Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.
BIBLE:
"Matt.10:22, ka min ziak in mi zousiah huat na hidiing ua, hinanleh kuapeuh a tawptan a thuakzoute hundam ahi diing uh hi. Matt. 10:25, Innneipa bawn Beelzebul a chih uleh, a inn kuanpihte bangzah in a chi tazen ding ua! Matt. 19:29, Mi zousiah in ka min ziak a a inn, a sanggampa, a sanggamnu, apa, anu, azi, atate, gamte nusia in, a lehza amu diing ua, taangtawn hinna a tang diing uh hi. Matt. 10:37, Mihing kuahileh, kei saang a anu ahihkeileh apa itzaw a omleh, amah pen ka mi hitaak ahikei hi. Tualeh kuahileh atanu ahikeileh atapa kei saang a itzaw a om leh, amah pen ka mi hitaak ahikei hi."
Jesu nung i zuihna uah, minsiatna omlou in Jesu nung a zuihtheih taktak diam? Mite gensiatna omlou in Jesu nung a zuihtheih taktak diam? Innte, Sanggampa, Sanggamnu, i pianna pate, nute, i zi, i pasal, i tate, i gamte nuutsiatna omlou in Jesu nung a zuihtheih taktak diam? A Inn, a ganggamte, a pianna nu-le-pa, a zi, a pasal, a tate, leh a gamte (goute) nuseloute Jesu'n bang a chi a? Matt. 10:37 ah Jesu'n, "Mihing kuahileh, kei saang a anu ahihkeileh apa itzaw a omleh, amah pen ka mi hitaak ahikei hi. Tualeh kuahileh atanu ahikeileh atapa kei saang a itzaw a om leh, amah pen ka mi hitaak ahikei hi," a chi hi.
Leitung ah a nu-le-pa a khatna a koihloute a kibangchi gen a? Kuamah pahtaat, phat, leh kipaakpih in a omkei hi. Pasian limsak mahmah zah a, a tate limsak lou a kilanghthei nu-le-pate a kibangchi gen a? 'Talawm in, Pasian nna sepna hilezong a innsung, a tate a kep or a et masak diing hi a,' kichi hi.
Jesu Khrist itna nei a, a hinkhua a Jesu a khatna a koihte a kibangchi gen a? Sawltaak Paul pen, i tulai Christian khang a hung omkha hileh, a hah minsiat diingdaan…! Khenkhatte'n amah kouna ahihke'h enghouna in, "Zi neithei loupa," i chi maithei uh hi. Khenkhatte'n lah, "A meetna diing theiloupa," leh a dangdangte tawh i elhou maithei uh hi. Paul in, Nas. 20:24 ah, "Hinanleh kitaidemna a kipak tak a ka tai tung theihna ding leh, Toupa Jesu a pat a ka muh Pasian hehpihna tangthupha theihsak ding nasepna, ka sepzoh theihna ding in hih silte (leitung nna-le-silte) khat bek in, ahung lausak kei a, ka hinna zong ittaak in ka simkei hi," a chi hi. Zi leh tate neih a, inn-le-lou neih diing zong khuallou zeen a Pasian hinna thupha buaipihpa, Saptuam a palai na hihpih khat, na lawm-le-gual khat, leh na mi theihngai khat hileh bangchi na sa diai? Themkhat beek in thu hilh ut maithei diing hiveteh aw maw!...
TUALAI JESU HUNLAI HILEH BANG I CHI DIING UAI?
Jn. 8:59 i et leh, 'Tuabang a chih chiang in, amaute in, amah a denna ding suang tawm uh a, ahi zong in biak-inn sung pan in Jesu gelkhia hi (Tedim),' a chi a, tualeh Lk. 4:29-30, na i et leh, "Tuachi`n a dingkhe pelpol ua, Jesu khosung a kipan in kho-gei kawl a sawnkhiat dingin apaipih uhi. 30 Hilezong mipite kawm lak apat a kigukhia in, a paimang hi," a chi hi.
Mipite A Tawh Kituaklou A Jesu Thu Gen Bang E?
John 8:48 Tuachi`n Judate`n adawng ua, akiang ah, "Samariami nahi a, dawivei nahi k'ung chih uh hung chi dik mahmah ung e maw?" achi uhi. 49 Jesu`n adawng a, "Dawipai ka hi kei a, Ka Pa pahtawi ka hizaw hi, nou kei n'ung pahtawi kei uhi. 50 Ke'n keima thupina ding bek zong ka hikei hi; hitalezong azong khat a om a, amah vaihawmtu a hi. 51 Adiktak in, adiktak in k'ung hilh ahi: mi kuapeuh in ka thu azuih leh, sihna a thuak ngai kei ding hi," achi hi. 52 Tuachi`n Judate`n akiang ah, "Tu'n dawipai nahi chih k'ung theita uhi! Abraham asita a, Jawlneite zong asita uhi; hinanleh nang, mi kuapeuh in ka thu azuih leh, sihna a thuak ngai kei ding hi, nachi hi. 53 Ka pu uh Abraham sang a thupizaw na maw? Tualeh Jawlneite zong asita ua; nang leh nang kua a kibawl na hia?" achi uhi. 54 Jesu`n, "Kei-le-kei ka kipahtawi leh, ka kipahtawina bangmah ahikei ding hi. Ahung pahtawi ka Pa ahi a, nou ka Pasian uh ahi na chih pen uh ahi. 55 Ahinlah Amah na theichian kei uhi. Hilezong ken Amah ka thei hi; Amah thei kha keng chileng', nou bang a mi zuau ka hi ding hi. Hinanleh amah ka thei a, tualeh athu zong ka zui hi. 56 Na pa uh Abraham in ka ni amuh ding a ut mahmah a, tualeh a mu a, akipak mahmah hi," achi hi. 57 Tuachi`n Judate`n akiang ah, "Nang kum sawmnga zong ching nailou pi'n, Abraham na muh khâk maw?" achi uhi. 58 Jesu`n akiang uah, "Adiktak in, adiktak in k'ung hilh ahi, Abraham om masang in, 'Ka om tahi,' " achi hi. 59 Tuachi`n ama'un a denna ding suang ala ua, hinanleh Jesu akibu a, biak-inn nusia in a pai kheta hi.
Jesu thu gente leh Judate pu-le-pa daante, tawndaante a kituaklouh ziak in Jesu thah sawm uh hi. Hilezong Jesu kibumang hi. Tualaitak hileh pen, Jesu zong minse mahmah diing hi. FB leh WhatsApp ah, a thu gen a dingkip loupe, mi meipuahpa, mi zuaupa chihte in kidem diing in ka gingta hi. Amah demna a press release bawl pawl zong ki-om maithei diing ahi.
Tuni a a nung i zuihpa uh Jesu bawn ama mite'n hibang a a bawl tazen uh leh, nang leh kei zong, Jesu nungzui taktak i hih leh, i thuak diing uh ahi.
Ni danglai a Jesu demte pen beh-le-phung a ama beh-le-phungte mah ahi.
Ni danglai a Jesu thatte zong ama mite leh beh-le-phungte mah ahi.
Ni danglai a Jesu siatna diing a vaaihawmte zong, Jesu a diing a a mite leh a beh-le-phungte, sahkhua a kibakpihte ahi.
A nung i zuihpa un bawn, hibangteng a na thuak leh, eite'n zong i thuak diing ua kilawm mawng ahi. Thuaknate, minsiatnate omlou in Jesu nungzuihna bukim chihbang omtheilou hi.
TOUPA'N THUPHA HUNG PETA HEN
KHALVONTAWI
VOICE OF THANGKHAL
.JPG)
No comments:
Post a Comment
Comments not related to the topic will be removed immediately.