KHRIST SIHNA TUNG A A MAWH KUA E?

KHRIST SIHNA TUNG A A MAWH KUA E? Juda Iskariot? Pilat?? Siampute?? Mipite maw?? Rome gaalkaapte?? Farisaite??

By: Pastor Thangdoulal, THANGKHAL Bible Translator

Bible; "Gen. 50:20: Ka siatna diing bawlsawm nanle-uh chin zong, Pasian in tuni mah bang a, mi tampite hinna hutdamna diing in, a hoih lam in a zang hi."

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in, i Toupa'n eite a diing a a thuaknate theizing kawm in Good Friday chibai ka hung buk hi.

Jesu Khrist kithahna tung a a mawh kua e? or Jesu kua thah e? Chih tuni a i thu ngaihsut diing ahihna uah, khenkhatte'n Farisaite ahi a chi ua, khenkhatte'n Judah Iskariot ahi a chi ua, khenkhatte'n biak-innpi siampute ahi a chi ua, khenkhatte'n lah Pilat ahi a chi ua, khenkhatte'n Roman gaalkaapte ahi a chi ua, kua pen mawhtan diing ahia? Chihte i lungsim uah om hi. Bangteng hitalezong, Nang kua pen mawh na sa a? chih pen kei simtute k'ung dokna hileh ka chi ahi.

I. JESU KITHAHNA TUNG A MAWHTAN THEIHTE.

1. Juda Iskariot:

 Bible; "Matt. 26: 14 Tuanung in sawmlehnihte lak a khat Juda Iskariot achih uh siampute kiang ah avapai a 15 akiang uah, "Amah na kiang uah hung pekhe leng nou kei bang nung pe ding uai?" avachi a, amau`n dangka sawmthum piak a chiam uhi. 16 Hua hun akipan in Amah matsak na ding lemtang a zongta hi."

Juda Iskariot pen Jesu a diing a a gaalpa hilou a, ki-meelmaakna zong bangmah neilou uh hi. Jesu nung gin-omtak in a zui a, tualeh nungzuite lak a zong mi kizangthei mahmah khat hi diing ahi a, dangka keem in kizang hi, chiin a taangthu kisuut hi. Hilezong amah pen a kizak-theihna lam ah a puuksia a, a nung a zuihpa, a lamkaipa dangka sawmthum in zuak hi. Tuaziak a Jesu kithahna ah, amah mawhtan theih ahi i chi uh hi.

Juda Iskariot bang a Jesu nungzui na hi hiam? Hi. Khristian zousiah Jesu nungzuite i hi uh hi. Juda Iskariot bang a pawlpi a mi kizangthei mahmah khat na hiam? Khenkhat a kizangthei mahmah ua, hilezong i unpi ua, Jesu a diing a mi poimawhte i hi uh hi. Sepna bawlna a gin-omlou a Jesu a diing a gin-om na hi hiam? Hih pen dawnna haksa khat ahi. Aziak pen Khristiante lak a Khrist deihna bang a vaihawmna muh diing tamlou hi. Tuate lak ah, Saptuam member diing kituhna i gam uah a saangta a, Jesu thupitak a tawisaanna diing chi a, Biak lian or thupi lamkhiat diing kidemna zong a saangta a, Saptuam sung ah zong Pastor saang a thu-neizaw kitamta hileh kilawm hi. Saptuam pen Pasian a ahi a, Pasian in a thu a nna sem diing a a she Pastorte zahtaatna i gam uah a liankei hi. Tuaziak in i ki-ngaihsut diing ua, Juda Iskariot bang a Jesu nungzui mi khat hilou diing in i kichial uh hi.  

2. Biak-Innpi Siampute:

 Bible; Matt. 26:15… "Amau`n dangka sawmthum piak a chiam uhi." Bangziak a hih Siampute'n dangka sawmthum tawh Jesu matsak a sawm uh e? Mosi daan tawh kituaklou in a gamta hi, chi a ama'uh theihna leh mipite a pan a heekna a zaakte uh ziak in matsak diing bekbek a lunggulh uh hi. Siampute ngawhna leh Farisaite ngawhna zong a kibang ahi. Mosi daan zuilou, bawl louhlouh diing bawl, khawlni tang siangthou lou, an ngawl a thu ngenlou, Pasian tapa bang a kibawl gige, hihpa mawngmawng a sih dok kei leh i gam un tawndaan diklou i zuihlawh diing uh ahi, chih thute ziak in Siampute leh Judate ki-ukna sung a lamkai pawlkhatte'n muhdah chihtak in a hua uh hi. Tuaziak in hih Siampute leh lamkai pawlkhatte pen, Jesu Khrist kithahna ah mawhtan theih ahi uh, i chi ut uh hi.

Siampute leh Lamkaite'n Jesu a muhdahna ziak uh ahihleh, a theihsiam louhna ziak uh ahi. Ama'uhte mah bang in ei Khristiante'n zong, i Pasian tawh kisai a i theihnate uh a kichinlouh ziak in dik bang a kilang mawhna tampi i bawl uh hi. Hih dik bang a kilang mawhna i bawlte un, eite leh Biak-innpi Siampute a hung kibangsak hi. Lunghei in Toupa lam ah kileh thak ni. 

3. Pilat leh Roman Gaalkaapte:

 Bible; "Matt. 27: 22 Pilat in akiang uah, "Ahihleh Jesu Khrist kichi bang kalawh diai?" achi a, aun un akiang ah, "Cross ah kilhden in om hen!" achi uhi. 23 "Bangding inla? Aman bang bawlkhial anei a?" achi hi. Amau`n, "Cross ah kilhden in om hen!" chi-in ngaihjaw sem in akikou uhi. 24 Pilat in a lawh ngaihna a theikei a, buaina semsem hiding ahi chih amuhtak in, tui ala a, mipi mai a akhut sil in, "Hih midik sisan a kipan ka siang hi! Nou na lawhlawh kilawh un!" achi hi. 25 Tuachi`n mipi zousiah in adawng ua, "A sisan phuba kou leh ka tate uh tung ah om hen!" achi uhi. 26 Tuakhit in aman Barabba akiang uah a khahkhia a, tualeh Jesu ajepzoh in cross a khailup dingin a pekhia hi."

Beginner zillai dokna leh dawnna ah, "Pilat in mipite mai a a khut a sil ziak in a siang diam?" Chih dokna dawnna pen, "Ih, a siangkei diing hi," chih ahi. Pilat in Jesu mipite khut ah, a lawh-lawh uh a lawh diing un  a pia a, tuachiin Roman gaalkaapte'n singlamteh ah a khailum uh hi. Tuaziak in Pilat leh Roman gaalkaapte pen, Jesu kithahna ah mawhtan theih in a om uh hi, chi in i gen nuam uh hi. Hilezong Roman gaalkaapte pen Jesu thei ngai ahikei ua, Jesu nungzui a pang-ngaite zong ahikei uh hi. Tuaziak in ama'un kumpi daan zuilou chi a, a thah uh ahih lezong ahithei khat ahi. 

4. Mipite Ahi:

 Bible; "Matt. 27: 22 Pilat in akiang uah, 'Ahihleh Jesu Khrist kichi bang kalawh diai' achi a, aun un akiang ah, 'Cross ah kilhden in om hen!' achi uhi. 23 'Bangding inla? Aman bang bawlkhial anei a?' achi hi. Amau`n, 'Cross ah kilhden in om hen! chi-in ngaihjaw sem in akikou uhi. 25 Tuachi`n mipi zousiah in adawng ua, 'A sisan phuba kou leh ka tate uh tung ah om hen!' achi uhi.

Singlamteh a khailup hi hen chi a kikou mipite kuate e? Hih mipite ahihleh "Special Days" kichi laibu in a gendaan in, Hosana chi a kikoute ahi a chi hi. Ke'n zong a dik diing in ka gingta hi. Tuaziak in Jesu kithahna tung ah, hih mipite mawhtan theih in a om uh i chi ut uh hi. 

II. KHRIST SIHNA TAWH KISAI A THU DIK

Deut. 32:39, "39 Tu'n en in, Kei, kei bek, leh kei mah kahi; Kei lou Pasian dang a omkei hi. Ka that a, ka hingsak kiik hi; Ka liamsak a, ka damsak kiik hi; Ka khutsung a kipan a noute hung tuh thei diing kuamah a omkei hi. Is. 41:4; 1Sam. 2:6 Toupa'n a that a, a hingsak kiik hi; Haankhuuk ah a zawhpih suk a, a kaithou kiik hi. Job. 5:18, Aman lah meima a bawl a, a tuam a: a liamsak a, a khut in a damask hi (Paite Version). Is. 30:26; Hosea. 6:1, Hong un, Toupa kiang ah i kik ding uh; aman a hon botkekta a, a hon damask ding ziak in, a hon sat a, a hon tuam ding hi. 2 Ni nih nung in aman a hon hihhalh ding; nit hum ni'n a hon kaithou ding a, a ma ah i hing ding uhi (Paite Versian). John. 10: 17 Ka lâk kîk theihna ding a ka hinna ka luikhiat ziak in, Pa'n kei a hung it hi. 18 Kei a pat kuaman ahung laksak kei a, hinanleh ka thu in ka pekhe zaw hi. Piak theihna leh lakkik theihna thuneihna ka nei hi. Hih thupiak ka Pa a pat ka muta hi, achi hi (TK N.T).  Nas. 2:32 Hih Jesu, Pasian in a kaithou a, tualeh koute tengteng hih thudik theihpihtute kahi uhi."

"Ka laak kiiktheihna diing a ka hinna ka luikhiat ziak in, Pa'n kei a hung it hi. Kei a pat kuaman a hung laasak kei a, hinanleh ka thu in ka pekhe zaw hi. Piak theihna leh laakkiik theihna thuneihna ka nei hi. Hih thupiak ka Pa a pat ka muta hi," a chipa i Toupa Jesu ahi.

TOUPA'N THUPHA HUNG PIA HEN

KHALVONTAWI

VOICE OF THANGKHAL

Share: