KA INNKUANTE MUHDAHPA HITANGH! By: Pastor Thangdoulal Thangkhal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

Ni danglai in pasal naupang, hung tangvaaltou diing a kisa panpan kum sawm-le-sagih mi khat a om a, a sanggam pasalte lak ah, a tunpenpa tung a ahi, Amah pen Pasian it leh ngaina mahmah mi khat zong ahi hi. A pa zong Pasian hing bia, tu a eite Pasian mah Pasian a nei leh bia ahi hi. Hih khangdawngpa in a pa Pasian a bia a, gin-omna, chihtakna, diktatna, leh itna tawh a Pasian a diing leh a innkuante a diing in nnate a sem a, tuachiin Pasian deihsakna hung tangh hi. Hibang a Pasian deihsakna mu a a kilat chiang in, a Innsung mite muhdah in om a, a ute mahmah a kipan in zong, thangsiatna ziak a huatna leh muhdahna ngah hi. Tuachiin sanggamte gawtna innlam leh lou-lam ah a thuak a, hilezong a Pasian minsuang in hih gawtnate thuakzou hi.

Hih khangdawngpa lungsim ah, 'Ka Innkuante Muhdahpa Hitangh,' chihlouh bangmah zong omthei kei leh kilawmtak in, tuamkoihna, ningkhiinna, deihsak louhnate a sanggamte a kipan in nisial in thuak hi. Hilezong a neih Pasian, bangkim bawlthei Pa in a sanggamte gawtnate thuakpih in amah milian-milal in bawl a, a kiang ah a sanggamte khutdawh in kuunsak hi. Hih khangdawngpa'n Pasian a belh tetaw daante leh Pasian in hih khangdawngpa milian-milal a suah daante pen, leitung a sil tung diing a a lamdang ahi bek hilou a, a gintaat-huailou mahmahte lak a a khatna ahi. Tuaziak in hih khangdawngpa thuakna leh Pasian nna septe hih a nuai a bang in i ensuk diing uh hi. 

1. SANGGAMTE MUHDAHNA

Hih khangdawngpa muhdah a om a kipatna bulpi ahihleh, MANGH (dreams) ahi. Ama'n mangh a nei a, a mangh a sanggamte kiang a a gen leh, a sanggamte'n amah muhdah lawh uh hi. Ahihleh, sanggamte tawh kituak-kilem louhna diing bep a, bangdiing a mangh a neih or a mat e? A sanggamte tawh kilemlouhna diing ahihleh a manghmat pen tawpsan henla, mangngilh leh hilou maw? Innsung mi, u-le-nau tawh kilemlou a Pasian bangchibiak diing? Chihte'n i lungsim uh a khoihkhaak diing gingta hi. Joseph in a sanggamte tung ah siatna bangmah a bawlkei a, a tung a a thangpaihna diing uh zong bangmah a bawlkei a, hilezong a sanggamte'n a bawlzaw uh hi. Pasian bia hi chiatchiat lehang zong kituak lou, kilemloutak a omtheih ahi. 

LST, 'Pau. 18:19, Sanggam kihehsuah lungdam kiikna diing pen, khopi khat lak diing saang in a haksa zaw a, hibang kiseelna pen kulhpi konggolh siikzawlte bang ahi.' Na chi ahihman in lemna zon diing saang in Pasian mah belh diing baihlam zaw hi.

Joseph pen, a sanggamte'n muhdah mahmah uh ahihman in thah sawm ua, hinanleh a neih a Pasian in a sih diing phallou ahi diing a, kawkhuuk sung a khiat in om a, tua kawkhuuk sung pan in gamtuam ah, leitung khang sawm kileh lezong muhlouh diing chi-in a sanggamte mah in, tualai a bawng-le-loite, gantate zuak tawh kibang in zuak uh hi. I tung a siatna a tun diing pen Pasian deihna ahi kei a, hilezong i tung a hung tung siatnate a kipan in Pasian in ei a diing a hoihna a suaksak-theihna diing ngaihsut in panla hi. Joseph tung a siatna pen, a Pasian in zong puaknatpih ahihman in Joseph a diing a hoihna a tunsak-theihna diing lampi Pasian in ngaihsut a, zonsak hi.

2. THEIHLOUH INNSUNG LUNGLEEN

Innsung a kilehtheihna diing hamphatna omlou a, khualgam a kuate hiam innsung a om diing a zuak i hihlam uh kithei lehang i khitui uh bangzah a nuul diing uai? Lam tungtawn a kaplou diing kua i om diing ua? Nu-ngak pasal nei diing a khaak a omte bawn, ziing a kimu diing hinapi a kikah uh leh, damsung a nu-le-pa mu nawnlou diing, sanggamte tawh kimu nawnlou diing, ni-le-gangte, pi-le-pute innsak-innkhangte, leh a diak in lawm-le-gual, it leh ngaihte tawh kimuthei nawnlou diing a puakmang, or zuak a ompa lungsim ah bang a om diai? Ama'uhte hunlai in, Facebook, Whatsapp, leh a tuamtuamte zangh in kimuhthei inteh chihna diing zong omlou a, internet manphatna zong kithei nailou hi. Tuachiin gaalkaap buu khat inn ah Joseph a hung tungta hi. Hih innsung kivaipuakna a khau diing daan pen, khauh mahmah diing in ka gingta hi. Gaalkaapte hindaan leh omdaante pen, ngaihdamna tawmna ahi. Hih innsung, neek-le-taak kichinna, neih-le-lam kichinna, leh sum-le-paai kichinna ahihziak in nuam mahmah leh kilawm hi. Hilezong it-le-ngaih, lawm-le-gual tawh kikhenpa'n nuam a san a diam? Lungleeng lou in om in the na chi maw? Nuam zong saken chin, a lung zong leeng mah in the, hilezong Joseph in a mawhpuakna ngaikhawk mahmah a,  nna sepna zousiah ah Pasian nna a sem bang a ki-ngaihtuah in a theihtawp a suah a, lungleenna diing hun omlou khop in panla hi. Theihlouh Innsung lungleen pen, eite theihdaan ahi a, hilezong Joseph in hihte buaipih lou ahihman in Pasian in amah omna mun zousiah chiamteh hi. Eite zong i Pasian in i omna munte a hung theihpih diing poimawh mahmah ahihman in, Pasian a diing a i chihtakna, i gin-omna leh panlaaknate midangte tung ah zong tungsak ni.

3. JAIL (THONG) SUNG LUNG LEEN

Pasian in a hung tawisaang, lapsaang diing chiang in haksatna khang deuhdeuh hi. Kumpi innpi a thuneihna saang pen ngahsak nuamta ahihman in Pasian in Joseph thong (jail) ngaaksak masa hi. Joseph thong ngaakna ziak pen, a omna masa inn neinu, a pi in aamlah mahmah ahihman in luppih diing in zol a, a buangawp chiang in Joseph kitungkhia a, pusuak hi. Hibang ahihlaitak in, a pi in mualphou diing ahihlamtak a thei a, mualphou lehlah a pasal in a that hiam hiding ahihman in, a puante botkeek in na Juda mipa hung bawlna chi in lehheek hi. Hilezong Joseph in hih lehheekna, siik a satlai in saat in kichi ei, tupet a ka thuk mengmeng keileh, chilou hi. Hibang lehheeknate i tung ua tungmawh hilou hi, hilezong thuk sawm kei ni, Pasian in a chiamteh diing in Amah khut ah koihzaw ni. Tuachiin Joseph thong a khum in om hi. Thong sung ah Joseph in a nu, a pa, a sanggamte, a lawm-le-gualte, a it-le-ngaihte a mangngilh diam? Mangngilh lou diing hi. Ahihleh lungleengtak in a om diai? Leeng maithei in the maw? Thong sung a Joseph hinkhua bangchibang e? Thong sung, a tawng, ek-hum sung ah Joseph khum in a om a, (Gen. 40:15, "Ataktak in kei pen, Hebru mite gam a kipan a gukmang a om ka hi; tualeh hih thong a, ek-hum sung a a hung khumna diing un zong, bawlkhial bangmah ka nei kei hi," a chi hi.) Hih thong sung a khumpa'n a omna mun a sihpih diing chi a, a zi tung a a tatsiatna phuba laakna daan a ngaihsun a, a haksatna penpen a a khum ahi. Hilezong Joseph in bawlkhial a nei a, Pasian in zong a bawlkhial a omkei chih a theihpih a, tuachiin kumpi innpi a vaihawm a a panna diing lampi bawlsak hi. Na diktatna mi dangte theih diing saang in Pasian in a theih diing poimawh zaw ahihlam mangngilh kenla, diktattak in om in, Pasian in na dikna thei hi.

Laate 37:3 Toupa muang inla, nna hoih sem in; tuahileh gamsung a teeng in, lungmuangtak in na om diing hi. 4 Toupa tung ah kipaak in, tuachiin ama'n na lungtang deihlamte a hung pe diing hi. 5 Na lampi diing Toupa tung ah nga inla; amah muang in, ama'n a hung sem diing hi. 6 Ama'n na diktatna vaak bang in a taangsak diing a,na siamtanna sunlai nisa bang in a suaksak diing hi.

TOUPA'N THUPHA HUNG PETA HEN…….

KHALVONTAWI

VOICE OF THANGKHAL

Share: