KHRIST GIM I NAM UH HIAM? By: Pastor Thangdoulal Thangkhal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

I leitung khankhuate uh i et leh, Khrist gimnam leh eite gimnam kibanglou hileh kilawm mahmahta hi. Jesu Khrist gimnam leh i innsungte ua gimnam zaak a omte zong kibanglou mahmahta hileh kilawm hi.

A taangpi in leitung ah a gimnam uh kibangloute kipawlthei lou or kigopthei ua, le-nuai uih or Zak-kha gimnam a neite, a neiloute'n namsiasa ua, a kiang nai ua om diing zong kikeem uh hi. Zu (Wine) gimnamte zong a namloute a diing in namsia hi.  Za-khu (Smoke) zong a zateep loute a diing in namsia hi. Tuaziak in eima gimnam, i innsung gimnam, leh Khrist gimnamnate kituaksak sawm in panla thak ni hang in, Pasian leh innsung mite, khawsung mite, saptuam mite a diing a mi manpha leh mantam hi sawm chiat diing in i ki-chial masa uh hi. Tuni a i kikup diing uh GIMNAM tawh kisai hih a nuai a bang ahi.

BIBLE: 2Kor. 2: 15… "Hundam a omte leh mangthangte lak ah Pasian a ding in Khrist gimnamtui ka hi uhi."

1. I INNSUNGTE UAH BANG GIMNAM A KIZAA A?

Mi khat theihchianna diing in a gimnam poimawh mahmah hi chih pen mi zousiah in i theihsa uh zong ahita maithei diing hi. Pa khenkhatte innsung pen, Kha gimnam lou in Zu gim namzaw hi. Khristian innsung pen Kha gim a nam tawntung diing hi a, hilezong Kha gim a nam diing zong a phallou hileh kilawm PA hawnkhat om hileh kilawmtak bang in, tate kikhop diing khaam (phallou), tate a kikhop uh leh zong housiatna a zangh PA tuni dong in eite lak ah om hi. Pastorpa hiam Upapa hiam in a thu a manlouh ziak a Saptuam kheek sawm zong PA khenkhat omta hileh kilawm hi. 

*Innsung khat pouhpoiuh ah Khrist a hutdamna tanghsa leh Hutdamna tanghlou (Mangthangte) om hi.* Innsung a mawhpuakna piak a om masa pen PA ahi a, a huh diing in NU ahi. Tate pen, a thuman diing uh a mawhpuakna uh hi masa phot hi. Innsung gimnam zong Pasian a tawh a kituakna diing a mawhpuakna piak a awm masa pen innsung papen ahi a, hih Khrist gim i innsungte ua a nam zawh taktakna diing a PA panlakna a a huh diing NU pen ahi.

Eite innsung gimnam pen Pasian a tawh kilehbulh in, Za-khu gimnam a, Zu gimnam a, Khaini gim nam a, Sajan gim nam a, Tuibuuk gim nam a, Shikhar or talab gim nam hi. Tuaziak in i innsuannate uah Pasian in pan A hung laakpih diing zong lemtheilou hileh kilawmta hi.

I Innsung gimnamte uh leh Pasian gimnam or Khrist gimnam kigamlata ahikha diing a, i innsungte uah kilemna om nawnlou, kituakna omthei nawnlou, ngaihdaan kibangthei nawnlou, ki-innkhenna leh khasiatna in i gam uh luah dimta hi. Tuaziak in Pasian lam ah kihei ni hang in i innsung gimnam uh leh Khrist gimnam a kituakna diing in PATE, NUTE, TATE aw, pan lathak ni, chi in Jesu min in k'ung ngen hi.

2. EIMA GIMNAM LEH KHRIST GIMNAM

Eite khat leh khat ki-nam lehang bang gim i nam diing uai maw??? Leitung chi-le-sa tawh Jesu leitung a a hung om hunlai in, a gil kialthei, dangtaak-thei, duh-le-ngaih neithei hi. Hilezong Ama'n a damtheihna thamkha-thei diing in zu-le-sate nelou a, teep-le-muamte zong thamlou hi. *Nang leh kei mah bang a Jesu'n a leitung hinkhua a zaklai in, Pasian gimnam tawh Jesu kithuam hi. Tu in nang leh kei Jesu gimnam tawh i kithuam-thei diam?* Eite pen, i gimnam mahmah uh zong Khrist gimnam hilou hi diing ahihziak a diam, i innten-louteennate uh kisia hi. Siat chihtak in segawp hi. Hibang siatnate khasiatpih in mittui tampi i seenlawh zawmah uh hi. Innsung Pa pem gimnam leh Khrist gimnam a kituak keileh innsung a sesa ahi a, Nu pen gimnam leh Khrist gimnam a kituak keileh zong, innsuanna pen a puuksa tawh kibang ahi a, tate hinkhua zong eite khasiatna diing bep hilai diing hi. Tate gimnam leh Khrist gimnam a kituak keileh ama'uh a diing in lawhchinna taktak omthei lou hi.

I gimnamte uh leh Khrist gimnam kituaksak diing in Jesu min in k'ung ngen hi.

TOUPA'N THUPHA HUNG PETA HEN

KHALVONTAWI

VOICE OF THANGKHAL

Share: