Khalvontawi Adminte nasepna Lamka Post ah tuang

Khalvontawi Social Media Admin team in Tingneihat inkuan leh Only Grace-te panpihna pia in (L) Pastor Thawngluan innkuanpihte toh hun zangkhawm

LAMKA, 2019 MARCH 07 – Khalvontawi Social Media Admin Team in tuni, March 7, 2019 in Laijang khua a Tingneihat leh a innkuante banah Only Grace-te kiang ah panpihna pia ua, Thangkhal nam sung a Pathian thu poluttu, Missionary Pastor Thawngluan Tawmbing, EBC leh a innkuante toh hun zatkhawmna leng nei uh hi'n thutut kingah hi. Khalvontawi Social Media Admin team-te ahihleh tuni zinglam in MG Thangkhal, Admin Khalvontawi makaih in gari 2 zangin nungak 2 leh pasal 5 toh Laijang khua pha ua, tua hun ah Tingneihat leh a innkuante kiang ah panpihna Anntang (KD) bag 2, Alu Kg 10 Daal/havai Kg 4 Colgate bawm liante 2, Toothbrush 6, leikiatna 6 leh nektheih bawm 12 vapia uhi.

Hiai hun a Tingneihat pianna pa leng om a, Khalvontawi Admin, MG Thangkhal in thugenna nei in Mohan TK, Admin Khalvontawi in Meitei pau in letkhia hi. MG Thangkhal in a genna ah, panpihna a piakte uh ahihleh mi kiphal tuamtuamte apan a kaihkhawm uh, mun tuamtuam a om Khalvontawi member, Thangkhal mi-lesa leh Admin Team in a donkhawm uh hi'n gen a, Pu-le-Pate tawndan a Anntang a panpihna a piak uh hi'n gen hi. Khalvontawi Admin Team in ahihleh apaisa March 3, 2019 nitaklam dak 2:30 in District Hospital ah Tingneihat leh a naute panpihna Rs. 2,000 ana pe ngeita uhi. Huai banah Khalvontawi Admin Team in tuni zinglam dak 9:00 in New Lamka Vengnuam a om, Only Grace leng vapha in naupangte panpih vapia uhi. Hiai hun Lal John Ngaite Thangkhal leh Alex Khaltal, Admin Khalvontawi Social Media te'n makaih in, Only Grace a om naupang enkoltute toh houlimna nei uhi. Houlimna a neih zoh nung in panpihna Khalvontawi Social Media min in Rs 3,000, MG Thangkhal, Admin,Khalvontawi in, Only Grace Home a om heutute kiang ah piakkhiakna nei in kikhen uhi.

Tuabang a hun a zat zoh nung un Admin Team in Thangkhal minamte lak a Pathian thu poluttu, Missionary Pastor Thawngluan Tawmbing, EBC, innkuan pihte toh zinglam dak 10:30 in a tenna in uh Dorcas Veng ah Rev. Khaikhanthang makaih in kithuahkhawmna nei uhi. Pastor Thawngluante' inn a Khalvontawi Admin Team te'n hun zatna nei in hiai hun Thangkhal Gospel Film,"Tanglai leh Tuhun" a Director, Rev. Khaikhanthang, Local Pastor, Delhi Thangkhal Baptist Church in makaih in, Pastor Thawngluan innkuante toh hun zangkhawm uhi.

Hiai hun zatna ah Rev. Khaikhanthang in Khalvontawi Admin Team-te mellahna nei masa a, MG Thangkhal, Admin Khalvontawi in, (L) Pastor Thawngluan innkuanpihte kiang ah pahtawina bawl hi. Hiai hun a MG Thangkhal leh Rev. Khaikhanthang in Pastor Thawngluan, Thangkhal Missionary tapa upa pen, Ginzaliante nupa kiang ah Khalvontawi min in Puan Laisan khat silhsak hi. Hiai hun ah MG Thangkhal in Pastor Thawngluan in kum 1939 March 7 ni a Thangkhal minamte lak a Pathian thu a tangkoupih tuni March 7, 2019 a kum 80 a chingna hita chi a, (L) Pastor Thawngluan in Thangkhal minamte itna mit toh en a Pathian thu, Thangkhal minamte lak a ana tangkoupih ziak a Thangkhal minamte, khalam leh taksalam a khanlohna tungsak ahih dan gen hi.

Thangkhal minam sung a, tusawn khangsawn hun ah leng Pastor Thawngluan min mang nawnlou ding ahih dan a gen banah, Thangkhal minam sung a Missionary chih genkhak ahih hun a Missionary Pastor Thawngluan min leh a tanchinte genkhak a omzel hi'n gen hi.

MG Thangkhal in a genzelna ah Pastor Thawngluan in Thangkhal minamte a it dan leh a ngaihnatna thupi mahmah ahi chi a, amah dam nawn keimahleh a innkuanpih, a tu a tate melmuh theih ahih lai ziakin hon kha muangsak hi'n gen hi. Pastor Thawngluan tapa upapen, Ginzalian in a sanggampihte pulakna nei in, thugenna nei a, apa'n Thangkhal minam lak a Pathian thu meivak neuchik ana det pen khangtou a tuni chiangtan a Thangkhal minam lak a meivak tang lianta in Thangkhal minamte'n leng namdangte lak a meivak tangsakta ahi chi hi. Thangkhal sung apan missionary Rev. Dalzakam, Rev. Thanghaulian te'n leng Pathian nna a sep uh Kum 25, Silver Jubilee bang lop khit hita a, Thangkhal minam sung apan namdangte lak a Pathian thugen a kalsuan bang omta chihte a zak in kipaksak mahmah hi'n gen hi.

Pastor Thawngluan tanu neupen, Manhoihching in a thugenna ah, News tungtawn a Thangkhal thu a zak in a Pa ngaisak ahi chi a, Thangkhal-te Aw a zak chiang a kipak mahmah ahih dan gen hi. Thangkhal mite toh kithuah nuamsa leh Thangkhal pau leh ham zang himhim a innkuanpihte bang a ngai ahih dan gen hi. Thangkhal minamte Pathian in domsangta a, Delhi ah Thangkhal Saptuam, TBC om chih thu news tungtawn amah a zat ahih dan a gen kawmkawm in khitui hon luangsak ahi chi hi. A pa damlai hileh, "Pa aw, Nata Thangkhal minamte Delhi khopi ah Saptuam bang omta uh" chih gen nuam mahmah ka hi chi hi. Huai banah News a TBC toh kisai a kigelh nak leh sim ding kithalawp mahmah hidan in gen hi.

Tua zoh in Rev Khaikhanthang in thumna nei in singpi dawnkhawm uhi. Singpi a dawnkhawm zoh nung un Pastor Thawngluan Memorial Stone vehna nei in hun zangzou uhi. Thangkhal minam sung a Pathian thu lut kum 80 chinna tuzan march 7 in Thangkhal Baptist Church (TBC) Tangnuam ah hunzat in om a, huai hun ah Rev. Khaikhanthang in Missionary khangthusutna nei in, Pastor Thawngluan innkuan lam apan inleng thugenna om hi.

~ The Lamka Post

Share: