Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.
"Jesu Khrist a hinna thak" i chih uh Pianthakna genna ahi a, hih Pianthakna kichi Sahkhaw zousiah (Biakna zousiah) a diing a thu poimawh penpente lak a khat ahi. Hilezong tuni in Sahkhaw dawngte (Biakna dangte) a diing a Pianthakna kichi bang e, chihlam enlou in Bible gingta a Bible thu zuite i hihman un, Bible in Pianthakna a chih bang e? Chihlampang i enzaw diing uh hi.
Bible a i muh uh Pianthakna pen, "Lungsim lui pen omna mun a lungsim thak koihna (Repositioning the Concept) ahi a, hih pen lungheina, lungsim kheelna, leh hindaanthak a hinkhua zakna chihte ahi. Hibang a hindaan lui a kipan a hindaan thak a kipum kheelna pen Jesu Khrist ginna or taksanna ziak a, Kha Siangthou piak lungsim thak puakna pen, deihthu a neihtheih ahikei a, utthu a zong neihtheihlouh ahi. Tuaziak in, mi khat in a hindaan luite nusia, a lungsim lui pen nusia a, lungsim thak pua a, hindaan thak a hinkhua a zaktheihna diing in thu poimawh mahmah a pom teitei diing thu, hih a nuai a bang ahi.
1. Mi Zousiah Mi Khial Ahi.
1Kum. 8:46… "Kuamah sil bawl khiallou a omkei hi…" Laate. 14: "2Toupa'n vaan a kipan in mihingte lak ah, theihsiamna nei a Pasian zong a om na uai, chi'n a ensuk hi. 3 Hinanleh mihingte a hilou lam a pai in, a unsiang un a na kilehngat mangsiang ua; sil hoih bawl khat zong a omkei ua, khat beek a om kei hi." Rom. 3:23, "… mi zousiah in sil a bawlkhialta ua, Pasian thupina a tangzou kei uh hi." (Bible etbeh na ut leh; Is. 53:6; Elcc. 7:20; Is. 64:6; Ja. 2:10; 1Jn. 1:8; Rom. 3:12). Hih Bible thute'n a gen ahihleh mi zousiah mi khial i hi uh achi ahi. Hih Bible thudik na pomtheih kei leh na Piangthak-thei ngaikei diing hi. Thu khat pouh-pouh a dik i kisak valvalna pen i khelhna lian pen uh ahi.
2. Khelh Man Sihna (Pasian tawh Kikhenna) Ahi.
Rom. 6:23, "… khelhna man sihna ahi…" Is. 59:2, "Na tatsiatnate un na Pasian ua pan in a hung khenkhia a, na khelhna un a meel a liah hi." 2Thes. 1:8, "Meikuang ahung kilak chiangin, Pasian theiloute leh i Toupa Jesu Khrist tangthupha thu mangloute tung ah phuba la in. 9 Hihte zousiah Toupa mai ah leh asil bawltheihna thupitak a kipan in tangtawn manthaina ah gawt in a om ding uhi." Eph. 2:1, "Noute pen, na gamtatvalnate uleh na khelhnate uh ziak a si…" a hung chi hi. Bible in na khelhnate uh ziak a Pasian tawh kikhen, a si ahung chih leh, a chih ahi a, a dik ahi. A khiallou kuamah i omkei uh hi. (LST na etbeh ut leh; Jn. 3:7; Rev. 20:14-15; Ezk. 18:20; 2Kum. 14:6; 22:16-20; Deut. 24:16; Ezk. 18:4; Jer. 31:30; 1Kum. 8:32; Is. 3:10-11; Matt. 16:27; Rom. 2:6-9).
3. Vaangam Pen Mun Siangthou Ahihziak In Mawhna A Omthei Kei Diing.
2Pet. 3:13 ah, "Vaangam pen Diktatna Inn," chi ahihman in mawhna omthei lou diing hi. Rev. 21:27, "Huasung ah bangchik mah in silsianglou, ahihkeileh kihdak-huai leh zuau bawl mawng mawng alutkei ding a. Hinanleh Belamnou laibu a min kigelhte bek a luut diing uh hi." Mawhna kichi a luutlouhna vaangam ahihman in, mawhna a keemdap, a vomdapte vaangam luutlou diing hi.
4. Pasian Bawlsa Vaangam Luutna Diing Mihing In Bawltheih A Neikei Hi.
Eph. 2:8-9, "Pasian hehpihna ziak a ginna tungtawn a hutdam," mihingte i hi ua, ei a pan a bawl diing hiam, sep diing hiam bangmah omlou hi. Gal. 2:16, Dan silte bawl ziak in mi siamtansak in a om kei a, hinanleh Jesu Khrist gintatna liuliau in siamtang in a om uh chih i thei uhi. En zong dan silbawl ziak hilou a, Khrist ginna ziak a siamtang a i omtheihna ding in Jesu Khrist pen i gingta uhi, aziak dan silte bawl ziak in kuamah siamtang in a om kei ding hi." Titus 3:5, "Diktatna eiten i bawlte uh ziak hilou in, pianthakna silna leh Khasiangthou a siamthakna in, leh a (Pasian) zahngaihna dungzui in ahung hundam hi." Hutdam a i omtheihna diing un, bangmah i bawl diing uh omlou hi. An ngawl a kizon ngailou hi. Aziak pen, an ngawlna ahihleh nna sep ahi. Hutdam hihna diing in nn sep poimawh lou a, Bible thu diktak a (Lungsim taktak a pomna) pomna poimawh zaw hi.
5. Jesu'n I Mawhman Uh Bukimtak A Hung Piaksak In, A Diktatna Hung Pia Hi.
2Kor. 5:21, "Aziak amah (Jesu Khrist a) ah Pasian diktatna i hung hih theihna diing in, khelhna mawng mawng theilou amah (Jesu) pen Pasian in eite ziak in khial in a bawlta hi." Is. 53:6, "I unpi un belaam bang in i vaakmang ua, eima lampi chiat ah i pialmang uh hi. Hilezong Toupa'n Ama tung ah eite mawhna zousiah a ngata hi." 1Pet. 3:18, "Aziak pen Pasian kiang a ahung puitheihna dingin Khrist in zong khialhnate ziak in khatvei a thuakta a, midik in midiklou tangin, taksa in hihlup in a om a, hinanleh kha a suk-hing in a om hi." Hih Bible taangte'n a hung hilhna ahihleh, Jesu'n eite mawhna a pua hi, chih a hi. (Hih tawh kisai a theihbeh ut na neih leh; www.khalvontawi.com ah, Jesu sihna a a mawh kua e? chih thu a na sim in).
6. Hutdam I Hihna Diing Ua Mi Zousiah In I Bawl Diing Uh Ahihleh, Jesu'n Ei A Diing A A Bawl Pen Taksan Diing Ahi.
Jn. 3:16, "Pasian in leitung a it mahmah a, tuachi`n a Tapa tang neihsun apia hi, tuachia Amah gingta zousiahte'n mangthang lou a tangtawn hinna a neih zawkna ding un." Jn. 6:47, "Adiktak in, adiktak in k'ung hilh ahi, kei hung gingtate'n tangtawn hinna aneita uhi." Jn. 1:12, "Amah taksang a, Amin gingta zousiahte, Pasian tate suahsak theihna ding, thuneihna apia hi." Jn. 6:28, "Tuachi`n amau`n akiang ah, Pasian nna ka septheihna ding un bang ahia ka bawl ding uh? achi uhi. 29 Jesu`n adawng a akiang uah, Pasian nasep hih ahi, A hung kisawl mipa taksang un, achi hi." Ginna or taksanna omlou in hutdamna a omkei hi. (Bible na etbeh ut leh; Phil. 3:9; Gal. 3:22-26; Rom. 5:1, 8-11; Nas. 13:38-39).
7. Taangtawn Hinna Na Neita Chih Na Theithei Diing Hi.
(Bible; Rom. 6:23; Jn. 3:16; Jn. 6:47; 1Jn. 5:13, "Tangtawn hinna na neita uh chih na theihna ding un, nou Pasian Tapa min gingtate kiangah hih thute ka gelh ahi, tualeh Pasian Tapa na gintat zing theihna ding un."). Jesu Khrist min taksanna ah taangtawn hinna i nei uh hi. Hilezong ka gingta chi a Jesu nungzui utlou pawl khat a ki-omthei a, hibang mite pen, Pasian kheemte ahi uh hi.
Jesu Khrist ah hinna thak na neita hiam? Jesu Pasian tapa ahi chih na taksang hiam? Na taksanna in nna a hung semsak diing a, na nna septe'n na Pianthakna or Jesu Khrist a hinna thak na neihna a taklangh diing hi.
TOUPA'N THUPHA HUNG PIA HEN
.png)
.JPG)
