EASTER SUNDAY: Gualzawhna Lam-etna Ni

- By: Pastor Thangdoulal Thangkhal
CHIBAI BUKNA: Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

THUPATNA: Leitung mi zousiah in sihna kilaau bawl chiat a, a laaulou kichite zong sih diing utlou uh hi. Mi haatte'n zong hih sihna a laau ua, tualeh daktolte'n zong sihna a laau uh hi. A haau pen pa'n zong sihna a laau a, a zawng pen pa'n zong sihna laau hi. Tuaziak in Jesu'n hih sihna laauna a kipan in eite a thohkiikna tungtawn in a hung suaktasak hi. Tualeh hih suahtaatna pen, a thatthei omlou hinna ahihman in, Khrist a omte a diing in gualzawhna lam-etna ni a hung suak a, hih pen eite kikheekna ni zong a hung suak hi.

Tualeh leitung a thu kigen minthang mahmah Jesu Khrist taangthupha ahi a, hih taangthupha pen namdetna ahihleh a thohkiikna ahi. I Toupa Jesu a sihna a kipan a thou kiiklou hileh, leitung mihingte'n bangchibang taangthupha i nei diing uai maw?? Chihte lungsim ah a om mahmah hi. Jesu a sihna a kipan a a na thoulou hileh leitung mihingte taangthupha hithei diing a ka ngaihsut pen ahihleh, omdaan hoih, nna sep hoih i chihte uh ahih diing ka gingta hi. Hilezong Jesu haan sung a kipan a thouta ahihman in, tuni in leitung mihingte'n Jesu Khrist tungtawn in itna taangthupha i nei uh hi. 

Jesu thoukiik lou hileh, tuni'n eite bang dinmun ah i ding diing uai? Kinepna i nei diing uai? Chih thute i ngaihtuah kawm-kawm in, hih a nuai a thute tomkim in i kikum diing uh hi.

LST-Rom. 8:11, "Tualeh misi lak a Jesu kaithoupa' kha, noute sunga a tên naak leh, misi lak a kipan a Khrist kaithoupa`n noute sunga têng A Kha ziak in, a si thei na pumpi uh zong a hingsak ding hi."

1. Na Sung A Om Kha Siangthou Pen, Jesu Thousakpa Ahihlam Mangngilh Ken.

Jn. 11:25, "Jesu`n amahnu kiang ah, "Kei thohkikna leh hinna ka hi. Kei hung gingta zousiah si nanle-uh a hing diing uh hi."

Genesi bung khatna sung i sim leh, Pasian in, "Vaan nuai a om tuite mun khat a kigawm uh henla, leitangh dawk hen," a chi a, tui nuai a phum a om leitangh a ni thum ni a Pasian in a dawksak bang in, Jesu zong a sih ni a kipan a a ni thum ni in A kaithou a, hih pen sihna tung a gualzawhna ahi a, Khrist a omte gualzawhna zong a hilai diing hi. Aziak pen Bible in, "Melma nu-nung sukmang a om ding pen ahihleh sihna ahi," (1Kor. 15:26) a na chi hi. Tuni a haankhuk sung pan a Jesu a kaithoupa Kha Siangthou pen nang sung a om Pasian Kha Siangthou ahihman in, Ama'n nang zong, Jesu a kaithoh bang in a hung kaithou diing hi.

2. Rome Kum,Pigam Leh Setan A Diing A Thu Zaakdah-Huai 'Jesu Thohkiikta.'

Jesu hunlai in Rome kumpigam pen, a thupiit mahmah ziak in, kumpigam dangte tengteng ama'uh nuai ah om uh hi. Hih Rome mite pen, 'Thohkiikna' taksang loute ahi uh hi. Tua ahihziak in ama'uh pen Setan a diing a vanhzak hoihtak a hung suakta uh hi. Tuachiin Jesu thohkiikna thu gente gaalmat in kiman a, kigawt a, gimthuakna kipia hi. Hilezong nungzuite'n gen veve uh hi. Aziak pen ama'un tua Pasian Kha Siangthou nei uh hi. Nas. 5:42, _"Tualeh ni tengin biak-inn leh innchin ah Jesu Khrist ahi chi-a thuhilh leh tangkou a tawpkei uhi,"_  a chi hi. Jesu Khrist thohkiikna tungtawn in nungzui masate'n, leitung mite leh ama'uhte utna saang in, Pasian utna leh deihna zui zaw diing in tha a ngah mahmah uh hi. Eite zong nungzui masate bang a Khrist thohkiikna tungtawn a tha thak la a, Pasian a diing a mi pammai leh deih-huai hi diing in kisa thak ni.

3. Jerusalem a Jesu Haan sung a Thu Kigelh.

Rev. Dam Suan Mung thu genna leh Rev. Pu Chawuthuama, "Guide to Jerusalem Tour" chih laibu, Mizo haam a gelhpa genna leh a limlak kichiantak tungtawn a ka muhchet leh theihchian mahmah ahihleh, Jerusalem a a kivuina ah Jesu a om nawnkei chih ahi. Hih pen Bible in zong hibang in a na gen hi. Matt. 28:6, "Hisung ah a om nawn kei, a gensa bang in a thoukikta hi," chih ahi.

Sanggamte aw, i muanpa Jesu Khrist pen;

1. Haan ngakpa hilou hi.

2. Sihna in a zawhpa zong hilou hi.

3. Sihna tung a gualzoupa ahi.

Na thei in, na theikei phial zong in, na sung a om Jesu pen, Humpineelkai bang in, a gualzawhna ah hawk nuamta hi. Tuaziak in gualzou lungsim nei ni chi in Toupa min suang in i ki-ngen uh hi.

Rom. 4:24, "Eite a diing a kigelh zong ahi. Misite lak a kipan a i Toupa Jesu kaithoupa, i taksan leh, eite a diing in zong, i taksanna pen diktatna in a hung simsak ding hi. 25 Hua Jesu pen i khelhnate uh ziak in piakkhiat in a om a, tualeh i diktanna ding un kaihthoh in a om hi.

Gualzawhna pen eima sung chiat ua om ahi. Gualzawhna pen pawlam tawh kisai lou hi. Gualzawhna pen Hoihna tawh gilou zawhna ahi.

TOUPA'N THUPHA HUNG PETA HEN.

KHALVONTAWI

VOICE OF THANGKHAL

Share: