahihziak in Pasian teenna leh ompihna mission (God centered missions) te a hin tawntungna ziak uh ahihleh Jesu min ziak ahi hi.

Pasian Min Kizahtatna Ding A Missionary Thu-Ngetna

Matthai 6:9-10 a i muh uh, "Na min kizahtaat hen. Na gam hung tung hen," chih kammal ahihleh, Jesu Khrist sinsaknate lak ah, Pasian nna sepna diing a solkhiakna nna sep tuamtuamte (Missions) ahihleh, Nam zousiah tung a minthang leh thupi pen Pasian ahih diing deihna leh veinatna hilchetna kichian pen ahikha diing in ka gingta hi. Jesu Khrist in hih Bible taang tungtawn a, a hung hilh ut pipen ahihleh, Pasian kiang a, a min a kizahtaatna diing a nget diing, leh a lalgam a hung tun sakna diing a nget ding ahi a, hih pen missionarite thu-ngetna diing diktak ahi hi. Aziak pen  hih in Pasian nei ginaloute (Pasian nei taktak loute) leh Pasian nei mumalloute lak a Pasian min theih a a om theihna diing a Pasian veinatna tawh kitanau/ kilaichiinna hoihtak a neih ziak un ahi (Sam. 9:17; 74:18).

Pasian min zahtaat diing i chih uh pen, Pasian min, lungtang taktak tawh hawmthohtak a kep diing, ittak leh deihthohtak a etkol diing chihna ahi a, sil zousiah tung a i koih ua, i zahtaat diing uh ahi hi. Jesu Khrist in a awlmawh masa pen ahihleh, Toupa thumna a petition (ngetna) masa pen ahi a, ama'n a hung hilhdaan ahihleh, mitampite Pasian min zahtaat diing a a hung pai diing uh ahi a, tua pen sil zousiah (the universe) omna ziak ahi (reason). Tua sil zousiahte'n Pasian zahtaatna a piak diing uh pen, Pasian in amauh te ading a apiak mohpuakna uh ahi a, hinanleh, hih Pasian zahtatna sil jousiah ten apiak theih naitadih louh ziak in, hun na om sate a pan in tuni tan leh hun hung tunglai diingte ah zong  mission a omden na diing ziak ahi a, huabang hilou hileh, missions pen abei ta kha ding hi. Sil jousiah te pen Pasian min zahtat dinga om ahi ua, tuoleh Mission a hin tawntungna zong Pasian min a kizahtaat tawntung louh ziak chauh hilou in zahtaatna a kipiak tawntung theihlouh ziak ahi hi.

A min Ziak a Bangzah A Thuak Diing

Damaska zawtna lampi a sawltak Paul a hung pianthak khit in, Paul a diing in Jesu Khrist pen gou thupi pen leh manpha pen, a lungdamna bukimna a hung hita hi. Tuachiin ama'n philippi mite kiang ah hichibang in lai a hung khaak hi, "Ka Toupa Jesu Khrist theihna manphatak ziak in, sil tengteng manna in ka sim hi," (Phil. 3:8) a chi hi. Hih pen gin-omna manpha leh mantam ahi hi. Paul in Damaska lampi a a vazilkhiat sil thak, khatvei zong a na theih ngaihlouh leh zaak ngailouh thu ahihleh, a khelhnate ngaihdam a a omna thu ziak a kipakna leh, sil zousiah a kumpipa tawh a kipawlkhawm ziak a kipahna ahihbaan ah, bangzah a a thuakgim diing e? chih thu a na lungdampih mahmah hi. Tuachiin Jesu'n Paul kimuhpih diing in Anania kichi mipa, a thugen diing tawh a sawl a, Anania kiang ah, "Ka min ziak a bang zahta a thupi ahia athuak ding, akiang ah theisak ding ka hi," achi hi. (Nas. 9:16).

Paul missionary thuakgimnate ahihleh (for the sake of His name) amin ziak in ahi hi. Tualeh a hinkhua a bei diing kuanlam in, Jerusalem zuan a pailou diing in Paul kham in a na om a, tua mun ah Paul in hibang in thu a hung gen hi, "A bangchi dan a mawk kahkah a, nung khasiat sak uh ahia? Jerusalem khua a lep-hen a om diing bek hilou in, Toupa Jesu min a sih zong ka ngap hi," a chi hi (Nas. 21:13). Tuachiin Paul a diing in leitung ah Jesu Khrist min thanna leh a reputation pen ama hinna saang poimawh zaw a hung suakta hi. Na hinna leh Toupa Jesu na deih penpen teel diing hita lechin, nang khoi pen na teel diai? Kha hausakna leh taksa hauhsakna khoi pen na deih zaw a? Khovelta hih diing leh Pasian ta hih diing khoi pen na utzaw a? Jesu Khrist leh na hinna khoi pen a thupi zaw a?… Nang a diing a na sih a, Khrist a diing a na hintheih diing pen poimawh mahmah hi. Nang leh nang na ki-ngaihsak luat leh, Khrist in nang leh nang ki-ngaihsakna ngam in a hung ngaihsak kei khadiing hi.

Namte Lak Ah Amah Min Ziak In

Paul in Romite kiang a a lai khaakna, bung khat  taang nga ah kichiantak in, Pasian in a sapna leh a mission pen Namte lak a, Jesu Khrist min a sap leh sawlkhiat ahihdaan hichi bang in a na gen hi, "Amin jiaka Nam chin lak a, mi ginna lam a thu mang sak dingin hehpihna leh sawltak hihna i tanghta uh hi" (Rom. 1:5) a chi hi. Sawltak Johan in zong Paul gendaan bang in Christian misonari masate tha thohna leh kilopna a na gen hi. A saptuamte lak a khat kiang ah, lai khak a genthoh in, Saptuam mite lak a a muan-huai khat sawlkhe diing (missionari nna a sem diing a kuan ding) in a chi a, tua mipa ahihleh Pasian pomtaak (worthy of God) ahih diing ahi a chi hi. Aziak pen hi bang in a gen hi, "Amah min ziak a pawt khia ahih ziak un Gentelte kiang a pan in sil piak bangmah a saang nuamkei uh hi" (3Jn. 6-7, NASB).

John Stott kichi mipa, scholar minthangtak leh laigelhmi hi a theih a ompa'n, hih a tung a i taklat uh Laisiangthou bung leh taang tegeel, Rom. 1:5 leh 3Jn. 7 na comment hi bang in a na pia hi. "Pasian in Jesu Khrist tung-tuannate tengteng tung ah, tung-tuanna a pia a, akhut ziatlam a tousak in, hihna (rank) saang penpen apia hi, tua chi a lei (tongue) tengteng in Toupa Pasian ahihna a phuanzaak theihna diing un, chih a thei gige uhi," (Rom. 1:5 na leh 3Jn. 7 na a missionary kisawlkhete).  Tualeh hih missionarite'n, Jesu Khrist in amin ziak a pahtawina leh zahtaatna saang pen a tan diing ngak-lah leh mu nuamtak a om in a om uhi 7. Hih sil ngak-lah huaitak, amuh ding kaal a ngak-lah mahmah uh pen, manglam ahi kei a, a taktak sil, sil kichian khat (certainty) ahi hi. Eite'n i kinepnate tengteng uh taw (nuai lam pek) ah, sil zousiah a om nawnlouh a, sil chiteng in a hung nutsiat khit chiang, hih sil thupi leh a taktak masang ah i ding diing uhi; a tawntung taksap louhna ah, Pasian tehtheih guallouhpa mai ah, lungkimtak leh khamuangtak in, leh khantawn in hih a min thupi leh siangthou minthanna in i kipekheta diing uh hi. Aman Namte lak ah amin thanna diing in hih a bawl diing hi. Khantawn khantawn in amin zahtaat louh leh thaang bawl in a om kei diing hi. Saptuamte'n Missions  a bawlte uh leh a neihte un a gual zouta diing hi. Aman amite  kichiantak a enchian in a hung hilhchian diing hi. Leitung ah amah tawh kisai lou a omlou ahihman in Aman ama hoihsak bang in nna a semta diing hi.

TOUPA'N THUPHA HUNG PIA GEN....

Share: