MISSION FIELD A TANGVAL HINKHUA LEH TULAI NATNA JIAKA LOCK DOWN | Eric Suantak TBC Missionary

MISSION FIELD A TANGVAL HINKHUA LEH TULAI NATNA JIAKA LOCK DOWN

  -Eric Hanglamthang Suantak

Amasa pen in i Toupa  Jesu Krist min in chibai kung buk hi. 

Tulai tak khovel in galpi 3 na bang a natna hileng pan in nouten toplou a thumna nung na nei sak nate uh jal in kei jong field a Pasian toh nuam takin hun kana jang thei jel hi. 

Mission Field a ka tuakte

Lailad Mission field ah October 2018 in Michael Hasda (native woker) inn a room khat a ka om hi. Hi hun in kei pen kum 24 ka pha pan a, khangdong gual nop laitak in Missionary na sem dingin Lailad Mission Field, Ri Bhoi District, Meghalaya ka va kuan hi. Tua mun ah sing leh gua toh mani ann nek ding kibawl in ka loipa Mangcha toh room neu nou khat a ka khosa khom uhi. Hun sotlou nung in, February 2019 in ka loipa damlou innlam  pai a, tua apat in Training dingin ing pot san suaka, kei chou in kung khosa panta hi. Tua hunin bangma chik a ann jong huan ngai lou, sing a ann huan chi pen sil hamsapi khat hung suak mawk ta hi, hi bang hun sungin ka ngawl hun jong awm jel hi. Ka umna Lailad a electric(meivak) leh Network jong atung keia, Black and white 1947 hun lai kigen ma bangin hi. Home environment toh tong leh lam in aki khia a, kaki adjust theipai kei hi, ahin lah Toupa kia ka thum a, Toupan kei a dia lemgel nei ahi ding hi chi in hunteng in kaki hatsak jel hi.

Hibang genthei iki sak kawmkal a communication gap jiak ka nungaknun ung hungkhen na pul dou pha pan ici lai lai in, ka umna ganhing (fly) thoukang, thouvai, chik chite tamna ahi manin Typhudus (Typhoid) chi khat in ahung tuam a Hospital akal ni bang ann ne theilou gilpina khosik in kana ki admit hi. Mi dam thei mahmah Doctorte kia ki ensak ngailou Hospital a jong um ngailou ka nahi a, Hospital aka um in si ding bangin, ka ngaituah na saupi ana pai man hi. Ka umna Shillong apat in 90 kms ding vel in gamla a, ka field ka run na dingin gari 4vei khek ngai a tua ban ah keng in 2 kms kipai lai a, pai sukh pai tou na a haksat na tampi gen senglou ka tuak kit hi. Tuin Toupa thupha toh Pasian in amite jang in gari thak khat ing pia a, manpha takin damloute hospital a joh pi na le adang dang a ka na jak thei tak manin Toupa min ka phat ahi.

Light tung loupen ka pohna mahmah a, ahin lah akhua neite toh pangkhawm in sai theina chi teng a aki sai a ahinla aki mual suah jou kei hi. Meghalaya mission field a mite pen  gam neiloute ahi manun nuaisia na leh neng niamna lianpi khat aki tuak hi. Hospital lak bang a damlou enkol in ana kigiak jel a, hua hun ciah jong proper care ki ngah lou a, simmoh na khat toh ei pumin ing ki en niam a, na kasa thei mahmah mai hi.

Single jiak a nopsak na leh thawmhauna

1) Tangval khat kahi manin kua ma buaipi ding ka neinai kei, Missionary Quarter ding thumna toh pangin Toupan a mite kei ung hudingin hong sawl a, mite panpi na leh kei ma pocket money toh dangka 1,20,000/- lak bei ding phialin Pasian' hung lamsak jou a, Toupa min ka phat kik ahi. hung na thumpi te leh ahung ki thuapi te in, hi inn pen mu kei mah lei jong, ni khat ni chia Toupan van a i inn lam uh hung musak ding ahi. 

2) Field a Single a um pen ka personal Quiet time (Devotion) hun ciangin nuam kasa mahmah hi. Ahung subuai ding kuama kanei kei a Jan khang dak 12:00am lak in jong biakinn a thumna ka ut tantan in kava nei thei jel hi.

4) Lailad Field a ka um sungin innkuan 8 in ki thei chetna nei in Biakinn a hung kipia lut uhi.

5) Tangval ka hi manin ka burden (puakgik) bangbang in na kasem thei a damloute giak pi a ngaih leh giak pi theiin, jankhang-jankim a damdoi innte a taipi thei in ka um amanpha ka kisa hi. 

Thawmhau kisakna

Ahinla khat veivei taksa dan a um aki hi manin, Pasian in jong Eve ana siam hi ve o, chi lungsim ngaitua na ahung um thei jel hi. 

1.Ministry i pai chiangin ka omna pan 5/7 km vel a gamla keng lam a jong ei chou in kipai deel dul mai a inn dak 8;00pm teng in ki tung a nek ding ann ki huan a e nek joh cia dak 11:00pm lam bang na ging jel hi. 

2.Ministry paina lak a inn sung a pasal bang a um keile ei chou aki hi manin inn um teng a ki mawk lut ngamlou a, inn a e um chia jong numei meh juak hiam bang hiam in sak in khang kho lai leng chia jong buai huai sim hi, inn a numei alut apot mawk agal a mute ading in ngaitua na diklou bang um thei mawk hi. 

3. Hospital ah numei nau nei te ka etkol khak ciang bangin poi mawh sim mawk hi apasalte uh sum neilou ahi manun sum jong in kisawl khia ahi manin. 

4) Damlou hitang hun ciang in jong ahung kem ding in poimwh a thu haksa te ka tua chia jong ki khup pi ding omlou in thawm kha jel hi. 

5) 5th march 2020 nitak 11:30pm in ka umna Umran a Jill (earth quake) hung ling a inn mai lam a katai khia a kei chou, innsak innkhang la houpi ding umlou in ka um a thawm hau kaki sa a Toupa kia panpihna kangen a, ama thu leh laate ngai in ka khovak hi.

Hi ka single hun pen Toupan ama toh nuam tak a kikhawl khawm phot dingin hun manpha hung lemgel sak hi dingin ka ngai tua a,Toupa gou manpha kahi chi-in, kei le kei kana ki kha muan jel hi.

Tulainat na Lock down

Hicin pan lei ka chi a, 1975 February  lai-in tangthu khat na awm hi, lamkai luite Rev Dr Pumzathang Tombing leh a loite Rev Paukhanlian leh Rev Lamkhanthang te, Manipur apat kawlgam ah hundamna thugen dingin na kalsuan uh hi.Tonjang khua a kawl sepaiten thawng sungah kha khat sung ana khum uhi. Hi hun sung a sun leh jan chilou in a thawngkiat pite uh Lungdamna thu  ana hil uhi. Thawng a um teng apiangthak joh uh kha khat joh lamin ana ki kha pan chi ana kigen ahi. Hi pen Toupan lemgelna khatnei hiding ahi, ajiakpen midangte thawng sung ana ki lut phal lou hi. Sia JM Paupu leh Sianu Dimnu seminar na khat a, a gen uh ka na hinpi khat ahile "Don't waste your Geography" chi pen tutan in kana jui lai hi. Hibang hunin gingtute Lock down in um hang, hilezong Lungdamna thu tangkou ding pen ki Lock lou ahi. Sia G S pau in a Article a hicin na gel hi "Tate khamit keuhna leh kha lamah a khan touhna uh pen biakinn pan himasa lou in inn kuan pan hi zaw hi. Pastor apat hi masa lou in nu leh pa apat hi zaw hi". Chi in na gen hi.

Johan bung 4 na i sim leh Jesu a gim a atawl dam ut laitak Samaria numei ginnalou pasal 5 nei nu toh ing ki tuak a, Jesu ahungthei chian chiangin, a khuapi Sychar khuate kia va tai in Jesu aki tuakpi dan va gen pai hi. Johan 4:39 a Numei nu Testemony jiak in mitampi ten Pasian gingta uhi. Nasepte bung 9 i sim le,Paul in Damaska jotna lampi a Jesu toh aki tuak na uh i mu hi. hibang a gingtute bawlseh dia Damscas khua a pai pa in Jesu toh lamkal a ahung kituak chiang in, Damaska khua ah

 "Jesu tuh Pasian Tapa ahi" chi in athu gen apan ahi chi bung 9 chang 20na a chiangtak in aki mu thei hi. Samaria numeinu jong Johan 4:18 na ah Jesu in agen bangin numei ginnalou khatpi hiding hi ahinlah, aman Jesu ahung thei chien chiang in mite adingin Gualzawlna hung hi ahi. 

Tuin hi bang a hun lem chang, hun tho veng ahi lai-in nang jong hi samaria numeinu bangin na inn sungmite kia Jesu hung iitna thute na testimony na gen thei ahi.

Sia Rev Khaizakham in athu genna a "khovel sia na sak a na siamthak ut leh na siam jou kei dinga ahinla na innsung  na siamthak jou ding hi ana chi hi".  Tu ah na Geography na umna na hunjak dan in kum 5 joh cia agah nung muh ding hi, tua na tate na innsung a tangthupha na tangkou penin khat vei chia nata ten midang kia tangkou thei ding ahi. Gen ding a um kei le pen Jesu toh na kituak khak na kivel thak akul ding hi. 

Genkhial genval a um leh na jah ngaihna uh kung ngen a Toupa'n hi thute apat tha thak ala thei dingin thupha hunh piata hen. Amen.

Eric Hanglamthang Suantak, THANGKHAL BAPTIST CHURCH MISSIONARY

Umran Mission Field, Meghalaya.

Share: