Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.
EL-ROI kichi Hebru haam ahi a, ei haam in, "Kei hung mu Pasian or muthei Pasian," chihna ahi. Hih El-roi chih kammal a hung pawtkhiatna ziak pen khasiatna ahi.
Numei or nupi khat a ta tawh innsung a kipat a nawhpawt in a om a, thuchiin nupi nu zong beidonghtak leh chihna diing theilou in gamlak ah a hung pawtta hi. Aziak pen, hih nupi-nu hunlai pen tulai a eite hun tawh kibangloutak i haam zilnate leh lai zilnate a omlou hileh kilawm hi. Oral tradition kizuihna gam leh Oral tradition hunlai ahi a, tulai in eite written tradition ah i omta uh hi. Tualeh khua, khoipi leh singtaang khua chihte om saamta lezong a tamlou ahikha diing a, a omsun a om leh zong mi dangte or gamtuamte khua, haam theihlouhte khua chihbang hi diing (Mi dangte, gamtuamte, haamtheih louhte i chih chiang un, i lungsim kibakpih hiloute i chihna uh zong ahi) ahihziak a gamlak a pawt hi diing ahithei a, tualeh a pawtkhiatna diing ua a innsung mite'n a vakhahna uh zong a himaithei diing hi. Hibang a chimawhtak a hinkhua, hih nupi in a hung zak-lai in khase mahmah hi. Neek diing, taak diing omlouhna mun, dawn diing tui omlouhna mun ah, hih nupi-nu leh a ta a diing in, kial a si diing chihlouh bangmah om nawnlou hi. Kialsih diing a hinkhua a zak-lai un, kialsih taktakna diing hun a hungtung taktakta a, tuachiin hih nupi-nu ta neihsun pen sih-kah in hung kapta hi. A ta sih-kah a kap, leh a ta si diing en-ngamlou in hih nupi-nu mun tuam, husa kizaak phaakna chiang ah a paikhia a, khasetak in a kap nguut-nguutta hi.
Hih nuta tegeel chihmawhna leh beidonna pen hichi zaw deuh leh chihna diing omlou hi. A pasal in a nusiat, a sawlmang, a khahmang, leh Pa in a zi a ta taisan or hawlmang dinmun ahihman in, hih nupi-nu khasetak in a kap a, hibang khasiatna saang a saangzaw diing khasiatna omthei nawnkei leh kilawm in khasia hi. Hibang a dinmun haksatak a a omlai un Pasian in khasetak a sih-kah a a kahna awte uh a zaa a, tuachiin hih nupi-nu a sam a, a ta tawh a dawn diing uh tui pia hi. Hibang a Pasian aw a zaaktak in hih nupi-nu'n El-roi (Kei hung mu Pasian, or Muthei Pasian) na hi, a chi hi. Tua chiang in Ama'n a hinkhiatna diing uh zong bawlsak-lai hi.
BIBLE: Gen. 16:13 Hagar in a kiang a thugen Toupa pen, "Nang muhthei Pasian na hi," a chi hi; aziak pen ama'n, "Pasian ka muh khit a zong, ka damlai lai maw?" a chi hi. 14 Tuaziak in tua tuikhuuk pen, Beer-lahai-roi a kichi hi; Kadesh leh Bered kikaal ah tua tuikhuuk a om hi.
Sanggam aw, gentheihna tawpkhawk thuak in na kingaihsun maw? Innsung mite muhdah leh nawhpawt a om a, ahihke'h limsak hilou kisa a beidongtak a om in na kithei maw? Na mi muante taisan, nu-le-pa taisan, u-le-nau taisan a om in lungdong na kisa maw? Lungkia in hinkhua zangh ken. I Pasian uh pen El-roi, 'Muthei Pasian ahi a, Amah pen eite hung mu zing i PA uh ahi. Leitung ah i belh diing, i muan diing kuamah omkei lezong Amah muan-huai hi. Ama'n a vai zousiah a hung saisak diing hi.
Laate 37:5 Na lampi diing Toupa tung ah nga inla; mah muang in, ama'n a hung sem diing hi. 6 Ama'n na diktatna vaak bang in a taangsak diing a, na siamtanna sunlai nisa bang in a suaksak diing hi.
KHALVONTAWI
VOICE OF THANGKHAL
.JPG)
No comments:
Post a Comment
Comments not related to the topic will be removed immediately.