Jesu Khrist nung ka zuihkhawmpih Saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Inn mun pan in chibai ka hung buk uh hi.
Leitung A Message Genzaak-theih Pen
Pasian in missionary enterprise tuamtuamte a tha thohsak-theihna diing in, lampi khat bek a zangh kei a, lam tuamtuam leh chanel tuamtuamte a zang hi. Taangthupha, Pasian taangthupha zong Namte tengteng lak leh tung a genzaaktheih, sep khiattheih, bawltheih ahi. Aziak pen Pasian a neipa ahi a, Namte tengteng Pa, leh Pasian ahi hi. Hih pen adiak in Pasian sung a lungdamtak leh nuamsatak a omna diing deihna ahi. "Toupa kumpipa ahi hi! leitung pumpi nuam hen; tuikual gamte zong kipaak uhen!" (Sam. 97:1, TK) "Pasian aw, mipite'n hung phat uh hen; mi zosiah in nang hung phat uh hen. Namte kipaak in nuamna laa sa uh hen, aziak pen nang namte tung ah diktattak in vai na hawm a, tualeh leitung ah namte na makaih hi. Selah" (Sam. 67:3-4). "32 Bawlgentheih thuakte'n mu uh henla, nuam uh hen; nou Pasian lam zongte'n zong, na lungtang uh halhthaksak kiik un" (Sam. 69:32). "Nang hung zong zosiah in na sung ah nuamna leh kipaakna mu uhen. Na hutdamna ngai zosiah in, "Pasian a thupi hi," chi tawntung uhen!" (Sam. 70:4). Pasian ah nuam un, Pasian sung ah kipak un! Pasian sung ah lungdamna laa sa un! Pasian sung a na lungkimnate tengteng in, na sung a om Pasian thupina leh pahtawina apia hi! Pasian tung a na lungkimna pen Pasian thupi na ahi! Mikhialte tung a a hehpihna a latsak-theihna diing in Pasian in amah leh amah a kitawisaang diing pen, a poimawh ngaih mahmah hi! Chihlouh missionaryte'n bangdang kua kiang ah zong a vagen thei tuankei diing uh hi. Aziak ahihleh mi tengteng in Pasian sung a lungkimna a muh ding uh missionaryte tup leh ngim pipen ahihziak in ahi. Pasian sung a lung damna pen Pasian thupi na ahi chih message pen missionaryte a diing in athupi pen pen hi.
Eite (Missionaryte) i hih uh leh, mi zousiah, Pasian a diing a samkhawmtute ihi uhi. Tuaziak in mi kua hileh, sapna zaa a hungpai a om leh, ama'un zong, "Nang hinna lampi n'ung musak hi. Na ompihna ah kipahna bukim a om a; na khut ziatlam ah taangtawn lungkimnate a om hi (Sam. 16:11), a chih theih ngei-ngei diing uh ahi. Pasian in "Toupa tung ah kipaak in, tuachiin ama'n na lungtang deihlamte a hung pe diing hi," (Sam. 37:4) chih thupiak tawh, amah leh amah Namte tengteng tung ah a kitawisaang a, thupina a kipia hi. Munchin gamchin a mi zousiah in lungnopna, kipakna, leh nunnopna mun tuamtuam leh sil tuam-tuamte a i na zonna ua pan a kisiik a, Pasian sung a nunnopna, kipakna leh lungnopnate i zon chiat diing uh pen, Pasian in a poimawh masa pen a a koih ahi hi. Tuaziak in ama'un (missionary) ten kipakna leh nuamnate sil dang teng lak a a na zonna ua kipan a a hung kisiik diing un, amah (Pasian) chauh sung a a zon zawk diing uh pen Pasian deihna ahi.
Tualeh, Pasian pen, mi dangte nna sepsak a om diing hi lou pa6 ahihleh a nunnuam Pasian ahi hi. Leitung a mihingte'n i bawlkhelhte uh lak a a lian penpen ahihleh; Pasian thupina a khantouh-theih semsemna diing a Pasian nna i sepna ua i lawhchin zawhlouhna ahi kei a, himahleh, Pasian thupina mite'n eite apan a amuh theihna ding ua, eite Pasian sung a lungdam leh lungkimtak a i omna diing ua, i lawhchin zawhlouhna uh ahi hi. Aziak ahihleh Pasian sung a i lungdam mahmah chiang un, eite sung a om Pasian pen eite tungton in a thupina latsak (phuanzaak) in a om hi.
Hih Pasian thupina leh minthanna pen Namte tengteng in a tawisan diing uh muh diing pen, Pasian leh eite (Pasian nna sem mite) a diing in sil kilop-huai or thanop-huai mahmah khat ahi hi. Pasian in a mite kipakna tehtheih guallouh a thupi a, a piak diing tupna leh ngimna a neih pen, Saptuamte'n Missions a neihte ua, Pasian a minthan pen diing leh a thupi pen diing, Pasian lunggulhna leh tupna ahi hi. Hih Pasian tupna leh ngimna pen mihingte nan/dal guallouh, leitung a i damsung ua, i Pasian nna sepna diing ua hung haatsak, hunghalhsak, leh hung tha thousaktu ahi hi. Hibang Pasian lungsim leh veinatnate chihlouh thudang, nupa kaal thu hiam, nu-ngak leh tangval kaal thu hiam, leh thu dang tampite tengteng pen, mi tengteng kiang ah a kimawk gen theikei hi. Aziak ahihleh, i class uh a kibatlouh ziak in ahi. Hinanleh, Pasian lungsim leh veinatnate mun teng, gam teng leh mi tengteng kiang ah a kigen thei hi. Aziak ahihleh i kha-lam hihna uh a kibat ziak in ahi. Pasian in mi tengteng amah lim-le-meel pua in a siam a (Gen. 1:27), tualeh Pasian pen kha (Jn. 4:24) (Spiritual being) ahihman in amah lim-le-meel pua a a siam mihingte'n taksa daan in Pasian lim-le-meel i sunkei ua, hinanleh Kha (our spiritual nature) in amah lim-le-meel pua in amahtawh i sun uhi. Aziak pen, Pasian in Adam ama hinna kha hu a khahkhum masang in Adam taksa, tungman a kibawl pen a om ngeng ngong lel hi (Gen. 2:7), hih Pasian in mihingte a hung piak hinna kha mi tengteng a a om ziak in Pasian lungsim leh lungtang leh a kiveinatnate tengteng a kigen zaakthei pen hi. nang, Pasian lungsim leh lungtang leh a kiveinatnate genzaak diing in na ki man tai le? Ngaih sun pha in, Pasian in nang mah mah hung deih sese hi.
Missions Tung a Pasian Athupi Pen Ahihna Laisiangthou In Agendaan
Saptuamte a kipan a missionary nna sepna diing phut-luihna ah Pasian a penpenpa ahihna Laisiangthou in kichiantak in a na gen hi. Hih missionary muhkholhna (vision) Laisiangthou sung a pat a i muh un, Pasian pen missionary muhkholhna laizang laigil laitak ah a awm hi chih a hung thei kholhsak hi.
Thukhunlui bung leh taang khenkhatte'n Pasian minthanna leh thupina pen missionarite taangkouna laigil laizang laitak ah a awm hi chih, a hung musak hi. Sam. 96:3 "Namte lak ah a thupina phuangzaak unla, a nna sep lamdangtakte mi zousiah lak ah gen thaang un," Isai. 12:4 na in zong hibang in a na gen hi, "Ama min tawisan in omta hen, chi in genzaakta un." Hihte baan ah a dang tampi zong a omlai diing hi.
Jesu, Sawltak Paul, leh Johante'n zong a missionary taangkouna uh laigil laizang laitak a Pasian a thupi ahihdaan leh a lian pen ahihdaante kichiantak in i muthei uh hi.
Toupa'n Thupha Hung Pete Hen
.jpg)
.png)
.JPG)
No comments:
Post a Comment
Comments not related to the topic will be removed immediately.