Leitung Nattun Covid-19 leh Pasian Sapna (Bible, Lev. 26)

Leitung Nattun Covid-19 leh Pasian Sapna (Bible, Lev. 26)

By: Pastor Thangdoulal

Khrist a it leh ngaih, Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak innmun pan in Happy Advance Palm Sunday chibai ka hung buk hi.

Covid-19 in leitung pumpi a buaisak daante, lungdongtak a a omsak daante, leh leitung in Covid-19 douna diing leh a thah beina diing daan a theihzawhlouh hih Covid-19 sil bawltheina in eite zong hung khawi tuamlou in a hung lungdongsak a, kholai vaaktheilou, ut bangbang a omtheilou in a hung omsak a, tualeh vanhman zong khangsak ahihman in i dangka neihsunte uh hung neektumsak hi, kichi leh zong a dikthei diing khop ahita hi. Tuaziak in hih a nuai a thute ngaihsun thak ni.

1. Leitung Nattun Covid-19 Tungtawn a Pasian Sapna.

Leitung buaina Covid-19 pen LST gen bang in, Pasian thangpaihna ahi diai-leh? Hi diing hi. Aziak pen Pasian in, 'Ka thupiakte, Ka thusehte, Ka biakna daante, Ka thukhunte kimtak a na zuihkei uh leh, ke'n zong na tung uah hibang in ka bawl diing hi: na hinna uh netum leh na mit uh sesak diing in, thakhat a dipkuatna, kum zawnna, leh nattun ka tungsak diing hi. Na khaichii tuhte uh a mawkna a suak diing a, na gaalte un a ne mang diing uh hi,' a chi hi. (Lev. 26:14-16). Hih leitung nattun Covid-19 a kipan a Pasian lam a i kihei mengmeng kei uh leh, hih nattun saang a huai-sezaw in hung na ngak-lai maithei diing ahi. Pasian lam ah kilehta ni. 

Sapna Khatna: Dangkate Saang a Amah Ngaisangzaw Diing a Sapna.

"Kuama'n pu-nih nna a sem khawm thei kei ding hi; aziak khat mudah in khat a it ding hi; Pasian nna leh dangka nna na sem khawm thei kei ding uhi." (Matt. 6:24). 1Tim. 6:5. …. "Pasian ngaihsak punna a ngai mite… a pat kihemkhia in. (V.10)…. "dangka ngaihnatna pen gilou chinteng bulpi ahi," a na chi hi. Dangka tawhlou a leitung a kihingthei lou, ki-khawsa theilou ahihman in, eite lak a mi tampite'n dangka a deih in i deihthoh gawpta ua, Jesu'n… "Mihing tanghou bek in a hingkei," a chih pen thei napi theilou i kisuah zeel uh hi. Leitung a dangka a omlouh hunlai in zong, mihingte a na hing veve uh hi. Mi masa Adamte innkuan in dangka (sum-le-paai) zang pailou ua, hilezong kilawmtak in hinkhua zangthei uh hi. Dangka or sum pen i poimawh ua, hilezong Pasian saang a poimawh zawlou ahihman in Sum-le-paai i lawhna uah gin-om ni. Nna sem a kuanlou a nitha a mu om ngailou hi. Hilezong eite lak ah Office kai ngai khollou a khaloh la om hilei kilawm hi. Govt. school pu a pang a school kai ngailou, khaloh laak diing lah mangngilh lou chihbang zong omta hile hang kilawm mawk hi. Hihte pen mihing or Govt. kheemna ahikei a, Pasian kheemna ahihziak in, Pasian in bangkim saang a Amah ngaisaang zaw diing in nang leh kei, Covid-19 tungtawn in hung sam hi. Sanggam aw, na lunghei inla, Pasian beel zaw in. Aziak pen, Leitung leh a sung a om zousiah in bei hun a nei diing a, hilezong Pasian pen taangtawn in a om tawntung diing hi. (Bible, Rev. 21 na sung a na sim in).

Sapna Nihna: Vaihawmna Dik Nei Diing a Sapna.

Innsung leh Saptuam sung a i vaihawmnate uh a dik taktak na hiam? Chih zong a theihhak thu khat hita hi. Ei-eima innsung chiat a kheem theih-theih kikheem a, thuguk lungsim dim zeen a pua chihbang zong ki-omthei daan hileh kilawmta hi. I khankhiatna masa uh innsung ahi a, tuachiang in saptuam sung ahi. Innsung a i kivaihawmna uh a dik leh, Saptuam sung a i kivaihawmnate uh zong a dik diing a, tualeh innsung a kipan a Saptuam tungtawn a khanglian ta-le-naute'n zong, a nna senate uh leh a omna munte uah diktak in a omthei diing ua, Pasian maipha a ngah diing uh hi. Tuaziak in bangkim chiamteh Toupa Pasian mitmuh a diktak a vaihawm mi-nu or mi-pa khat hita diing in Pasian in hung sam hi. Aziak pen, dikloutak a vaihawmna pen Pasian douna ahi. (Bible, Deut. 1:17; Matt. 7:2; Ps. 75:7, nate a na sim in).

Sapna Thumna: Amah Muang Diing a Sapna

"Khenkhatte'n sakol lengkaite a muang ua, khenkhatte'n sakolte a (kumpite thahaatna) muang uh hi. Hilezong en vang i Toupa leh i Pasian uh i muang diing uh ahi." (Ps.20:7) Bible a i muh mahbang un, Pasian muan diing saang in, sil dangte muan diing baihlam zaw hi. Tutung a i leitung nattun uh Covid-19 launa in leitung luahdim a, munchih-gamchih ah lockdown, social distancing, chihte om hi. Ahihleh leitung sil zousiah saang a Pasian muang zaw diing a kithuhilh eite bang chibang in i omta ua le? Pasian muangte'n Pasian thu niallou hi. Pasian muangte'n Pasian thute zui uh hi. LST, Jakob 2:14-26 sung i sim leh, ginna pen sepna panglou in a si ahi, chih i mu uh hi. Hih ginna pen muanna genna ahi. Levitikas bung 26na dungzui in, tulaitak in Pasian in eite nattun tawh Amah muang a, Amah beel diing in hung sam a, i lunghei kei uhleh, i thuak diing uh tampi omlai hi. Tuaziak in lunghei a, a hindaan lui uh, i na omdaante uh nusia a, Pasian beel a Amah bek a i muanna uh nga diing in, Covid-19 tungtawn in i kichial zaw uh hi.

LST, Lev. 26:15-16, 

ka thusehte leh ka biakna daante deihlou a na om ua, ka thupiak zousiah leh ka thukhun na suksiat uleh, ke'n zong na tung uah hibang in ka bawl diing hi: na hinna uh netum leh na mit uh sesak diing in, thakhat a dipkuatna, kum zawnna, leh nattun ka tungsak diing hi. Na khaichii tuhte uh a mawkna a suak diing a, na gaalte un a ne mang diing uh hi.

PASIAN THUPINA MITE KIANG A PUAKTHEI DIING IN TOUPA'N THUPHA HUNG PIATA HEN.

KHALVONTAWI

VOICE OF THANGKHAL

Share: