KHAMLOUH ITNA (Series 1) By: Pastor Thangdoulal Thangkhal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

BIBLE: Rom. 5:8… "Pasian in eite a hung itna hibang in ahung sulang hi. Eite mikhial i hihlai un, Khrist eite a diing in a hung si hi."

Itna kichi pen a gendaan tuamtuam tampi omthei a, a khiil-khiil a zong klhentheih diing in omthei hi. LST sung ah, a suuttham ching itna chi li om a, tualeh a behlapna diing tampi om behlai diing in ka gingta hi. Eite hih itna chih thumal tawh a ki-hingkheemte i hi uh hi. Itna pen a taktak ahi a, a diktak itna ahi hi. Hilezong eima hamphatna diing a mite kheemna a zangh pawl, eima aangsung khualna a zangh pawl ki-omthei hileh kilawm mahmah hi.

Na nu-le-pa itna na kham hiam? Na sanmggamte itna khamching nasa hiam? Na innkuante hung itna na kham taktak na hiam? Na zi hung itna na kham na hiam? Na pasal hung itna na kham na hiam? Na tate hung itna kham ching nasa hiam? Sanggam aw, hih a tung a doknate limtak in ngaihsun in, 'Hi, hi, hi' chi a, hi vive tawh a dawngthei diing mi kitamlou diing hi. 

Lei tung ah a hoihlou a kikhamthei sil hawnkhat a om a, tuate ahihleh, 'Zu, Za (zateep), Tuibuuk, Khaini, Sajan, Shikhar, Talab, Wy, No.4, Kani, leh a dang tampite a omlai hi. A hoihlam a kikhamtheite ahihleh; an (an pen i gilvah chiang in khamta kichi hi). Meh (meh zong a kibang vive meh-meh leteh kham hun omthei hi), leh a dangdangte ahi. Hilezong leitung mi zousiah in a kikhamtheilouh uh sil khat ahihleh ITNA ahi. Hih itna na khamkhop khoi ah na mu a? Hih a tung a thute lungsim a nei kawm in Khamlouh Itna tawh kisai hih a nuai a bang in i kikum diing uh hi.

1. NA NU-LE-PATE  ITNA, NA TATE ITNA NA KHAM  HIAM?

Leitung ah i nu-le-pate itna liim beelthei i hihman un, i nu-le-pate uh pen leitung ah i muan penpente ahi uh hi. Zawng phiiupheeu in omta le-uh zong nu-le-pate mah kimuang a, zong ki-ngai hi. Hitalezong unau tam-le-li i hih chiang in, a kamsiam deuh, a gendaan thei deuh, a gumtat deuh, a kamtawm deuh, a gual phalou deuh, chihbang ki-omthei ahihna ah, nu-le-pate'n zong tate lak ah, muan deuh bang a nei ua, huamtuam deuh chihte bang a theihlouh kaal un a na neikha zeel mawk uh hi. Evan. Thang Lam Mung in a thu genna ah hibang in chi hi;

"Nu-le-pate'n tate a itna un deidan nei hi," chi hi. A taktak zong a hikha diing hi. Aziak pen nu-le-pa pawlkhat pen, a tate uh a deih uh a baklouh chiang in taaisan uh hi. A tate uh tung a a lungtun zawhlouh uh hun chiang a a tate uh a nuse ngam nu-le-pa tamtak i gam uah omta hi. Numei pawlkhat pen, a pasalte uh a deih uh banglou ahihman in a pasal uh nusia ua, a pasal nusia in a ki-ngaihsut uh hi. Hilezong a taktak a chih in, a pasal bek a nuse kei a, a tate zong nusia hi. Nu-le-pate aw, tate khamkhop, or kham ching diing itna na nei taktak uh hiam? Tate aw, na nu-le-pate uh itna na kham taktak uh hiam? Ngaihsun in, na hinna na luplawh dong a, na tate na itna muh diing a om hiam? Na hinna na suplawh dong a, na nu-le-pate na itna muh diing a om hiam? Omlou maithei ahi. Leitung mihingte lak ah itna a bukim kei a, Pasian aangsung ah bukim hi. Pasian aangsung beel meng ni. Rom. 5:8… "Pasian in eite a hung itna hibang in ahung sulang hi. Eite mikhial i hihlai un, Khrist eite a diing in a hung si hi." 

2. NA  LAWM  ITNA  NA  KHAM  HIAM?

Hun khatlai in sa beng pasal nih gamlak ah a pai ua, "Lawm aw, sahang i tuahkhaak leh ki-hun ni aw," kichi uh hi. Tuabang a a pailai un, vompi khat tawh kituakkha uh hi. Tualaitak a tua Vompi'n a bawh leh, khatpa pen taai a, singkung khat ah kahtou in, a lawmpa tawh vompi kibuan ensuk ziauzuai hi. Tualeh Vompi'n a buanpa pen zong a sikhem a kineih leh tua Vompi'n sita e chi in nusia hi. Tuachiang in singkung ah tuangpa hung kumsuk a, a lawmpa kiang ah, "Lawm aw, Vompi'n a hung nam huau-huau a, bang hung chi ahia?" chi in dong hi. A lawmpa'n zong, "Gen khat neimah e, 'Haksat hun chiang a hung taaisante lawmtak hilou hi,' a hung chi hi," chi in dawng hi. Leitung ah lawmta ki-itna zong, kitaaisanthei a, nu-le-pa itna in zong deidanna neithei hi. 

Bible, Pau. 18:24  "Lawm pawlkhatte lawm hoih bang in a kibawl ua, hilezong sanggam sang a kinaihpih zawk lawm taktak khat a om hi." Jn. 15:13 "Mi`n a lawmte ding a ahinna apiak sang a lian zaw itna kua-man anei kei hi. 14 K'ung thupiak zousiah na zuih uleh, ka lawmte na hi ding uhi. 15 Sila in a pu nasep a thei louh ziak in sila k'ung chi-nawn kei ding a, lawm k'ung chi zaw ta ding hi. Aziak pen, ka Pa kiang a kazak zousiah nou k'ung hilhta hi," chi ahihman in, Jesu Khrist lam ah kileh thak ni. Eite a diing a i lawmthak uh Jesu ahi. Ama'n eite A hinna phal in hung it hi. 

Itna kichi leitung mi zousiah in a lungdampih leh a khasiatpih uh ahi a, a lungdampih chiang un zong a hun in sawt daihlouh hi. Tuaziak in Jesu Khrist lam ah kileh ni, chi in Jesu min in i ki-ngen zaw uh hi.

TOUPA'N THUPHA HUNG PIA HEN...

KHALVONTAWI

VOICE OF THANGKHAL

Share: