JESU KHRIST DANGTAAKNA

 - By: Pastor Thangdoulal Thangkhal

Bible Taangteel, John. 19:28, "Hih khit in Jesu`n,… 'Ka dang a taak,' achi hi.

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in  Advance Good Friday chibai ka hung buk hi.

Tuni'n i lungsim un Calvaru mual a, Jesu Khrist kikhailupna mun a om a, eite hung Tanpa Jesu Khrist kikhailup daante en thak diing in i ki-ngen uh hi. Ama'n tua calvary mual ah, A thupina zousiah, nag leh kei khualna ziak in lungkham mangbatna in a kheek a, tua mual ah Ama'n nang leh kei a hung itna namdetna bawl in, a tak a muhtheih in a hung ensak hi. Jesu Khrist dangtaakna tawh kisai a tutung a i ngaihsut diing uh hih a nuai a bang ahi.

I. Saa Daan a Jesu Dangtaak Nguut-nguutna:

Saa daan a Jesu a dangtaakna kichianzaw a i theihsiamna diing un, Singlamteh a tun masang a a thuaknate i en masa diing uh hi.

1. Singlamteh Tun Masang a Jesu Thuakna:

(A). Zaan Lungkham-huai: Gethsemani huan ah Jesu'n zaan khovaak in thu a ngen a, hih hun sung in, Jesu'n a zing chiang hun diing muhkholhna tawh lunggimtak in a hun a zangh a, hih lunggimna pen mikaangte'n, 'Phychological Stress' a chi uh hi. Hih theihkholhna ziak a lungkhamna in a khosa-ul sisan in a pawtsak hi. Lungkhamtak a zaan khovaak a, khosa-ul sisan a pawt zeen a ompa pen, a zaan hahna ziak in a tha kiam mahmah diing hi. Sihna inn a zaankhat, lungmuangtak a, duh-duh ne kawm a i zaan hah lehbawn kigim mahmah ahihleh, Jesu zaan hahna pen gim-huai in tha-kiam huai mahmah diing hi.

(B). Roman Gaalkaapte Mi Zeepna: Hih Roman gaalkaapte mi zeepna ahihleh, savun khau-heek, a kawm a siik-ling (meet-siik tawh kibang a kawi) tawh kiheekkhawm ahi. Hih siik-lingkawi tawh kibawl savun khau-heek a Roman gaalkaapte'n mi a zeep chiang un, a zeepkhaak na munte uh a kuuikeek bek hilou in, a satel uh zong them-them in a la hi. Hibang kizeepna pen naa mahmah a, a gen diingdaan omlou phial hi. Tuaziak in thumal khat a phuak ua, tua pen HYPOVOLEMIC SHOCK a na chi uh hi. Hih Hypovolemic Shock in a gen utpen ahihleh, (1) Sisan hawmzaaktu lungtang pen, a hawmzaak diing sisan omlou a, a kisai-buaina. (2) Sisan kithehzaak a tam luat man a hu-sapna or bahna. (3) Kal (Kidney) in bangmah bawlthei nawnlou, a nna sep diingte semtheilou. (4) Tuachiin taksa in a mansuah sisan leh tuite taaksapna in dangtaakna, tui lunggulh nguut-nguutna a tun hi. Jesu Khrist pen hibang dinmun a ding ahihman in a dangtaak mahmah hi.

2. Singlamteh Tung a Thuakgimna:

A kikhailupna diing mun a tun in Jesu bangchibang in a omtai leh? A kilumsak diing a tuachiang in a kilh diing uh hi.

Tua hunlai a Roman gaalkaapte inkilh zakte ahihleh, siik khenthoh inch 5-7 kikaal a saau ahi. Tualeh mi a kilh chiang un, a khuttong guh tegeel kikaal ah a kilh uh hi. Aziak pen, a kikhai chiang a a khut a keek or bang hiam a chihlouhna diing leh a puakzawhna diing mun diktak ahi. Hih guh leh guh kikaal a kilhna nat daan pen, a gen diingdaan a omkei a, a tehpih thei omsun ahihleh, singsaat mite'n sing a saatlaitak ua, a heiga ua a khup uh a tawk-khaak uh natdaan tawh kibang, tualeh kiginlouh kaal a kiu-guh tawkkhaak natdaan tawh zong kibang hi a gen in om hi. Singsaat kimlai saatkhial ziak a heiga tawh khup tawkkhaak natdaan pen a lamdang a, i taksa tung a thahui, or hui om zousiah kisat det-det khop a naa ahi. Tuachiang in Jesu pen a khut langhkhat a ki-kilh khit in a langhkhat a kikilh a, a kikilhna diing singlamteh tawh a kituakna diing in a kai ua, tuachiin a guh kizopnate a kilawi hi. Hih pen Laate 22:14 in, "Tui bang a sunbuak in ka om a, ka guh ka taang zousiah zong a kilawi hi; ka lungtang khuainuun a bang a; ka angsung ah a zunmang dimdem hi," a chih pen taangtunna ahi. 

I Toupa Jesu'n mat a a om diing zaan a kipan in thuakgimna a pan a, vuak-le-saat leh simmawhna leh housiatna zousiah, nang leh kei a diing a thuak in, a taksa tung a tui leh sisan kibua a tamseeng ziak a hulna, dangtaakna, leh tui duh nguut-nguutna a neihna pen gimnei salou na hiam?

II. Jesu Khrist Lungsim a Dangtaakna:

Mihing, kha mangthang diingte ngaihna or itna ah Jesu Khrist pen dangtaak mahmah hi. Nang leh ke'n kha a pianthakna i neihna diing un, Jesu pen Amah leh Amah kihuhtheih louhna dinmun ah ding hi.

Ni khat ni chiang in, tuni a Jesu dangtaakna limsak lou mite, Jesu thuak bang natnate leh a dangtaak bangbang in a dangtaak diing uh hi. Hilezong ei, tuni a Jesu Khrist dangtaakna thuakpih a, mite housiatna thuklou a thuakte, mite gensiatna thuklou a thuakte, mite chilphihna thuklou a thuakte, mite chiammuih bawlna thuak a thukloute, heeksiat chinteng thuak a thukloute pen, Jesu tawh i dangtaak ngai nawnkei diing uh hi. Gual-lelnate gualzawhna suaksakpa Pasian thupita sem-semta hen…

KHALVONTAWI

VOICE OF THANGKHAL

Share: