KHALVONTAWI

NAMTE NUAM UH HEN (E001)

By: Pastor Thangdoulal

THU PATNA

Lungkimna leh lungnopna saang a poimohzaw na hinkhua a om bang hiva na chi ei? Gimgentheihna tuam-tuamte leh i sil deihte uh, i neihtheihna diing ua zum-le-zah khawksalou a i om teitoi ua, i pan chiai chuaidaante uh, na ngaih sut zeel-zeel ei? Na hinkhua zakdaan lamdang nasa ei? Bang ziak a eite hichi ita diing uai le, chih na ngaihsut ngai ei? Ngaihsut diing a poimoh mahmah in ka thei hi.

Mihingte'n leitung a i silbawlte uh, i gentheihnate tengteng uh, leh i omdaan leh hinkhua zakdaante tengteng ki-khaikhawmna bulpi khat a om a, tua pen lungkimna leh lungnopna ahi. Hih lungkimna leh lungnopna i neihtheihna ding un, zum-huaina tampi i thuak mualsuak uhi. Aziak pen zum-huainate mihingte a diing in i gou neihsun uh ahi a, tualeh hih zum-huainate pen i mihing hinkhua uh mizia leh mi hihna zong ahi hi. 

Etsakna dingin:

Ta-le-nau deihna in mihingte numei leh pasal kaal a zum-huainate apan a hung kideksak zoukei hi.

Gilkialna in nek-le-dawn zumnate a pan ahung kideksak zoukei hi.

Sum-le-pai deihna in zumloutak in nna (sil) tuamtuam a hung semsak hi. Tualeh hih zum-huainate apan a hung kideksak zoulou sil tampi a om hi. 

Hibang a mihingte'n zum-huainate zum-huaina a simlou a, lungkimna leh lungnopna i na zon uh ahi. Hinanleh lungkimna leh lungnopna diktak i mu zoukei uhi. Aziak pen, eite'n zum-huainate a pan a i na zon ziak uh ahi hi. Hinanleh eite a diing in lampi khat a omlai a, tua pen Pasian sung ah ahi hi. 

Hih Pasian sung a om lungkimna leh lungnopna mihingte'n i muh ua, i neih ua, i tan diing uh pen Pasian deihna leh lungkimna zong ahi hi. Tuaziak in Pasian in leitung ah, amah lungkimna leh mihingte lungkimna a kituak-theihna diing in a mission (nna sepna) a hung phutkhia hi.

Tualeh, Mission i chih uh kammal pen ei haam in sawlte chih na ahi a, Laisiangthou suutdaan in hih kammal pen "misio dei" chih a pan a kilasawn, Pasian sawlte chihna ahi hi. Tuaziak in mission kichi khat pouh-pouh pen, mihingte a a hikei a, Pasian a ahi zaw hi. Mihingte'n Pasian mission nna i seppih uh ahi a, tuaziak in eite pen 'just partaker in God's mission' (Pasian nna sepna a pangte) i hi uhi. 

Tuabaan ah, 'Missions' chih kammal pen 'pasian nna sepna dinga sawlkhiatna nna septe,' chiin i zang ding uhi. Aziak pen Pasian (mission) sawlte lak ah eite zong i pang uh hi. Hih Pasian mission in atup leh a ngim pipen ahihleh, Nam zousiah, Haam zousiah,  leh mihing zousiah in, Pasian sung a lungkimna leh nuamna i muh chiatna diing uh ahi a, hih pen Pasian lungkimna leh nuamna zong ahi. Tuaziak in "Namte Nuam Uh Hen" (let the nations be glad) chih minpua in hih thu i ngaihsut khawm diing uh hi. Nam zousiah in lungkimna a neih ua, a lungkimna ua Pasian zong a lungkimtheihna diing in, Pasian lungsim zong leh ngaihsut kawm in guntutak in i sim diing uh hi.

Leitung a Sil Thupi Thathoh-huai Khatna

Leitung ah sil thupi leh thathoh-huai a tam in atam a, khat-khat a suut a suut seng zawh ding zong a hikei ding hi. Aziak pen leitung mihingte deihlam leh kilopnalamte a kibangkei a, kei a diing a sil thupi leh thathoh-huaite gen lengh, midangte a diing in a na hou (simple) mahma diing a, midangte'n zong ama'uh a diing a sil thupi leh thathoh-huaite gen le-uh, kei a diing in a na-hou (simple) mahmah maithei diing hi. Tuaziak in, hih leitung a sil thupi leh thathoh-huai pen, ei mihing mit pan a enlou in Pasian mit tawh i et diing uh ahi, chiin i kichial masa uh hi.

Leitung pumpi a saptuam (Churches) kichi zousiah in a tup uh leh a ngim uh a thupi penpen bang a diai? I chih leh, mi taangpite ngaihdaan in missions ahikha diing hi. Aziak pen Pasian nnate sepna ahi hi. Hlezong Saptuam tup leh ngim pipen missions hilou in Biakpiakna (worship) ahi hi. Tualeh Pasian nna sepna tuam-tuamte tuni dong a om a, a hinlai ziak ahihleh, Biakpiakna Pasian piak diing pen a hin tawntunglouh ziak ahi hi. Tuaziak in Biakpiakna pen Saptuam a diing a athupi penpen leh, a bulpi penpen ahi a, Pasian nasepna tuam-tuamte (missions) a na hikei hi. Aziak pen Pasian ahihleh Saptuamte a diing a a bulpi penpen uh ahi a, mihingte a hikei hi. Hih leitung nite a hung bei chiang, sim senglouh hutdamta, a siing a sangte'n Pa Pasian laltouna mai a khupdin a, amai a akuun chiang un (missions) Pasian nasepna tuam-tuamte a om nonta kei ding hi. Hinanleh Biakpiakna pen taangtawn taangtawn in a omden diing hi.

Tuaziak in, Pasian nasepna tuam-tuamte (missions)  kuantoh, leh ngim pipen ahihleh Biakpiakna ahi hi. Biakpiakna kichi, missions tup leh ngim a hihna ziak pen, Pasian thupina sung a nopsatak a Pasian biakna a Nam zousiah puaklut diing deihna ziak ahi hi. Tualeh Pasian nna sepna tuam-tuamte tup-le-ngim laigil penpen ahihleh Pasian thupina leh vaangletna sung a mihonpite lungdamna ahi hi. Laisiangthou in, "Toupa'n vaaihawm hi. Leitung nuam henla, tuikulh gam zousiah kipak hen" (Sam. 97:1) a chi a, "Pasian aw, mite'n nang hung phat hen la, nam zousiah in nang hung phat hen. Namte kipak henla, nuam in laa sa uh hen aw" (Sam. 67:3-4) a chi hi.

Biakpiakna pen missions kuantohna laigil ahi a, biakpiakna tawh Pasian ngaihnatna in, Pasian thugenna (preaching) a piangsak hi. Aziak pen, leitung mihingte'n i lungsim ua om khalou thute a kimokgen theikei hi. Tuaziak in biakpiakna tawh Pasian ngaihnatna lou in kuamah in Pasian thu a hihna bangtak in a genkhetheikei diing hi. Tualeh missionarite'n zong, biakpiakna leh Pasian ngaihnatna panglou in "Nam tengteng aw Toupa ah nuam un" achi theikei diing uh hi. Kuamah in lungtang a kipan lou in, "Kei Toupa ah nuam diing  hi'ing… nang ah kipak leh lung nuam ut hi'ing, tungnung pen aw, na min phat nuam ingh" (Sam. 104:34; 9:2) a chi theikei ding hi. Missions kipatna leh tawpna ahihleh Biakpiakna ahi hi. Tuaziak in hih Biakpiakna pen leitung a sil thupi leh thathoh-huai mahmahte lak ah a khatna ahi i chi uh hi. 

Pasian thupina delh a kalsuanna pen, thupiak bang ahi kei a,  mihing hoihna, lungtang a kipan a deihthohna leh Saptuam a diing a biakna a pawimoh masapen ahihkei leh, mihingte'n Pasian nna a sepna uah semtu hoih hihna a tang ngaikei ding ua, Pasian zong sangtak a pahtawi leh phat in a omkei ding hi. Missions beisak tani hang chi a agen kahi kei a, hinanleh Pasian thupina a lianzaw a phat a a omtheihna diing a gen ka hizaw hi. Pasian biakna diing a, a kilawmna chiangtan a a ki-biak chiang, Pasian biakna pen mei kuang ingh bang ding a, tua biakpiakna mei kuang in missions  ing salhvak pempom ding a, tua mission vaak in, leitung pumpi mial sah bikbek nuai a awm mite ing taan vak ding hi. Tua hun a hung tun ding kal ngaklah na in i kidim uh hi.

Pasian ngaihnatna leh veinatna a kiam a, a haatlah deuh chiang, Mission nna sepnate zong a haatkei hi. Saptuam khat peuhpeuh in Pasian hihna leh zah-omnate leh a hoihnate a laapsan or a tawisangkei leh, "Namte lak ah a thupina phuang un" (Sam. 63:3) chih thu a lung-gulhtheih tei tei ding uh ahi. 

Leitung a Sil Thupi Thathoh-huai Nihna

Missions sung a diing a ngaihtuah leh kikup diing a poimawh leh thukhok mahmah khat ahihleh, "Saptuam laizang laigil laitak a Pasian a omna" chih hi. Mi zousiah in Pasian thupina leh vaangletna lamdang a saktheihkei uh leh bangchiin ama'un, "Toupa a vaanglian a, thupitak a phat ding ahi; amah Pasian dangte tengteng saang a lauzawk ding ahi" (Sam. 96:4) achi thei ding uai? Missions ahihleh amasa pen leh a poimawh pen a hikei a, hinanleh Pasian ahi zaw hi. Hih thudik pen, missionarite tungtawn a muhtheih diing in a om hi. Aziak pen missionarit'en sih tanpha a ana thuakna un Pasian thupina leh vaangletna agen hi. William Carey, modern missionpa chih min piak a om pa'n, England apan in India ah 1739 in long (tui tung apai nate) zangh in ahung pai a, amah thugen tawh zong hih thute in ki-chimatna anei hi, hih anuai ah i en ding uhi.

England ka nutsiat in, India pianthakna (kikhekna) diing a ka kinepna a lian mahmah  hi; hilezong  tuate lak ah haksatna tampi a om hi. Pasian in a hung chihpihkei leh, hih pen a sithei (beithei) lel ahi. Hilezong Pasian ka nei a, a thu zong a muan huai hi. Mi zousiah in hung taimangsan in, thuakgimna chinteng hung thuaksak le-uh zong, ka ginna, a muan huai Pasian thu sung a om pen in, gentheihna zousiah leh hatsatna chiteng a pan a hung thousak hi. Pasian nna leh silte in a gualzou zeel ding hi.1

Carey leh amah bang a tuul a simte'n Pasian gualzohna leh lawhchinna thupitak muhkholhna in nna a semsak a, a lam uh zong a kaihsak hi. Hibang muhkholhna a om masak teitei ding ahi. Aziak pen, muhmasakna in tha a hung guan a, tua tha mah tawh maa a kitun zou hi. Pasian biakpiakna a limna leh chi bang a a alna pen missions kekletna leh khantouhna ahi hi.

Leitung a om taangthu zousiah, tup-le-ngim khat nei in a pai a, tua pen leitung leh a sung a om mi zousiah lak a Pasian tapa Jesu Khrist leh Pa Pasian thupitak a biakna diing ahi.

Mission ahihleh, i ngimna uh leh i tuppipen uh ahi kei a, hilezong a lampi ahi zaw hi. Tua ahi leitung a silthupi tha thoh-huai nihna.

TOUPA'N THUPHA HUNG PETA HEN

Share: