ITNA SIMTHU Part-IV Esther Hinkhua

Agelhtu: Alex Khaltal Thangkhal

LAMKA, 2018 JULY 30 — Ka unau lak ua athumna (3) ka hi a, ka nuai ah pasal khat um na lai in, ka neulai in ka pa'n hong na beisan mahnanleh ka pa Govt nasem ahinajal in ama khalawh leh ka tuilou (janglou) uh jal in innsung nopsatak a naki hikei nanleh, nichin nek leh tak sil-le-ten di jong tawm sam lou ana ki um hi.

Skul pe’n Grace Academy ah kana kai ah; innsung genthei haksatna bangma ana kituak khalou leh ana kithei khalou, nikhat ka naupa Rice Mill ah bu (ann) heksak dia kuan hong kileh lam in vangsiat huai tak in gari khat in phu kha in donlou in ataisan suak a, kou jong a kinthei banglam a hospital lam ka puatou pai uleh District Hospital doctor te'n ngamlou in Imphal lam ah hong transfer ua, adamna di’n dangka Lakh 4 vel ngai di ahi takmanin kanu'n jong adam na di ahipouh leh chi’n ka innmun/loumun uleh ka pa card mi kia tungkhia in ka naupa ki jenna'n aki jang tahi.

Huchia akha kha a kijen tak in, Pasian hehpih natoh hong damjou tasam hi. Himah nanleh innmun loumun nei nawnlou mi inn sap ah um in, nichin in innten nek leh tak haksat dan hong kikhel huaihuai ta hi. Ka ute lah pasal nei jinei, tanei bei ngen ahiman un bangma ah hong panpih jou kei ua, skul kai nuam mah nanleng tuition fee kanu'n pejou nawnlou in Cass IX simlai skul kai kadin tawp tahi.

Tuaban ah kanu mahjong nidang ana sem ngailou hilejong septhei leh summu theina lampi um sunpen chi’n meihol met hong bol ta hi. Ka lawm leh ka gual skul kaite ka muh chiang in ka eng mahmah mai ah, skul kai ut in ka kah hun bang a um jel hi. Ban ah kanu meihol a thamtham na maivom sa a inn hong tun chia en joulou in ka kap dapjel a, kahna leh khasiat na'n kahin khua ka mang hi. Kholai ka pawt chia, ka lawm leh gual, ka class mate-te ka mu chia jum in ki suanlah na’n ka dimjel hi. 

Tuaban ah Khawmpi leh Christmas chi te hong tun chia ka lawm leh gual te ki chei dan ka en ngam kei a, nidang hunlai ah biakinn kai dia ka ute nung puanthak ka nu'n hong leisakte toh ka jui jel lai ka mit kha in alang a ka theilou kal in ka mittui ana pot kha jel hi. Mite bang a melhoi leh duang ching tak hikei nanleng jong Class VII ka sim apat in ka class mate-te pasal khat in hong na jawljawl, a kum thum chinna ding kum in ken jong hong deidan leh hong ngaina, itna taktak hinava chi’n ka sangpih in, itna huan sung a pakbang a pakkhom in hun leh nite noptak in ka mangtou jeljel uhi. Atunga ka gensa mahbang in Cl-IX ka sim kum in innsung vangsiatna jiak in nidang banga ka hindan uh bang nawnlou ahimanin ka lompa jong noplou sa in nidang toh kibanglou in kikhel simsim ka sa tahi.

Ka nu niteng a nek ding jong a genthei tak a hinkhua aman dante ken jong enjou lou in Singapore a om di’n 2015 in ka paitou a Singapore ka tun in kanu genthei dante leh ka lawmpa hinkhua man ding dante gelgel in, kalung ahel theih mahmah mai hi. Numei ka hi a, mi inn a um a ki hijiak in mi mitmei ve’n ngai in genthei kaki sah mahmah hi. Khat veivei bang numei apianglou hileng innmun a kanu kithuapih thei di hi’ng a aw, chia ka ki geel siat hun bang a um jel hi.

Himaleh kum leh kha te hong mual liamtou jel in keijong ka umna te’n hong ngaina leh hong it mahmah ta ua, gamtat dan nop panpan ka sa tahi. Kha som (10) vel jou in ka loinu toh kaki hou uleh, na lompa'n ji neita hong chi chu ka gen di theilou in ka kam ka mok kak den a, kaki geel in jaan chia jong imu lou in hapta 1 (1 week) vingveng um in hinkhua ka mang a, bangkim bawl thei Pasian kia thum jel in, lungmuanna leh kipahna hong pian chia ngetlouh kei adia lampi dang umlou ahiman in bangkim Pasian khut aka koih tahi.

       

           --------“Beita”--------

     

        

Story apan zil thei:

(i)Tulai numei te'n pasal te sah nu leh pa itjaw ua, inn sung khual jaw ta uhi.

(ii)Numei kitup vanglak te a shi tan un pang det uhi.ahin gampan a lom ngai te, taksatung bit chi umkhol lou ahi.

(iii)Lai sim ut maleh innsung hindan in ajil nonlou jiak a top mitampi um a,Mi hindan thei masa lou a lekha siamlou te jong mok sim moh di hilou ahi.

Note: Hih story mimal khat hindan lak sawn hilou ah,Numei te hinkhua man haksat dan leh innsung akhual dan uh etsak na ki bawl ahi, kuapeuh ama story toh ki bngsa a um leh jong ei le ei kal a ki thei siamni.

By~Alex Khaltal Thangkhal

Admin KHALVONTAWI Social Media

Share: