UZO Assembly Zogal Hall ah nei in um

"... Tamteng lah ah UZO, Mate Tribe Council leh Thangkhal Tribe Council te dual membership leh tribe a thum a membership hina nei bang a um hin vaihawmna ah abuoi huoi mama hi. Zomi Council forum a gen sieng na um thei leh ut huoi hinapi in tutan in kigen theilou hi."

LAMKA, 2019 MARCH 30: UZO Assembly Zogal Memorial Hall Complex, Zoveng ah tuni’n 63rd UZO General Assembly um hi. 

63rd UZO General Assembly chiemtehna ding in Chinlunthang, President, UZO GHQ in UZO Diallap kaipalhna nei in ZAU lamkaina nuoi ah peikhawm palai te’n UZO Lapi “Semguo gin ngai luonglom nou toh” chi sahna nei in Assembly pat in um hi. Presidential Address hun ah Chinlunthang in UZO Assembly Speaker, Assembly palai, Zou Woking Committee & Headquarters Executive Committee member, Church Leaer leh Zou mipi jousie chibai buhna nei in 2009 apat UZO in Policy program a peipite mipi thei ding in tahlang hi.

Tami hun ah President, UZO GHQ in Zou Gal Hall, Zoveng pen ‘Zou Gal Memorial Hall Complex’ chi’a minvaw a um pen pankhawmna jal a lam jou ahidan gen hi. Lamkai masa te’n March 17th nikhuo pen Zou Gal chi’n kum 20-30 lam ana jang ua, hinanleh 2011-12 kum in MLA Ginsuanhau muonna jal in Manipur kumpi kung ah State Holiday ding in ana ki-ngen a, hinanleh a lawchin lou beb in Zou Gal Day pen April 23, Khongjom Day toh kituohsah vai ang chi zieh in 2013 Annual Assembly ah sulamdang in um chi hi. Hinanleh I Zou sung a intellectual leh scholars te’n nasatah a demna ahing bawl jieh uh UZO Annual Assembly 2016 ah UZO lamkai masa te’n ana jah ngai uh March 17, Zou Gal Day pen luitou kia in um chi hi. Tualeh Zou khangthu bu “A History of the Zou People” leh Zou MIL te ah March 17 pen Zou Gal Day chi’a kigel ahi man in sudih tha kia vai ui chi’n Assembly ka hing gen chi’n gen hi. Kum 20 lam sutjop lou a ana um Zou Gal Memorial Shield Tournament 2015 kum bul a puophat ahi’a, hinanleh gamsung buoina, 3 Bills jieh in kum 2 sutjop theilou in um a, hinanleh vangphat huoi tah in 2017 leh 2018 huom in Zou Gal Centenary lawpna in Zou Gal Football (Male) leh Volleyball (Male & Female) Hiangtam Lamka Public Ground leh Awnchinkap Khuo ah lawching tah in ana kisai chi hi.

Zou Gal (1917-1919) Centenary, Zou Gal kum zakhat china (100 years) Behiang khopi ah December 19, 2017 in Manipur Chief Minister N. Biren Singh Chief Guest hina toh thupitah in lawp in um a, tuanah Zou leh Zou Gal khangthubu “A History of the Zou People” chi laibu honkhiet ahiban ah Zou Gal lai a ana si leh liemte theizingna in Zou Gal Cemetery siansuo leh honkhiet in ana um chi hi. Tu-le-tu in Zou History laibu pen Zou Kam a let ding in Fr. Mark Thangkhan-ai, Vice Chairman, Zou Literature kung ah apkhietna kinei chi hi. Behiang khuo a um Zou Gal Memorial High School upgrade na ding in tunitan in pan kila a, alangkhat ah Zou Gal Tournament saina ding UZO in mun-le-muol lemtang anei lou zieh in 2018-19 a Zou Gal Tournament organized toh kisai a lemtanglou leh nawngkaina um toh kisai in UZO sih-le-tang in ngaidam ka hing ngen chi hi. Tambang kawmkal ah UZO in Zou Gal Tournament saina ding mun-le-muol kitup nei thei hileh chi’n gen hi. UZO Education Policy nuoi ah Behiang khuo a School in Class X pass 6 batch chieng gasuota a, hinanleh Muallum khuo a High School nei ding/tun ding ding pen tunitan in laching nailou chi hi. I gam sung a leitang zah dan, huon haichi chiin ding dan nasatah a seminar bawl a tangkou ding poimaw ahina ah economy policy sepsuona ding a UZO GHQ in maban a tangkou group khat siem ding deihuoi ahidan zong gen hi. Electoral reform leh khotha siem ding toh kisai a Block leh Hausa te’n a hun-hun a pan alah ding ua deisah leh theisah ahiban ah kho tha siem ding a poimaw bang a UZO in panlah pieh ding chi hi. UZO Sports policy sepsuona ding a Zou Ggal Tournament suh hing kia ahi mai hilou in maban a Zou Gal Tournament tungtawn in ei sung ki aapmaina um leh chi ahi. 

Alangkhat ah thuchien theilou a tunai a Zou Hausate TA Dangka zanga (Rs 500) pieh in nam thu gen ding a hatkhawm ban ah phuotawm in Nam buoita chi paulam a Pastor leh Upate kimukhawmna ding a sponsor ana bawl te’n tawpsan ding a chiel leh theisah ahi’a, Nam lamkai te’n Nam na ahing sem ding ua, MLA, MDC leh Contractor te’n Nam khantouna ding a na ahing semta ding uh chielna bawl uhi. ZWC leh HEC ban ah UZO kivaihawmna lienpen ahileh Assembly ahi’a, Assembly thulou a Nam in thutanna latheilou ahina ah UZO lamkai hikha jieh a danbu khel a gamtat thei hilou chi hi. 

Namdang banglou a Zou sung kivaihawmna pen democratic mama ahina ah Zou nam a buoisiet leh Pastor leh Upate aloutheilou a hing kitheisah mama ding ahina ah Nam thu toh kisai lunghimawna nei te’n bangchi laipou in UZO lamkai te kung ah Office leh inn mun ah dothei gige ding chi’n zong gen hi. Foreign Policy thu ah UZO GHQ in UZO-Myanmar leh UZO-USA toh kithuzah zing a, India solkal in ‘Zou’ leh Myanmar solkal in ‘Zo’ chi’a athei leh a pom ahina ah Zou/Zo pen historic tribe ahi chi’n zong gen hi. UZO-USA leh UZO-Delhi panlahna in UZO pen United Nation Department ‘United Nations Economic and Social Council’ nuoi a register bawl a um pen tutung UZO Assembly in theipi leh kipahpi ahi’a, UZO-USA sponsor na nuoi a February 21, 2019 ni’a Moreh a UZO (USA, Myanmar leh India) in genkhawmna kinei a, tuanah Zou/Zo in a khantoupi theina ding lampi suitou hoi kisai chi’n zong gen hi. Namvai toh kisai a UZO-HEC in resolution No. 01 dated 30/01/2019 in UZO leh Zomi Council/Zomi Policy et tha poimaw kisa ahina ah Assembly ah mipi toh kikup ding in pha kisa hi. A zieh ahileh UZO in Zomi a jop apat tunitan kum 15 bang valta a, Zomi Council/Zomi Policy in UZO kahingte leh Zou Nam hina (identity) sukha chi thu bangza ahei khat Zou scholar te leh mipi apat mukhiet ahizieh in genkhawmlou phamaw kisa chi hi. 2014 kum in Kawlgam (Myanmar) ah General Census (kisimpina) ana um a, tuanah imi-isa Zo 421 chi’a kikhum na ding in kawl kumpi in ana pieh hi. Myanmar a Zo tate Nam awlmawna (conciousness) nei phalou ahi man un UZO-Myanmar lah kiphut chil hitoh chi in UZO Inia in zong sum-le-pai, tha-le-zung in pan kilahpi hi. A hinlah khonung a itheileh Zomi Council/Zomi Policy kuongtol te’n kawlgam a i Zo tate tung ah Code No. (Others) kichi ah na kipeh lut ding uh chi thupi in nahpi tah in nawna ana tang uhi. Zomi identity siemkhiet utna hi chi zong akihai sih hi.

Hinanleh dohlou/kuplou ban ah Zou/Zo identity ei kepbit utdan toh kituolou kisai chi hi. Zomi Council kahing, Zomi Youth Association (ZYA) in UZO kahiang Zou Youth Organization (ZYO) Unit, Block te asuhkha leh henlamang pen in UZO/ZYO kivaihawmna sukha ahi chi ngaidan lienpi imi-isate lah ah um hi. UZO sung Zou (ZYO) leh Zomi (ZYA) a kikhenna umthei ing hi chi gintat na lienpi um hi. Tuajieh in ZYO HQ in ZYO khu ZYA apat ana ki withdraw chi hi. Zomi Council kahiang Zomi Language and Literature Society in Zomi Script hilou in ‘Zo Script’ Seminar dated 15 March 2015 in nei ua, Zou/Zo Script toh kibanglou ahman in mipi a hamhai (confuse) sah hi. Zou Literature Society te ngaidan toh kituoh lou hi. Ban ah ‘Literature Invasion’ ahi chi pawl um ahi man in ngaidan, United Zomi Organization chi’a lamkai masa te’n ana heng uh ahi’a, ahin tun Zou/Zo hina ZOLLS tungtawn a hamhaina pieng sawn sawn hi. kitheisah poimaw kisa hi.

Tualeh, Zomi lamkai kahi chi a Zou Hausate nelsie a suzau a Zou khuo a khantouna, development scheme suhsah/lapieh te khoh akisa mama chi hi. Zomi Council sungah tu-le-tu in Tribe 9 um a, tuate ahileh: Paite Tribe Council, United Zou Organization, Simte Tribe Council, Vaiphei People Council, Gangte Tribe Council, Mate Tribe Council, Thangkhal Tribe Organization, Kom Union, Manipur leh Tedim-Chin Union ahi. Tamteng lah ah UZO, Mate Tribe Council leh Thangkhal Tribe Council te dual membership leh tribe a thum a membership hina nei bang a um hin vaihawmna ah abuoi huoi mama hi. Zomi Council forum a gen sieng na um thei leh ut huoi hinapi in tutan in kigen theilou hi. Zomi Council Chairman post ‘Rotation’ hileh Zomi Council sung ah Chairman kituna umlou ding a, Zomi Council zong dam ding chi suggestion ana kipe jel pen tutung UZO Assembly in Zomi Council hoitah a, a function thei kia chieng in point tuomtuom toh suggestion pieh ding in lemsah hileh chi’n gen hi. Zomi Council akiphukhiet kum apat tunitan in kum 21 phata a, UZO in 2004 kum in Zomi Council zom hi. Hinanleh vangsiet huoitah in 3 Bills buoi hunlai 2015 in Constituent Tribe te’n kituoh tah in huntomnou khat a ding in Zomi Council ‘Dissolve’ ana bawl uhi. Kum 2016 in ZRO panlahna jal in tun ding kia in um a, ahi’n tu-le-tu in Zomi Council in ZRO group khat in December 29, 2018 in Dissolve bawl hi. Hinanleh December 31, 2018 in ZRO group khat in dissolve bawlthei ahisih chi in a pomlou thu suokia leuleu uhi. 

Bangteng hileh Zomi Council dissolve leh dissolve lou thu in i buoisih ua, hinanleh defunct phot ahi chi thei vai. Zou/Zo nam kem pumpum a Zomi zong puophat poimaw kisa a, tuajieh in Zomi sung siemphat na ing in UZO in pan kila mama ing ahi chi Assembly palaite iki theisah uhi. Nat-le-sat hun a jap jangkhai ding in ZYO GHQ in ambulance project anei pen UZO in tawsawn tou ding in panla ding a, tualeh tutung Assembly tup-le-ngim ahileh Zou/Zo nam hina (identity) napitah a kepbit ban ah Zomi sung siemphat na ding a UZO in panla ding, tuaban ah tu kum sung a UZO, ZYO & ZSP te kituoh a Zou Development Project Committee siem a, Zou Gal Memorial Football Groun leh ZYO Ambulance neikhiet sawm ding chi ahi chi’n zong gen hi.

*Courtesy: Zolengthe FB

Share: