JESU MIN A NA KIKHEELNA GEN DIING NA NEI HIAM? By: Pastor Thangdoulal

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

BIBLE: Nas. 2:8, "Bang chidan a i un ua i pianpih ham chiat ua i zak theih uh e?"

Jesu Khrist gingta a, Jesu nungzui diing a kipia a, Pa Pasian, Tapa Pasian, Kha Siangthou Pasian min a baptima tangte hinkhua pen, a taktak a chih in 'Kibungbukleh' hinkhua ahi.

Etsakna:

 

1. Sawltaak Paul: Paul in a hinkhua a Jesu Khrist a kituahpih masang in Jesu Khrist a hinna taangthupha gente leh a gingtate gawt a, Jesu Khrist a kituahpih khit in, amah-mah a gen pen leh a gingta pen in pang hi.

2. Sawltaak Matthew: Matthew pen sawlkal nna sem, siah khon a pang mi khat ahi. Jesu tawh a kituah ua kipan in a nna sep nusia a, Jesu nung zui hi.

3. Kei: Kei pen ni danglai a teep-le-muam zongsang mi khat ka hi a, a tomlam a gen in, khase baih, hehbaih, leh mi dangte theihsiamna neilou mi ka hi hi. Ni dang a ka zongsat nna leh silte Jesu min in ka tawpsan a, Ka hinna Jesu a diing a ka app dungzui in Jesu'n ka hinkhua awl-awl in a hung kheelsak a, hilezong bukimlou ka hihman in, Pasian a ka kisukdikna diingte a kisudik kawm-kawm in, Jesu min in pan ka la hi. 

India a gaalkaap diingte'n, India gaalkaap diing a kipiakna thuchiam (kosom) a neek bang un, Jesu a diing a kipete'n zong, kei pen Jesu a ka hita chih mi zousiah mai a latsakna diing in baptisma i tangh uh hi. Nang bang na chi a? Jesu tawh na kizopna (link na) mite mai a gen diing na nei hiam? Jesu'n na hinkhua ah panmun (part) a nei hiam? Jesu a na pianthak masang leh na pianthak nung hinkhua a kibaklouhna bangbang a om a? Na hinkhua pen Jesu a diing in na zangkha na hiam? Jesu nungzuite hinkhua pen, Jesu nungzui ahih masang ua tawh et in, kibungbuleh hinkhua suak hi. I theihsiam zawkna diing un hih a nuai a bang in i ensuk diing uh hi.

JESU NUNGZUITE KIKHEELNA

1. Nungzuihna pan a Sawltaak Hihna:

Gospel laibu lite i et leh, nungzuite pen nungzui taktak ahi ua, Jesu bawlte en in, a paina ah a zui uh hi. Hilezong nasepte laibu i et leh, gamtuam khat a om mahbang in a na kikheel hi. Nasepte laibu ah, Jesu nungzuite pen nungzuite ahi nawnkei ua, a mi kibang napi mithak hihna a neite uh hi.

A. Ama'uhte nungzui ahi nawnkei ua, Sawltaak ahita uh hi.

B. Ama'uhte Jesu thu gen ngaikhete ahi nawnkei ua, thu gente ahita uh hi.

C. Ama'uhte ni dang in, thu zilte, nungzuite ahi ua, tu'n thuhilhte leh lamkaite ahita uh hi.

2. A Kikheelnate Uh:

A. Ni dang a LST theisiamlou a, Jesu kiang a na thu gente bang na chihna e? chi a dongte ahi ua, tu'n LST theihsiamna a neite uh hi (Matt. 13:36).

B. Ni dang a bangmah bawltheih neiloute ahi ua, tu'n Biakpiakna a Sil Bawltheihna Thak a neita uh hi. Ni danglai a a lawhsapnate uh hih Bible taangte ah muhtheih in om hi; Matt. 10:1; 17:14-21. A tuali uate; Nas. 3:1-10; 5:1-10; 8:20-23; 13:10-12; 9:36-42.

C. Ni dang a mi meipuahte ahi ua, theihpihmi diing a zong chinglou chih ut-huai phialte ahi ua, tu'n Jesu Khrist Theihpihmi Hihna a Hangsanna Thak neita uh hi (Jn. 20:19; Nas. 4:19-20; 5:29).

Jesu nungzuite pen, Jesu nungzui ahih masang uh leh Jesu nungzui ahih nung uh hinkhua i et leh, "Kibungbuleh" vawt hi. Tuaziak in mite'n lamdangsatak in, "Bang chidan a i un ua i pianpih ham chiat ua i zak theih uh e?" chih lawh uh hi.

Nang bang na chi a? 

Na pianthak masang a na duhte mah na duh veve maw? 

Na neekte mah na ne veve maw? 

Lungsim hoihlou mah na paw veve maw?

Na khasiatna diing bek mah na zong veve maw? 

Na teep-le-muamte mah na teep in na muam veve maw? 

Na dawn ngai zute mah na dawn veve maw? 

Na sumduh ngai daan mah in na duhlai veve maw? 

Na thu neih ut ngailai bang mah in, na utlai veve maw? 

A lian pen hih diing na utna bang mah in, na utlai veve maw?

JESU IN NA HINKHUA A KHEELNA BANG E??

Na dawnna tawh kituak in, Toupa'n Thupha Hung Pia Hen…

KHALVONTAWI

VOICE OF THANGKHAL

Share: