Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.
Na khamkhop or khamching diing itna a omna mun na thei taktak hiam? Hih khamching itna pen Innkuan tamtakte buaina ahih a, hibang itna khamching lunggulh mahmah napi a a neihlouh ziak un, Innkuan kikhenna, kihuatna, kikawmlouhna leh kikhasiatsuahna tun hi.
Leitung ah nute itna saang a lianzaw omkei chi in mi tamtak in gen thupi in a nei uh hi. Hilezong hih nute itna pen, sihpih ngam itna hilou ahihman in nu tamtakte'n, a vaangsiatni chiang un a tate uh nusia uh hi.
I gam uah teek (Teekpi) nuaktaai kichi tulai in tam mahmah a, Mou nuaktaai saang in teek nuaktaai tam mahmahta hi. Hih nuaktaai thu i genna ziak uh ahihleh, nute itna muantaak ahihlouh daan kilatna diing a i gen uh ahi. Pate itna zong khamching diing itna tate'n kimulou hileh kilawm hi.
Na nu, na pa itna khamlou in na lungleeng hiam? Na naute, na ute itna khamlou in na khasia hiam? Na zi, na pasal itna khamlou in na lungzuang hiam? Khamching itna zong in na bahta hiam? Laate 42:1… "sakhital in luitui luang a lunggulh bang in,…" chi a a genbang in, na innsung mite itna lunggulh in na omkha hiam? Na khamkhop itna na muta hiam?
Leitung ah a mi hoih deuh, a mi kichithei deuh, leh a thumang deuhte pawl in, a hoih sung un a kham diing uh itna mukha mah unteh, hilezong hoihlouh ni a diing itna khamching pen, muh hak mahmah hi.
Leitung a itna thupi pen a kigen Nute Itna ahi a, hilezong nute itna pen sihpih ngam itna hilou ahihman in, a pasalte uh miitmawhna, numei dang ngai or aangkawm chihbang ahih chiang in a tate uh nusia a, a pasal uh taaisan ngam uh ahihman un, sihpih ngam itna pen nute kiang ah zong omlou hi. A pasal leh a tate a diing a a hinna pumpi a pia nute ahi, i chihchih uh zong pen nna leh silte a hoih sung bek ahi. Tuaziak in khamching itna bang chi muh diing i hi ua?
Nu-le-pate aw, tate itna khamlou kisa a khasia na hi hiam? Khamching itna a omna mun khat om hi. Limtak in ki-ngaihsun ni, leitung mi zousiah in i khamkhop diing uh itna a omna mu nom ahi.
Khamching Itna Pasian Kiang Bek Ah Om Hi
John. 15:13, "Mi`n a lawmte ding a ahinna apiak sang a lian zaw itna kua-man anei kei hi." John. 3:16,… "Pasian in leitung a it mahmah a, tuachi`n a Tapa tang neihsun apia hi,…" Eph. 5:2, Khrist in ahung it a, ei a ding a Pasian kiang a silpiak leh, kithoihna namtui ding in a kipia,…" chih Bible taangte a dang tampite a kipan a i theihchet uh bang hiam, i chih leh, Pasian in ei a diing in sih ngamna itna a nei a, tuachiin eite a hung it mahmah ziak in singlamteh tung ah, i mawhnate pua in, ei sihna diing mun ah Amah a hung si hi. Hih sih ngamna itna pen leitung mihingte lak ah omlou hi.
Pasian kiang a om itna pen, leitung mite a diing in khamching mahmah ahihman in, i khamkhop diing uh itna, leitung mihingte (na innkuante, nab eh-le-phungte, na sanggamte, na nu, na pa, na tate), lak ah zongkei ni hang in, Pasian kiang ah pai zaw ni. Pasian lam zuan ni. Amah itna kipatna ahi a, a tawpna zong Amah hi diing hi. Khasiatna diing bep in, itna khamching leitung ah zong dah ni in Pasian beel ni.
I hoihlai a hung it diing a tam mahmah hang, i hoihlouh hun chiang a hung itna mi tawm mahmahthei hi. Eite kipatna Pasian ahi chih na pom leh, i tawpna diing zong Pasian mah ahi diing hi, chih na pom ngai a, hih Pasian na pom leh Amah beel inla, Pasian kibeelsak seengseeng a mi dangte dem, a hoihna diing uh thei napi a bawllou, a siatna diing uh thei napi a hoilhlou chihte pen Dawimangpa meelpuakna ahi. Tuaziak in Pasian, itna bukimtak omna ahihziak in Amah ah kipumpiak ni, chi in Jesu min in i ki-ngen uh hi.
TOUPA'N THUPHA HUNG PIA HEN
KHALVONTAWI
VOICE OF THANGKHAL
.JPG)
No comments:
Post a Comment
Comments not related to the topic will be removed immediately.